3/02/2008

موقف وتعليق

أمس صارلي موقف غريب وطريف نفس الوقت

باليل كنت رايح أتمشى على البحر أمارس الرياضة إللى صارلي فترة قصيرة منقطع عنها

وطبعاً مادري ليش إنقطعت ، فجأة حسيت إني تعبان وماعندي رغبة
لممارسة أي نوع من الإجهاد لا العضلي ولا العصبي

المهم

كنت مندمج كالعادة أمشي بسرعة وخيالي يركض بسرعة كبيرة
ورا الأفكار والخواطر المتلاحقة ، خصوصاً بالأجواء الجميلة إللى كانت أمس

وبينما كنت ماشي كانت جدامي بنت قاعدة تتكلم بالتليفون
على يميني انا كنت شايفها واقفة وانا مقبل صوبها
وقبل لا أوصل عندها بمسافة قصيرة

شفت حشرة صغيرة طايرة أعتقد كانت فراشة
البنت كانت مو منتبها ولا الفرشة هذي وين تحط على إيد البنت إللى ماسكه فيها التليفون

جان تصرخ البنت صرخة مدوية مع حركة سريعة لا إراديه

ومع حركة إيدها طار منها التليفون ويا علي
وزين إني كنت منتبه جان أمد إيدي مع نطه صغيرة ومسكته قبل لا يطيح

والمضحك أكثر بالموقف
إني لما مسكت التليفون كانت وحدة قاعد تتكلم وتصارخ تقول ألو شفيج

:)

والله ضحكت ورحت عطيتها إياه
طبعاً كانت مستحية حيييل وأشكرتني وأهي منقص ويها

كان موقف صج غريب

:)


********************

الفترة إللي طافت كنت متابع مدونات كثيرة تتكلم عن الأحداث
إللى صارت أخيراً

أنا ما أحب أتكلم في هالمكان في أمور سياسية أو دينيه
وطبعاً هالشي مو معناه إني مو متابع بالعكس
أنا متابع جيد لجميع الأحداث

وإللى لفت نظري نوعية من الناس تأيد أي شخص تعلق عنده
يعني أي طرف يكتب شي يقولوله والله كلامك صحيح
ولو طرف ثاني كتب شي نفس التعليق تحصلة موجود

طبعاً كل شخص حر بتصرفاته وأفكاره
لكن هالنوعية صراحة أنا واايد أتنرفز منها
يعني أصعب شي على الإنسان لما يكون بلا هدف وبلا أتجاه واضح


يعني صراحة أنا كنت جداً متأثر من الكلام إللي إنقال
ومن الأشياء إللى صارت

لكن دائماً وفي مواقف وأحداث حقيقية تنكشف جميع النفوس
ويبين الإنسان على حقيقتة


قالوا قديماً

عش رجباً ترى عجباً

********
كلمة أخيرة

بالحب والصدق وحدهما تتقدم الحياة

34 comments:

sologa-bologa said...

صدقت
بالحب والصدق وحدهما تتقدم الحياة


أما سالفة التلفون الطاير بالهوا
تخيلت الحركة بالبطئ
تصدق خوش حركة
سينمائية جدا
:))



ودمت بحب وود
ولقاء مرتقب
أدري ودك تطقني على سالفة اللقاء المرتقب

عيون الحب said...

هههههههه حلوة طرت وخذت الموبايل
الموقف صدق يفشل

اما عن الناس هذول إمعه
معاهم معاهم ,, عليهم عليهم

=)

esTeKaNa said...

يا مسا الحب والصدق يا حسين
:)
شجعني امشي
كل يوم اقول باجر
ومادري متى ايي باجر
!!
اما صاحبة اتليفون الطاير
فصج
صج
صج
ههههههههههههههه
مادري ليش تخيلتها انا
لاني جبانه واعترف بذلك
:Pp~
بس صرحة طلعت خووووش قولجي
يعني اسم الله عليك قدرت تمسكه
واللي تضحك اكثر...اللي تصارخ بالتليفون
جان رديت عليها
:)))


انا اشاركك وجه نظرك بالنسبه حق الناس الإمعه،الناس اللي وين رايحين وياكم
ومع الخيل يا شقرا


الله يحفظ ديرتنا ويقيها شر الفتنه
اعتقد ان على الجميع محاسبة نفسهم قبل النطق باي كلمه واتباع مبدأ قل خيرا او اصمت


دمت بنشاط وحب
:)

الزين said...

ههههههههههههه

كانت مدونتك استراحة نص اليوم

مت من الضحك على سالفة التليفون

تصدق انا ممكن اسويها

:)

بالنسبة للي قاعد يدور بالمدونات

الحال من بعضه


بالحب والصدق وحدهما تتقدم الحياة

صح لسانك

charisma said...

هههههههههه
زين نقذته ولا يتفلش بالارض
:))

********
كلمة أخيرة

بالحب والصدق وحدهما تتقدم الحياة

صح السانك

`~MnO YeNSa! ~` said...

مشالله عليك ...
خــــــــــوش
قولجي ..
مت من الضحك الصراحة .. والله موقف غريــب

بالحب والصدق
حتما
نتقدم

7osen said...

: سلوقا

مساء الخير

لقطة سينمائية

مممممم تصدق تصير

خيال جميل

:

مرتقب اللقاء
إن شاءالله

أنا عاذرك والله ، لأن الحياة كلها مشاغل

:)

أجمل تحية

7osen said...

:عيون الحب

أهلا وسهلا بعيون الحب

لا ماطرت

نطه صغيرة بس

هههه

مشكورة عيون على مرورج الجميل
أجمل تحية

7osen said...

: إستكانة

أهلا أختي العزيزة

إنتي من زمان كنتي بتمشين

ليش ما نفذتي
مو سامعه إللى يقول
لا تؤجل عمل اليوم إلى الغد

:)

تصدقين صج أنا كنت خوووش حارس

:)

اعتقد ان على الجميع محاسبة نفسهم قبل النطق باي كلمه

إي والله

تحياتي أختي العزيزة

7osen said...

:الزين

ياهلا بالزين

ديري بالج تسوينها
بعدين ماتلقين أحد يمسك تليفونج

:)

مشكورة زيوون على هالمرور

أجمل التحيات

7osen said...

: charisma

أهلا ومرحبا أختي العزيزة

أي مسكته قبل لا يتفلش

عاد تليفونها ثقيل شوي
يعني كان عليه العوض

مشكورة كاريزما على المرور

أتمنالج كل الخير

7osen said...

: `~MnO YeNSa! ~`

هلا ومرحبا

إي والله
أنا قبل لما كنت أمسك حارس كنت خووش قولجي

يعني لو مو الأصابة جان أنا الحين حارس المنتخب

هههه

**
صحيح
حتما ستكون أجمل

أجمل تحياتي وأمنياتي

فراوله said...

مساالورد والجوري
عزيزي حوسن
والله طلعت منت هين
ولا الطرابلسي بزمانه
هههههههههههههه
الله يغربل ابليسك
:)))
والسالفه الاخيره
فهذي لها وقت وزمن
وعلي قولتك
بالحب والشفافيه وصفاء النفوس
تتقدم الحياة
دمت بدفء وعذوبه
ابدا
:)

7osen said...

:فراولة

ياهلا ومرحبتين بالاحساس كله

أهلا أختي العزيزة

لا أنا مو الطربلسي
انا كنت اقلد سمير سعيد خووش حارس

لما شفت التليفون طاير تذكرت الايام الخوالي وتخيلته كرة جان أمسكه

هههههه

كلامج صحيح أختي

بالحب وحده

خلونا نحب
ونكتب عن الحب
ونعيش الحب
ونتنفس الحب
وبس

أجمل وأرق تحية

Najmah said...

ماشاءالله رياضي
:))
يعطيك العافيه على انقاذ التلفون
:))



بالحب والصدق وحدهما تتقدم الحياة
اختصرت اهم مافي الحياة بهالكلمتين
صح لسانك
:)

Shather said...

رامبو مو حسين على هالحركه :P

7osen said...

:نجمة

ياهلا ومرحبا
شلونج عزيزتي

الله يعافيج
قدرة كان إنه ما ينكسر

:)

صح إبدنج
أتمنى إن الجميع يحبون بعض
على شان نتقدم بالحياة إلى الأمام

تحياتي لج عزيزتي
نجمة

7osen said...

:شذر

ياهلا ومرحبا بشذورة العزيزة


لا أنا مو رامبو

أنا سبايدر مان

ههههههه

مشكورة عزيزتي
على هالمرور الجميل

أجمل تحية

Aldenya said...

ياسلام عليك

هاللقطه تنفع دعاية :p


ان شاءالله مثل ما يودت تليفونها
قولجي العربي إيود كور كل هجمات القادسية

:p~


وختام البوستك
كان فعلا
مسك

:>

جنون إحساس said...

مسا الخير
حسين شلونك؟


--

مشالله عليك بطل الأزمات الصعبة
:)

وتسلم الأيادي
اتمنى الدنيا كلها تتكلم بلغة الحب
ولو إن هالشي صعب إنه يحصل

darkness said...

صبحك الله بالخير

ويه لو انا مكانك جان التلفون كان بخبر كان

بس ما شاء الله عليك صراحه

انقذت الموقف

:)

و صح السانك على هالكلمه

:)

وردة حب said...

لوووووووووووووووول

حلو الموقف عجبني وايد هههه

يعطيك العاافية

7osen said...

:الدنيا

أهلا وسهلاً
ومرحبتين

صحيح كانت لقطة غريبة
:)

مسكين قولجي العربي كل مرة غالبينه
بس خلاص إنتم تعودتوا
صار فوزنا عليكم شي مفروغ منه يعني تتقبلونه بكل إقتناع

ههههه

مساكين العرباوية

ههههه
عاد تصدقين أنا ماشفت المبارة بس عرفت نتيجتها
خلاص كرتنا عليها العوض

بس هم دائماً غالبينك

مشكورة عزيزتي على المرور الحلو

7osen said...

: جنون احساس

هلا ومرحبا

مساء الأنوار

أنا بخير ولله الحمد

إيه بطل الأزمات بس مو الصعبة

هههههه

حتى انا مثلج
أتمنى الكل والجميع يتكلمون بلغة الحب
لأنها اللغة الوحيدة إللى تجمع الجميع بدون تفرقه

أجمل تحية حب

7osen said...

: darkness

ياهلا ومرحبتين

لا حتى لو إنتي جان مسكتيه
لأنه يا علي بالظبط

:)

مشكورة عزيزتي على تواصج الجميل
أجمل التحايا الصادقة

7osen said...

:وردة حب

ياهلا ومرحبا بهالطلة الأولى

مشكورة عزيزتي

وحياج الله دائماً

:)

qesat_5ayal said...

ما شاء الله
لقفته
:)

واما بالنسبة للي يدور بالمدونات
فأحيانا الفرد ما يحب يخوض بالامور السياسية
او انه ملتجأ للتدوين حتى يخصصه لمجال واحد
او ان يكون مرتع للراحة له فقط

فيلتزم بالامور الاخرى الصمت

لكن ان يكون مع الكل
وان يكون ضد الكل
وبحسب الكل

فهو حتما مسكين لا يعرف نفسه

5roofa said...

احم احم لوول تدري شنو من صج صج صج صج اشتقت لبلووقك

هالكثررررررررر لووول

شخبارك خيو شمسوي

و هذي حلوة تصير قصه حب بس اكملك البقيه بقصصه من قصصي لول بعدين
:p

salamz dear...

7osen said...

: قصة خيال

ياهلا ومرحبا

إيي لقفته
:)

عجبني تعليقج عن المدونين

فعلاً أنا أحب أخلي مدونتي مكان للراحة فقط
هذا التعبير المناسب

أسعدني مرورج
اتمنالج كل الخير

7osen said...

:أبله خروفا

ياهلا ومرحبا ومسهلا

وانا اقول شهالنور هذا

أثاري ابلتنا العزيزة هنيه

تشتاقلج العافيه إن شاءالله
مشكورة على الزيارة الحلوة

سعيد بعودتج
وبإنتظار الجديد

Almas said...

صاااااج

بالحب والصدق تستمر الحياة

وااااو موقف يضحك حده

عاد صصصصصج قصت ويه

لو سمحت ممكن تعيد اللقطة لما مسكت التليفون

آآآآآآآ يعني طاير بالهوى آآآآآ ... جك مسكتك يا الموبايل الشيطون

أحلى شي المواضيع الإجتماعية

والفكاهة والأناسة

والحياة دائما مستمرة

7osen said...

: الماس

ياهلا ومرحبا عزيزتي

إيي البنيه المسكينه نقص ويها حدها

أهيا ما كان قصدتها تهدا لكنه فلت من إيدها لا إرادياً
ولحسن الحظ تصادف مروري بنفس الوقت فكان الموقف الغريب


:)

اجمل تحياتي
سعيد بهالمرور

Barrak said...

انا لو منك من يطير التلفون اصير سمير سعيد اطيرله واحطه بمخباتي

عشان تعرف مره ثانيه تخاف من فراشه
لو شايفه عزكم الله فار جان التلفون فلعني


حلو ه فلعني

7osen said...

: براك

أهلا وسهلا بالبرك

ومرحبتين كبار

تصدق تذكرت الأيام الخوالي لما كنت أقلد سمير سعيد

عاد كنت خووش حارس على شان جذي مسكت التليفون

بس ما حطيته بمخباتي
ههههههه

إي والله لو فار جان الله يستر من ردة الفعل

:)

مشكور على المرور الحلو
منوور