كل عام وانتم بألف خير

وتقبل الله طاعتكم جميعاً

عيدكم مبارك

خيرها بغيرها

من زمان ماتحمست حق مبارة يكون طرف فيها نادي محلي او المنتخب


يمكن اخر مرة تأثرت فيها على مباراة من صج


لما خسر منتخب الكويت من السعودية في كاس اسيا 2000


بعدها المنتخب صار اللى رايح واللى راد يفوز عليه





لكن اليوم حدي متأثر ومتحسف وزعلان


على القادسية





والله كانت بيدهم مو صعبة


هالنادي الياباني مو اللى ما ينغلب فريق عادي


والقادسية فاز عليه هنيه 3


لكن التوفيق ماكان مع اللاعبين


خصوصا بدر المطوع


ضيع ثلاث فرص ماتضيع ، خصوصا الاخيرة


في اخر خمس دقايق من المبارة كانت وايد اسهل لو حطها فبطن ريله


لكنه لعبها بمشط ريله وراحت برا


وهذي مشكلة بدر الكبيرة ، لاعب متميز وجيد وفنان ومتحرك


لكنه يهدم كل هالميزات لما يضيع هالفرص السهلة
ولا كرة ميلادين اللى بالقائم والله حرام كان المفروض على الاقل غول واحد
واعتقد ان محمد إبراهيم كان المفروض يلعب ميلادين من البداية
بدل طلال العامر اللى كان مرتبك
وحتى فهد الانصاري ماكان جيد مو نفس مستواه في المباراة اللى بالكويت لو ملعب خلف السلامة ولا حمد العنزي من البداية
كان افضل




لكن عموماً ماقصروا


مهما كان يظل فريق القادسية فريق هواة


والفريق الياباني اوراوا ريد محترفين


والمنطق يقول ان نتيجة 2\0 طبيعية على ارض الفريق الثاني





مع انا كنا نتمناها صفرا


لكن خيرها بغيرها





ماعليه تعوضونها بالدوري إن شاءالله

رمضان قرب يخلص

رمضان قرب يخلص





والله ودي يظل على طول


لكن هذي الحياة لكل شي نهاية


واحنا قربنا من نهاية شهر من اجمل وارحم وافضل اشهر السنة





اهم شي سويته في رمضان إني عوضت قلة النوم في الفترة اللى قبل رمضان


والله كنت مانام الا شوي جم ساعة





الحين لا ،، الحين دوامي بعد الفطور يعني انام على راحتي ليما اشبع نوم


احس صج ارتحت وشكلي تعدل


صج قلة النوم تعفس الواحد وتخلي شكلة على طول تعبان





ثانياً هالايام اسهر على راحتي يعني عندي وقت اخذ راحتي في الفترة الدينية قبل وخلال وبعد صلاة الفجر


الحمدلله صار عندي وقت طوويل


:)





وطبعاً السهر بالديوانية مع الشباب ،، كل يوم نسوي مسابقات في لعبة المعلومات العامة


يعني اخوي عنده كتاب المعلومات اللى يحاط بحراسة مشددة علشان محد يغش


ههههه


وكل فريق مكون من شخصين نلعب ثلاث او اربع فرق


واحياناً إذا واحد زايد يصير مع اي فريق خصوصاً إذا كانت معلوماته ضحلة


:)





انا فريقي زميلنا العزيز بابل


وطبعاً دائماً الاول بكل جدارة


ههههههه





لا الصراحة دائماً نطلع الاخير


بس بفرق قليل جداً سؤال او سؤالين


بس مو دائماً طلعنا الثاني مرتين


طبعاً الاول مالنا امل لأن في فريق دائماً مسيطر على المركز الاول


بس مرة وحدة طلع الثالث


صراحة الاسئلة مو وايد صعبة بس الوقت قصير وماتقدر تفكر عدل


ثانياً أنا عن نفسي لايمكن اتذكر تاريخ حدي انسى ما اتذكر حتى لو حدث قريب


ما اتذكره


:\


وفي اسئلة مالي شغل فيها احسها اسئلة تبط الجبد


يعني مثل سؤال حده ضحكني


متى انضمت الصين الى الفيفا


انا قلت هذا السؤال مابي اعرفه وماراح اشير حتى خلينا مكانه فاضي


وفي اسئلة ثانية حلووة وتستفيد منها


مثل سؤال من اول شخص اكتشف امريكا وسميت على اسمه


انا استانست على هذا السؤال علشان حافظ اسمه من زمان


:)





وفي سؤال اعرفه يعني مو بس اعرفه الا متأكد منه امية بالامية


بس جوابته غلط مادري شلون تخربطت في الاسامي


كان ، من هو الشاعر الذي قالوا عنه إنه اشعر العرب ومن اسمائه الملك الضليل


هذا معروف أمرؤ القيس


انا كتبت قيس ابن الملوح شكو مادري


اختلط علي الاسم وللحين متحسف





صرحة وناسة ،، ونستفيد وااايد


يعني كل يوم قاعد نكتسب معلومات يديده بجميع المجالات


بس الاهم الحفظ والتذكر





منو يبي يلعب معانا حياكم


ابي واحد معلوماته غير طبيعية علشان ابي اطلع الاول


منو يقدر ؟؟





:)





**********


احيانا قبل الفطور اروح اتمشى على الممشى


وذاك اليوم لما كان الجو رطوبة


قلت خل اروح امشي


والله ياجماعة بقيت اموت


ما قدرت اتنفس احس خلاص نشفت


ماصدقت وصلت سيارتي


ويومها ما تفطرت اي شي صج ماكليت اي اكل


كله عصاير وفيمتو وسلطة فواكة بس ليما حسيت بطني يبي ينفجر


من السوائل





بس وناسة لو كل يوم جذي


يخلص رمضان الا نازل عشرين كيلو





إن شاءالله بعد رمضان راح اطبق رجيم قاسي ثاني مرة مع نادي صحي


علشان استعيد لياقتي


اللى راحت مع العيوش اللذيذة


شسوي والله احب العيش


وما اقاومه ،، ليش وزني بسرعة يزيد وبسرعة ينزل


ودي اكون بوزن ثابت شلووون





؟؟





*********


كلمة أخيرة





الدنيا ماتسوى لحظة حزن وحده


حبوا الناس وعيشوا بسعادة


الدنيا وايد احلى بالخير وبالحب


اتمنى لكم كل الفرح

سلامات

تعرض زميلنا العزيز السيد المدون المعتزل ترستن

إلى إصابة بليغة مساء الاول من امس خلال إحدى المباريات

( إللي مالها داعي )

وكانت اصابته عبارة عن كسر في مشط القدم ، حيث قال الدكتور المعالج انه يتوجب عليه الراحة التامة لمدة شهر كامل

دون مزاولة لأي نشاط رياضي

ونحن إذ نتمنى له السلامة والرجوع باسرع وقت لممارسة نشاطاته الرياضية

نقول

شعندك رايح تلعب باليل

مو لعبت قبل الفطور وخلصت ، حلاو يعني ولا شنو ؟

ودي اقولك تستاهل

بس حرام

يالله ماتشوف شر

***************

في رمضان الاجواء دائماً تكون حلوة

فيها سكينة وهدوء

أحس إني مرتاح ، حيل ونومي صاير تمام

الحمد لله

وطبعاً مايحتاي الأكل في رمضان ما لذ وطاب

شي واحد بس يشكلي هاجس اهو الخوف من الوزن الزايد

مو الواحد مع هالاكلات العجيبة مايقدر يسوي كنترول على نفسه

:)

************

اتمنى للجميع الرضا والإيمان

والاحساس بالقناعة والسعادة

والمشاركة

والله اهم شي المشاركة

الإنسان لازم يواصل صلة رحمه وربعة واصدقائه

الحياة وايد احلى واحنا حوالينا ناس يحبونا ونحبهم

خصوصاً في هالشهر الفضيل

اليمعة على الفطور مثلاً أو على السحور مع الاهل

او حتى الاصدقاء بجو جميل فيه الفه ومحبه

احساس من اجمل مايكون

أتمنى لكم جميعاً كل الحب

وتقبل الله طاعتكم