9/18/2007

مرت سنة


نفس هالوقت من السنة اللى فاتت بديت أكتب في هالمدونة يعني الحين صارلي سنه تقريباً



صراحة هالعالم هذا واايد مريح وفيه متنفس للواحد لأنه يقدر يعبر عن كل شي في نفسه من



خواطر وأفكار وهموم وحتى هوايات ،، أنا بالنسبة لي أهم شي حصلت علية من هالمدونة طبعاً



بالأضافة للتعبير عن النفس وممارسة هواية محببة هو معرفة أشخاص رائعيين ،، والله صج



عرفت ناس من خلال المدونات صج مميزين وأفتخر واايد إني عرفتهم سواء إللى تعرفت عليه



شخصياً أو من خلال المدونة وهالشي أبداً ما يفرق لأن في بعض المدونات أنا أحب أصحابها جداً



وانا أعني هالكلام ،، يمكن يكون صعب الحكم على شخص بس من خلال الكتابة لكن في ناس



الكتابة عنده مثل المرآة تعكس نفسيته وشخصيته ،، وهالناس اللى أعنيهم ،، وهذا الشي اعتبره



طبع شوي صعب لأني وايد أثأثر بكتاباتهم إذا كانو مستانسين أحس إني استانس لهم وإذا كان



مزاجهم مو على مايرام تصيبني نفس الحالة



يعني بإختصار شيء تفسيره صعب شوي لكنه بالمحصلة ممتع واايد



***********



تعودنا في شهر رمضان إنا نلعب كرة قبل الفطوور وطبعاً بما إني ممنوع من ممارسة



هوايتي المفضلة بسبب الأصابات الكثيرة أضطر آسفاً إني أقوم بدور المتفرج أو أكون حكم للمباراة



وإللى أبي أتكلم عنه ماله شغل بهالموضوع بس هذا مدخل فقط



يعني أمس تقريباً كنا رادين من الملعب وقت الأذان وكنا واقفين في الإشارة صراحة شفت منظر مضحك مبكي



الناس يطوفون الإشارة جنا مافي شي ،، يعني حتى أنا أستغربت لا تكون عطلانه أو فيها شي



شسالفة يعني أعرض حياة الناس للخطر علشان ألحق على الفطور ؟؟



الحمدلله الدنيا ماطارت ،، والله الهداوه والركاده زينه متى نحترم القانون يعني ونكون مثل الناس ؟؟



***********



شي ثاني



موضوع شوي يخص السيدات بس حدي متعقد منه



ذاك اليوم كنت رايح مع أهلي خياط السيدات وبالصدفة والله شفت الخياط قاعد ياخذ قياس حق بنت



البنت كبيرة وبنية يعني شكلها واايد محتشم وهذا الريال إللى اهو الخياط قاعد يقلب فيها ويقايس لها ياجماعه والله شي مخزي



آنا حسيت والله بالدماء تغلي في عروقي ،، ياجماعة هذا شي عادي يعني ولا شنو ؟؟



بي أحد يفسرلي ،،،



سألت أهلي قلت يعني شنو ،، قالوا لا مو كل الحريم إللى تبي وحدة تقايس لها ينادوون لها



يعني أنا أبي أفهم لما ريال يقيس حق بنية أو مرة هذا شي عادي ،، والله أنا أشوفه شي غير طبيعي



المفروض البنية أو المرة نفسها ماترضا تسوي هالشي ،،، شي يبط الجبدددددد


******



أخيراً


الله يتقبل منا صيامنا وقيامنا إن شاءالله ورمضان كريم

************

http://naif-almansi.blogspot.com/

مدونة مدرسة الحب

مدونة جديده مميزة جداً

52 comments:

5roofa said...

اهلن اهلن لوول وناسه انا اول احم احم
و اول من يبارك ياااااابختي
مبروووك مبروووووووووووك معني دشيت البلوقز متاخر بس اعترف انت من البلوقات الي استمتع في دخولها كل يوووم
ماننحرمش يارب

و امبي على الكره شلون تلعبون بهالحر و الخيسه و الله زين ما تسوي تقعد تجابلهم ما يعطشون يتعبون لووول
اهم شي اني احاتيهم
:P

السرعه و الي يطوفون الاشاره اسمحلي ناس ماتفهم ياربي مادري لي متى يبون يموتون بعمرهم
والله كل يوم و الثاني احد ميت بحادث الله يكافينا شره و يحفظ الديره و عيالها ياارب

تدري انك موتني من الضحك على الخيااط
لووووووووول وييع ماكو شغل ياخذ مقاسي
تره اهو صج في ناس عادي عندها بس في ناس ما توافق
و الي توافق تشوف عادي عندها كل شي بحكم انه هذي شغلته و مو قاعد يسوي شي بس ياربي الشيطان ما مات
و مهما يكون اهو بني ادم انا شدراني اهو شيفكر في ولا شنو نيته لوول ولا انت شرايك

الموضوع وااااو كالعاده

:D

YESLAMOOO

slamz friend....

78o8eYa said...

كل عام والمدونة بألف خير
بمزيد من التألق
و الكثير من الحب المنثور في جميع أركانها

هُنا نتلمس مشاعر نادرة واحساس عالي
قلب شفاف
جمعتنا به نبضات صادقة ، بمختلف تقلباته وحالاته

كل ما يمر عليه من تغيرات نتعايشها معه لأنه يعايشها معنا

ذكرت عبارة
"في ناس الكتابة عندهم مثل المرآة ، تعكس نفسيتهم وشخصيتهم "

بالفعل
انت خير مثال
^_^

نشكر
Blogger
لأنه أتاح لنا فرصة التعرف على انسان بكل ما تحمله هذه الكلمة من معنى

ومتأكدة ان أصحاب المدونات اللي تحبها، يبادلونك نفس الاحساس ويمكن أكثر

ربي يعطيك أحسن من كل ما تتمنى
لأنك تستاهل الطيب كله

^_^


-=-=-=-

سلامتك من الاصابات
ما عليك إلا العافيه إن شاء الله

وبالفعل الناس قبل الفطور بدقايق ما تشوف غير طاولة الأكل

الركاده و الهداوه ، هذيلي بس نسمع فيهم
ما نشوفهم

الله الهادي
و
الحافظ

وديرو بالكم منهم
جنك حاس إن فيني تحلطم على الأوادم بالشارع في رمضان
الصراحه شي يقهر
..
:/

-=-=-=-

موضوع
ما أدري شلون أوصفه
..
..
خلني أقولك شغله
نظرة الريال غير عن نظرة المرا

هذا على جميع المستويات

ومن ضمنهم
هالموضوع

يعني الحريم ما يفكرون بنفس طريقة تفكير الرياييل

مثلاً
أعرف خياط من يوم كنت صغيره
نص العايله تخيط عنده
خياط مسلم ، محترم و كبر أبوي
ونظرته نظيفه

قاعد يسوي شغله بكل أدب

شـ اللي يمنع ؟
..

طبعاً هذا ما يمنع إن الواحد يآخذ معاه هدوم قياسها مضبوط بدال لا يقايس عليك
أو يخلي وحده تشتغل بالمحل تقيسلك

بس لو كان ماكو حرمه تقيس
وناسي اتييب قياس عدل
أو ما عندك من الأساس

في ناس ما يشوفون فيها شي
..

واسم الله عليك من التعقد و بطة الجبد
ألزم ما عليك أهلك
:)

-=-=-=-

ربي يتقبل منا ومنكم صالح الأعمال إن شاء الله

والله أكرم

^_*



كل اللي بخاطري طلعته بهالكومنت
يعني ياالله بعد العيد بإسبوعين تقرالي كومنت ثاني
;Pp~

TReSTeN said...

اقووول حجي

لازم كنت تذكر نقطة مهمة جدا جدا

اننا فرؤيقنا يوميا نتلاااعب بهم كما يتلااعب النمر بالدجااجة

هههههههههههههههه

مساكيين ست اياام متتالية ماعرفوا طعم الفوز

ههههههههههه

والاكثر من ذلك انهم من اربع سنوات

على هالحااال

اتمنى انك تذكر الحقااايق

ثانكس

Shaima'a Alkandari said...

تمر الايام لتكون الشهور التي نراها بالاخير سنين تمضى من حياتنا
بلاشك لحظات جميله عشتها سواء بالخارج او من خلال هذه الشبكه التي ربطتنا جميعا بعالم البلوق قد نكون اقرباء وقد نكون اصدقاء ولكننا نجهل الامر برمته احيانا

جميل ان ترتبط روحانيا وعقليا مع اناس تتواصل ويتواصلون معك بنفس الوقت خلف هذه الشاشه

نعم سنحت لك ولنا الفرص لنعبر عن كل مايجول بخاطرنا ان نكتب دونما توقف وبالمقابل ترى اناس يتابعونك ليقرؤوا كل ماتخطه اناملك على الاحرف

اتمنى ان تمر السنين وانت معنا ونحن معك بكل لحظه من لحظاتك

اجعل القلم مفتوح واكتب كل ماباعماقك كي نبحر معك

:::

سلامات وماتشوف شر والكره لعبه حلوه لكنها خطيره بنفس الوقت والسبب الاصابات التي تحل بالكاحل والرباط الصليبي وغيره
الله يعينك على التحكيم والتفرج بس حلو ان هالهوايه ماتنمحي مره وحده يعنى في بديل مشابه للعب

فعلا استغرب من هالفئه من الناس المستعجعلين وكان الاكل والشرب بيخلص من منازلهم خفف السرعه فبالسرعه الندامه
دست خففت بتوصل البيت بتوصل
الله يعينهم ويرشدهم لصوابهم

:::

فعلا هذا ما نلاحظه ان بعض النساء يسمحون للرجال باخذ مقاساتهم على اساس انه اضمن وافضل من المرأه باخذ المقاسات والخياطه

عن نفسي الخياط ابتعد عنه فقط بالمناسبات اروح حق مصممين واللى تاخذ القياسات مرأه
لانى لا اسمح لنفسي بان يلمسني رجل بحجه المقاسات

:::

جعل الله صيامنا مقبول باذن الله

وكل عام وانت بخير بمناسبه العام الاول بعالم البلوق

Najmah said...

أول شي كل عام وانت بخير
وعسى ربي يوفقك بكل خطوة للخير

وسلامات ماتشوف شر ان شاءالله

فعلا الناس ماقام يهمها الا نفسها وبس
وكل من يسوي اللي براسه

الله يعين


بالنسبة حق الموضوع الثاني

قبل فترة كنت بالسوق بأحد المحلات ولا وحدة طويلة وعريضة ماشاء الله

ولابسة عباة ومتنقبة وواقفة والريال يقيسها

انا انصعقت !! صج قلبي عورني

وين الحيا راح

الله يهدييهم

Shather said...

1.كل عام و انت و المدونه بخير و ينعاد عليكم بهالسنه و كل سنه :}

2.نفس الشي كنت اضحك عليه اول يوم من الشهر .. اقول بقلبي يعني شهر رمضان شهر الصبر .. و الناس مطايير ما فيهم ذره صبر !!:P

3.سالفه الخياط .. لا مو شي عادي .. و اتمنى ان يبدلون البياعين في المحلات الى بياعات =\ .. لانه مو حلوه تدش محل ملابس نسائيه و الريال ايي يقولي "بساعدك بشي ؟" "هيدا مقاسك" :|


و مادري هذا رايي :\

PearL said...

كل عام وانت ومدونتك بخير

بصراحة مدونتك من اوائل المدونات اللي ازورها

قريبة الى قلبي جدا

ومن المدونات اللي يضيق خلقي لما ادخل وما اشوف فيها شي يديد



كل عام ومدونتك بخير مرة ثانية

PearL said...
This comment has been removed by the author.
Shaima'a Alkandari said...

يسعدنا ان نرحب بها بهذه القافله البلوقيه

ومايرد الكريم الا اللئيم وكرم الضيافه موجود لي الحين

sologa-bologa said...

كل عام وانت بألف خير
والمدونة الجميلة بخير
والى مزيد من الابداع المتواصل

وصحيح معرفة بعض الناس اغلى من الذهب
مثلك وشرواك
ايها العاشق الجميل
:)

هذا اللقب اللي استانس اناديك فيه
لأن كلماتك تعبق منها الرومانسية


ودمتم بحب وود

بـابـل said...

صباح الخير/حسين


مدونتك حيل حلوة

وأنا أحسها نيجاتيف روح حسين اللي

أعرفه عدل


مرور أول بمغارة أحاسيسك السحرية


ولي عودة



وبس




بـابـل

7osen said...

:خروفا

أهلا وسهلا

شلونج وكيف حالج

يسعدني وايد إن مدونتي عاجبتج


أي والله بهالحر والخيسة هههه
نلعب وناسة


اما موضوع الخياط أنا رأيي نفس رايج وييع

صراحة خووووش تعبير

:))

مشكورة واايد خروفا
تحياتي لج

7osen said...

: حقوقيه

ياهلا ومرحبتين كباااار

صراحة البلوق نور لما شاف اسمج

أنا سعيد لأنج علقتي عندي

وراح انطر تعليقج الثاني بعد العيد ههههه


أولاً مشكورة على كلامج الحلوو إللى أسعدني كثيراً

أهم شي التحلطم على الأوادم بالشارع


أما الموضوع الأخير أنا أختلف معاج

لأن أهم شي مسألة المبدأ

صح ؟


أخيراً

أشكرج على هالمرور الحلو

دمتي بكل الخير عزيزتي

7osen said...

:ترستن

أهلا

أيي تصدق صارلهم أربع سنين مو قادرين يفوزون مساكيييين

لازم يستعينون بلاعبين محترفين

هههههه

7osen said...

:شيماء

أهلا وسهلا أختي العزيزة

أولا أشكرج على كلامج المميز

وبصراحة أنا ودي أقولج إن أسلوبج بالكتابة والتعليق يعجبني وااايد

شكراً لج على التواجد المستمر والتواصل الجميل

أنا معاج بالموضوع الأخير

تسلمين على هالكلام الحلو


تحياتي لج

7osen said...

:نجمه

اهلا وسهلا

وانتي بخير

مشكورة عزيزتي واايد على هالكلام

والشر ما اييج

:

والله أنا نفسج لما شفت منظر الريال وأهو يقيس

صج شي وااايد يبط الجبد


مشكورة وااايد على مرورج وتعليقج

تحياتي لج

7osen said...

: شذر

أهلا شذر

شلونج

وانتي بخير

مشكورة عزيزتي


والله أنا أتفق معاج بالنسبة للبياعين

بس يمكن تكون صعبة شويه

تحياتي لج وحياج الله

7osen said...

: بيرل

أهلا ومرحبا

وانتي بخير

مشكورة جداً على كلامج

الصراحة شي يسعدني جداً جداً

إن اللى أكتبه يعجبج

فعلاً يسعدني لإنج إنسانة مميزة


شكراً لج أختي العزيزة

تحياتي القلبية

7osen said...

:سلوقا بلوقا

يامرحبا واهلا وسهلا

وانت بكل الخير عزيزي

أي والله مثل ماقلت معرفة بعض الناس صج مثل الكنز

وانا يسعدني ويشرفني واايد إني عرفت شخص مثلك


وانا بعد أحب هالأسم

:))

تحياتي لك

نورت البلوق

7osen said...

: بابل

أهلا وسهلا

شكرا لك عزيزي على هالكلام

وأتمنالك كل التوفيق والإبداع

تحياتي

TReSTeN said...

اقووول

حبيت اضييف شغلة بسييطة

في نااس قااعدة تقوول ان خياط مسلم وكبر ابوي قااعد يقااس علي

هههههههههههههههههههههه

ثم ههههههههههههههههههههههههه

ثم
هههههههههههههههههههههه

ثم
هههههههههههههههههههههههههه

شالحجي وين قاعديين احنا وين الدين

وين اي شي ثااني

يامعود انا وقف شعر راسي من هالحجي

وين قاعديين احنا

شكوووووووو

شكووووووووووو

يمكن بااجر حتى انا اصير بكير اخوانهم

والله حاله

ورمضان كريم

ورنا اكبر

والله الساتر

esTeKaNa said...

تكتب بشفافيه ممتعه
لك احساس راقي
وكلمات عفويتها تجذبني للقراءه حتى اخر رمق
اعترف
بأني استمتع بمرورك في مدونتي
واستمتع اكثر برجوعي لمدونتك بين حين وآخر،أقرأ احساسك
وافكارك
وملاحظاتك
:)
سنه جميله بوجودك
اتمنى لك الاستمرار
وطول العمر لك ولمدونتك
حسين....
هناك من يفتقد عقله قبل الفطور بدقائق
شي يخوف ويضحك صراحة
:)
ملاحظتك عين العقل
احيانا الاعتياد يقتل الاحساس
هناك من يعتقد ان الخياط شخص استثنائي
غير محسوب على معشر الرجال الذي يجب التستسر عنهم
!!
اكره هذا المشهد
عادي عندي امي تقايس علي
وعشان جذي دايما ملابسي قياساتها غلط ويبيلها تصليح
:))

7osen said...

:ترستن

تدري انت شنو العيب الرئيسي اللى فيك

اهو أندفاعك

شوي شوي

ترا كل واحد حر برايه وبأفكارة

أحنا مانقدر نفرض قناعاتنا او راينا على الكل

فانا اقولك هدي أعصابك وأوعى تتهور

:)))

اليوم منو فاز ؟؟

7osen said...

:إستكانة

ياهلا ومرحبتين بأختي العزيزة إستكانه

صراحة أسعدني كلامج واايد

وأنا بعد أجد في مدونتج متعة كبيرة جداً وصدق وشفافية من نوع نادر جداً

:

عجبني تعليقج على موضوع الخياط
أيي والله يا إستكانه هذا ريال مهما كان ماصير يقايس حق البنات والحريم

:

شكرا لج عزيزتي على تعليقج وشعورج الطيب

تحياتي لج

Nora said...

ما شالله سنة
!
اخوي حسين سنة كاملة ما طوفت لك بوست
و لا مر علي بوست مرور الكلام
:)

اول ما بديت اتابعك حسيت في شي غير
لما شفت وصفك لنفسك
انسان بمعنى الكلمة

قلت اييييييييييييييه بالضبط
:)))

تأكد انك تكتب ما عجز الرجال عن البوح به .. اذا انسان بمعنى الكلمة و منتهى الشجاعة

الحقيقة الوحيد اللي يعجز كلماتي عن التعليق ... لان كل التعابير تدخلنا في عالم حااالم شفاف
.
.
من و احنا كبر النملة ..نروح نخيط هدوم المدرسة و القرقيعان و اي بطيخ

مااااا كااااااان في مجال ياخذ قياساتنا
@@

شلون لما كبرنا
!

يا اللي معاي تقايس لي او اكون يايبه معاي مقاس مضبوط اماااا هاللي صار فااا مهزلللللللللة
.
.
كل عام و تحت الصفر نابضة بروح حسين و انسانيته
:))

78o8eYa said...

أؤمن بحرية الرأي
وبأن الاختلاف بالرأي لا يفسد للود قضية

لكن متى ماكان الود معدوم
فـ
كل شي مسموح
..
من الشجاعة انك تذكر اسم الشخص الموجه له التعليق

وبناءاً على هـ المبدأ أقول

يا
Tresten

ترا الحشيمة مو لك
للطيب راعي المكان

الله يستر علينا وعليك إن شاء الله
:)

7osen said...

:أحلى إنج

اهليين ومرحبتين

صراحة أخجلتيني بكلماتج المعبرة

ما يسعني إللي إني أقولج مشكورة

كلماتج هذي تعني لي الكثير

لأنها من مهندسة الكلام

لأن فعلا كلماتج إنتي فيها هندسة مو أي واحد يفهمها

شكرا لج جزيلا

:

زين تسوين

وهذا برأيي إللى المفروض يصير

شكرا لأن رأيج بهالموضوع نفس رأيي

:))

7osen said...

: حقوقيه

أنا أايدج إن الواحد المفروض تكون عنده الشجاعه بذكر اسم الشخص اللي يوجهله الكلام


وأنا أسف إذا في كلمة ضايقتج

ومسحيها بويهي

ترا أحنا مانقدر على زعلج

:)))

تحياتي لج عزيزتي

TReSTeN said...

78o8eYa

اقووول


اول شي انا اقدر احاجييج بسمج بمنتهى السهولة واعتقد

انتي تعرفيين هالشي

ثانيا انا تكلمت بشكل عام لان اي شخص عنده نفس افكارج ابييه يعرف رايي فييه

وثانيا

تتحجيين عن الحشيمة ليش يعني بتقولين شي

خارج عن المؤلووف

كييفج

وثالثا

انا ردييت علييج بهالاسلووب

لان كلامج خارج عن الدين والعقل والمنطق

واتوقع ان الانساان الي يتكلم خارج عن هالاطر الثلاث

مافي مجال للنقاش معاه

لانه مافي اي اسااس للنقاش

وعلى فكرة اذا بتقولين اي شي ردي اتمنى اعرف راايج


وبالنسبة للحشيمة

ماعرف شنو تقصديين فيها

وحيااج

7osen said...

:ترستن

أقول يا أخ ترستن

بسك هواش

إنت ماتمل ؟؟

:)

charisma said...

صباح الخيير
حسيين الغالى كل عام والمدونه وصاحبها بالف الف خير وصحه وعاافيه يا رب
والله لا يحرمنا من وجودك وحسك
ورومانسيتك الى نستمتع بقرائتها
انت من المدونين المتميزين والقريبيين
الله يحفظك

سلامات على الاصابات ههههه
هم متفرج احسن من ولا شى
;p

حسين
والله خرعتنى امس انا فى يمعة بنات اسولف عن موضوع الخياط النسائى
لووووووووووول

خياط المنطقه الى متعوده تروح له بنت خالتى صار دين
التزم وحط لحيه فجأه
لوووول واهو متعود يقيس حق بنت بنت خالتى يعنى بالمتوسطه صغيره
بس ماشااءالله شبابها حلو طويله
المهم هاا شوكت قيس لها حق يونيفورم المدرسه
جاان يقوول لالالا ماما انا ما يقييس
ايييي ليش يا شوكت
جان يقول ما يصير ماما مريوم الحين كبير
ما يجووز حرام
هههههههههه

يحليله
ذكرتنى بالسالفه
:)

سووورى على الهذره اليوم ما ادرى شفينى فازعه من صباح الله خير
:/
فينى طاقه كلالاميه بس محد حواليى طلعت عندك

7osen said...

: كاريزما

ياهلا ويامرحبا بالعزيزة الغالية

شكرا لج على هالحجي الحلو

تسلمين يالغالية وماتقصرين

كلامج أسعدني جداً


والله يسلمج من كل شر

:

تصدقين زيين يسوي شوكت المفروض جذي

بس مادري ليش دائماً الخياطين أسمهم شوكت

شنو السبب ؟؟

ههههههه


تحياتي لكاريزما العزيزه

أسعدني مرورج العطر

وأحلى طاقة كلاميه

:))
أتمنالج كل التوفيق

Purplecious said...

و الله الايام تركض يا حسين

كل عام و مدونتك بخير مع ان في جزء مفقود من هذه المدونه الرائعة
هههههههههههههههه
تذكر حسين
أنا أذكر عدل لأني اخترعت من هالسالفه كنت توني ما فتحت بلوق بس أعلق و تفاجأت أن أكثر من مدون بتلك الفترة مسحوا بلوقاتهم

بس بالنهايه كل واحد حر ببلوقه
هذه مساحته الخاصه يسوي فيها اللي يبي
:))

و بلوقك يا حسين من المدونات الغريبه
ما كنت أفهم كل شي
و كنت أتأثر وايد و تكسر خاطري لووول
مادري شلون أشرحلك بس لو أحط نفسي مكانك و أحس بهالمشاعر و الاحاسيس أتوقع أني راح أموت ههههههه
فيضان مشاعر مشاءالله
بس بعدين تعودت و فهمت المبالغه و التعبير و التشبيه
:))))

الى الامام دائما يا حسين و سلامات ما تشوف شر


بالنسبه حق موضوع الخياط ضحكتني لأني قبل جم يوم سمعت وحده بالراديو تتكلم عن نفس الموضوع أتوقع عايشه اليحيى اذا ماني غلطانه
تقووول هذا الاهل الله يهداهم شلوووون ما يعلمون بناتهم ان ما يصير هالشي

و بيني و بينك احنا البنات تفكيرنا مو مثل الريال عبالهم هذا شغله جذي
هني لازم الام او الاهل يمنعون بناتهم من هالشي اذا كبروا و يفهمونهم

كل عام و انت بخير مرة ثانيه و الى الامام دائما
:)

7osen said...

:Purplecious

أهلا وسهلا

وأنتي بخير عزيزتي

ليش ذكرتيني

تصدقين للحين نادم في مواضيع وااايد من اللى قبل مو عندي

حسافة كانت لحظة مجنونه

هههههههههه

بس أتذكر الموقف اللى مسحتها على شانه وابتسم

:))

عجبتني كلمتج

لو أحط نفسي مكانك و أحس بهالمشاعر و الاحاسيس أتوقع أني راح أموت

أنا سعيد بهالكلمة لإني حسيت بكل هالمشاعر وما مت

يعني أنا قوي

هههههههه


الشر ما أييج تسلمين وما قصرتي

أيي والله على قولتج لازم الأهل أهما إللى يمنعون بناتهم من هالشي


بس صراحة شغله وااايد تقهر وتخلي الواحد يعصب

:

شكراً لج يا بنفسج على هالتعليق الحلو

تحياتي لج

وأتمنالج كل التوفيق والسعادة

2 u ALL said...

مبروك عليك السنه الأولى في التدوين ..!! وكل عام وأنت بخير ..!!؟

المرأه تخيط ملابسها عند خياط "رجل" ..!! ماهو الخطء في هذه العباره ..؟؟

المفروض أن "الخياطه" تكون مهنه "نسائيه" لأنها أكثر موائمة وملائمه للمرأه منها الرجل ..!!؟

وصح كلامك مو حلو ولا مقبول ذوقاً قياشس الرجل للمرأه..!! ولايجوز شرعاً قياس الرجل للمرأه و لا يجوز لمس جسدها بأي حجة كانت ..!!؟

جنون إحساس said...

مبروووك السنة الأولى لك
وان شالله نقرالك بوست السنة الياية بعد :)


--

اي والله شنو هذا خياط يقايس للبنت
وين غيرة الأهل وين الحيا؟
ان لم تستحي بعد شنقول

ياربي تستر على بناتنا

ReLaaaX said...

كل عام وكتاباتك برقي وتميز
ويتربى البلوق بعزك ;p

--

الشفاحة والمشاخط اللهم ياكافي هالشي يخليني اخلي طلعاتي يا الصبح او عقب الفطور .. بس العصر مش ممكن لا وبعد قبل الفطووور !؟ موبايعة عمري

--

الخياط استغفرالله ياربي والله ينرفزني هالشي .. وعلى قولتك استغرب منهم شلون يرضووون !؟
على بو هندي !؟
زين هندي مو اجنبي وغريب عليج !؟



يعني مهي خسرانه شي تودي دراعه والا نفنوف قياسها واذا مالقت مره تقيس تعطيها اياه واتقوله اخذ قياسات الدراعة !!!!؟

ماقول غير الله يهديهم ويصلحهم

magnoonah said...

كل عام والمدونه وصاحبها بالف خير

والله يوفقك ان شاء الله ومنها للاعلى لانك فعلا تستاهل كل خير

وشنو بقول لو مهما امدح او اقول شوي بحقك يعني بمدح اخوي راح تكون شهادتي فيك مجروحه

حسون ما شاء الله شفافيه بالتعبير وبساطه عجيبه وصدق بالكلمات يخليها توصل بسرعه واخلاق واسلوب راقي


هذا رايي على الاقل بس اتوقع غيري بيقول اكثر وانت تستاهل


سلامتك من الاصابات وما تشوف شر يبى رمضان مشي هروله مو كره

اما مسالة السيارات الي تطوف
الله الهادي
وخياط الحريم
كل وحده مسؤوله جدام ربها لو حاسبها يوم الحساب يعني هذا ريال واجنبي وكلن عقله براسه
دمت بود
:)

SHAHAD said...

مرحبا حسين / شخباارك ؟

كل عام ومدونتك بخير
وكل عام وإنت موجود معانا يارب
أعتقد تعرف رايي بمدونتك
بصراحة لا يعلى عليها
ومن أول المدونات اللي أفتحها أول ما أشبك وأحرص إني أتابعها وأشارك فيها

.
.

وما تشوف شر أخوي
أموت وأعرف شتحبون بالكرة؟

وبالنسبة للي يطوف الإشارة
مرة شوف عيني واحد طاف إشارة تقاطع
ومن كثر ما هو مسرع
دخل بالسايد اللي السيارات واقفين لأن إشارتهم حمرا
يمما كان حادث يخرع بشكل مو طبيعي
يعني شذنب هالناس اللي واقفين ؟؟
الله يهديهم يارب

.
.

وأما الخياط
وايد بنات عادي عندهم
مادري شلون يرضون ريال غريب يقعد يقيس لهم ويلمسهم !
المفروض ياخذون قياس مضبوط معاهم
حتى لو ما عندهم يطلبون مرة تقيس لهم أفضل من ريال

.
.
بوست ممتع حسين ، تسلم

7osen said...

:2 u ALL

أهلا وسهلا

وإنت بخير أخوي حياك الله

والله كلامج صحيح

مايجوز شرعاً

وهذا الشي كافي

بس في ناس للأسف إنها ماخذه الموضوع بحسن نيه

تحياتي لك أخوي

ومشكور على المرور والتواصل

7osen said...

:جنون احساس

مرحبا

الله يبارك فيج عزيزتي

شكرا لج على هالكلام


وعلى قولتج الله يستر على بنات الناس


شكرا لج على المرور

أتمنالج التوفيق
وعمرة مقبولة إن شاءالله

7osen said...

: ريلاكس

أهلا وسهلا

مشكورة عزيزتي على الأطراء

ويعطيج العافيه

:
والله زين تسوين
لأن الناس قبل الفطور تفقد عقلها

والله أنا امس بس ياي بطوف الإشارة قبل الفطور بشوي

ويمكن ثلاث أو اربع سيارات طافو

والله شي عجيييب

:

أي والله تاخذ لها قياس وخلاص بعد ليش جذي

ذكرتيني بسالفه على موضوع الهندي

قبل في وحده كانت بتطلع برا مادري بدون شي على راسها مادري شنو المهم
قالو لها في ريال برا
قصدهم السايق

جان تقول وينه مافي احد

قالو لها هذا

جان تقول هذا هندي مو ريال

من صجها

ههههههههه

:

يعطيج العافيه عزيزتي

ودمتي بكل الخير

7osen said...

:مجنونه

يا هلا ومرحبا

اهلا باختي العزيزة شلونج

وانتي بخير إن شاءالله

الله يسلمج وااايد علي هالحجي

والله خجلتيني

مشكورة ويعطيج العافيه

تستاهلين الطيب

:

الشر ما اييج إن شاءالله

إي والله الهروله حلوة

بس شنسوي نحب الكرة

:

على قولتج كلمن عقله براسي

كافي ريال واجنبي ؟

الله يستر على الجميع
:

أقول مجنونه شخبار رمضان معاج

شلون الحلويات ؟

:))

7osen said...

:شهد

أهلا وسهلا شهوده
الله يسلمج الحمد بخير عساج بخير

وإنتي بخير إنشاءالله

مشكور على هالكلام أسعدتيني صراحة

مشكورة وااايد

:

الشر ما اييج عزيزتي
تصدقين إحنا ما نقدر نعيش بدون كرة
ههههه

:

صراحة موقف صعب ومنظر حده مؤلم

والله مادري شلون يطوفون الإشارة

شي ما تلقاله تعليق مناسب

الله يستر على الأوادم

:


إي والله قياس احسن شي

لأن هالشي فعلا فعلا يبط الجبد

:

مشكورة شهوده على المرور والتواصل الحلو

أتمنالج كل الخير والسعادة

Fai$aL *_^ said...

اول شي سالفة الاشاره هذي تصير بالناس المطفوقه تبي تلحق على كل شي وما تبي تأخر واهي سبب التأخير .. وشنو صار يعني اذا تأخروا رب ساعه !!

خو كله بطن وبينترس :)

بس حرام يسوون جذي ..كافي الحوادث الي بالديره.. هوا احنا نائصين !؟

وسالفة الخياط .. ما قول الا الله يهدي
بعض الحريم والبنات.. ويصلحهم لانهم غافلات ومايدرون انه غلط وفتنه

==============================

يا عساك ادوم بتألقك وكتاباتك الجميله الراااائعه الي انا مستانس معاها وفيها :)

و عئباااااااااال المليون سنه

والله يوفقك ويعطييك على قد نيتك


*GO Go *7osen

دمت كما تحب :)

7osen said...

:ANgEL_BaBY

ياهلا ومرحبا في صديقي العزيز

شلونك

أي والله الناس المطافيق

عجبتني هالكلمة بمحلها
:))

وعلى قولتك بطن وبينترس على شنو مستعيلين


ومشكور عزيزي على كلماتك المميزة وعلى إطرائك

بس مليون سنة مو (جنه ) وايد

هههههه

يعطيك العافيه

ومشكور على المرور الحلو

kuwaitya_7saweya said...

كل عام وانته ومدونتك بخير يارب
وماعلافت هالناس المميزين الا لأنك مميز ورائع
-------------
حرام شذنب اللي متقيد بالقواعد المروريه لو يصير في شي
والله حرام
وانشالله تطيب من هالاصابات وترد تلعب معاهم
وماتشوف شر
------------
لالالا الخياط شخص غريب لازم ما يلمس امراه غريبه
انا الخياط اللي اتعامل معاه
لازم اوديله قياس شغله قديمه
او اذا في احد معاي امي او خواتي اهم يقايسوون
------------------
والله يتقبل صيامنا وعساك من عواده

kuwaitya_7saweya said...
This comment has been removed by the author.
7osen said...

:kuwaitya_7saweya

أهلا وسهلا

مشكورة أختي العزيزة على كلماتج

وإنت بخير إنشاءالله

وعلى قولتج شذنب الناس اللى ملتزمه

بس شنسوي الشين يخرب على الزين


الشر ماييج مشكورة


تحياتي لج
ومشكورة على المرور

اتمنالج كل التوفيق

(روح) said...

السلام عليكم ورحمة الله وبركاته..


اول شي...

مبارك عليك الشهر
وجعلك الله من المقبولين..


ثاني شي


كلامك عن التدوين
والمدونين

كثييييير ريحني

لأني فعلا احس ولو انه عالم
افتراضي
مايجمع بين الناس
الا اسلاك
وقطع الكترونية

لكن انا اجزم
إنه في خيوط شفافة
من الحب,,الوصل
الاحترام
السؤال


واكيد اكثر من اللي قلته

فعلا شي مريح

ويترك اثر طيب بين الناس..


...

عندنا حركة ماادري اذا هي موجودة
بالكويت


مشروع (فله مثل أجره)
تقريبا من سنتين ثلاث

شباب صغار يوقفون عند الاشارات

ومعاهم علب تمر/لبن/ماي
يوزعونه قبل الاذان بدقايق

وفعلا خفت الحوادث عندنا في هذا الوقت

ولو ان ربي سلمنا قبل 3 ايام :)


..


الشي الثالث

انا احتريت مثلك او اكثر

طبعا هالشي مو عادي

وقليل للأسف في هالوقت
من يغار على نفسه

قبل لايغار على اهله من المنكر


ربي يهدينا واياهم :(


أخيرا ودائما..
ربي يتقبل منك اعمالك في رمضان وغيره

وانزلنا واياك الدرجات العلى



نراك على خير :)


-اعذر قصوري-

(روح) said...

نسيت اقول لك
كل عام
وانت
ومدونتك بخير
دائما :)

7osen said...

: روح

أهليين وسهليين

كيف حالج عزيزتي

علينا وعليج ايتبارك
والله يتقبل منا إن شاءالله

كلامج صحيح

أنا بعد أحس إن في تواصل روحي شفاف بين المدونين
يحمل كل الإحترام والتقدير

:
لا الصراحه ما عندنا هالشي

وحقيقة فكرة واايد حلوة

إن شاءيكون عندنا نفس هالشي

:))

إي والله شي يقهر والله يهدي الجميع إن شاءالله

:

مشكورة عزيزتي وايد على هالتواجد وهالتعليق

وما من قصور إن شاءالله

وإنتي بخير وصحة

والله يقبل صيامنا وقيامنا أجمعين بإذن الله

ودمتي بكل الصحه والعافيه