8/26/2008

سوالف ذكريات خرابيط









الساعة وحدة إلا ربع





مو يايني نوم


شسوي





مالي خلق أقرا ومالي خلق اسوي شي


هالايام حدي اعاني من حاله ضبابية


لكن الشي الوحيد إللى مخليني مستانس إن شهر رمضان على الابواب


أحلى شي برمضان كل شي يكون حلو النفسية تكون بقمة الهدوء والطمأنينة








وايد قاعد اقرا الفترة اللى طافت احياناً أحس ان عيوني تعورني من كثر التركيز


انا ما احب اركز بشي فترة طويلة على طول راسي يعورني





قريت رواية قالي عليها شخص عزيز


والصراحه على كثر ماهي جميلة على كثر ما المتني لدرجة كبيرة جداً





يعني موضوع الرواية مشابه لواقع معاش قاعد اشوفه بعيوني


وهذا الواقع صعب


يغير كل حياتك


يخليك تحس بشي ماينوصف


ما احب احاول اني اوصفه حتى ، لأنه يبط الجبد





أعتقد إن هالرواية راح تظل عالقة في ذاكرتي المتشبثة بالأشياء بعناد مفرط





*****





هل انت إنسان عاطفي ؟؟


سؤال للي يحب يجاوب





******





ودي العب كرة


صج ودي


ليش ما اقدر


كانت الكرة بالنسبة لي قبل متنفس مهم عن كل شعور احب اعبر عنه


مو بس الكرة


حتى المجهود البدني ، كل ما تضايقت رحت سويت تمارين مجنونه


قبل ايام الشباب


كنت مجنون رسمي


كنت العب كرة العصر واسهر للفير اروح اركض خمس كيلو او اكثر


ارد البيت انام اقعد العب كرة واركض الفير


ههههههه


مرة دشيت نادي القادسية لعبت ملاكمة


بس ماطولت ، بسبب إني مالي خلق اتمرن


عاد كنت احب اللعبة لأنها فيها عنف


يعني لما تركز وتحس انك قوي وتقدر تفوز على اي شخص احساس واايد حلو


يخليك تحس انك الافضل


لكن الحين الله يعين


دوام على طول ، حتى النادي ماعندي وقت اسجل او اروح


كرة ما اقدر العب بسبب الاصابه


على الله وعلى ترستن يسحبني معاه نتمشي لما ارد من الدوام


عاد اكون حدي تعبان بس شسوي لازم امشي شوي





وعلى طاري الرياضة


قبل كنا نلعب لعبة تضحك حدها


ههههههه





كنا نلعب منو يحوش المروحه بريوله


يعني يحوشها على طريقة الدبل كيك


ههههههه


والله صج ، انا وولد خالتي


دائماً نلعبها


كانت اللياقة اميه بالاميه


متعافين


:)


تذكرتها الحين ،، الحين لو احاول على طول يصير فيني تمزق


عضلاتي محتاجه اعادة تأهيل


يبيلي العب حديد من يديد زائد سباحة


السباحة اهي اللى تخلي الجسم حلو





****


هالايام عندي احساس إني فاشل


مو قادر احس بشعور الكتابة اللى تخليني اعبر عن اللى احس فيه بطريقة احبها


منو يقولي شسوي





****


والله صارلي يمكن شهرين مو ماكل شي عدل في البيت


كله من المطاعم


لا بس قبل اسبوع سوا لنا ميشو عشاء الصراحة غير طبيعي


مطبق هامور مع ربيان


الله يعذب والله صج يعذب


أكلت باحساس


شلون لما الواحد يلقى حبيبته بعد غياب طووويل


جذي كان شعوري


هههههههه


مشتهي مجبوس دياي من ايدين حلوة


مع مرق دقووس


مع سلطة نوعين


وحدة نورمل يعني العادية الخفيفة


ووحده كول سلو


اللي يسونها في البيت ،، بعد احبها اكثر في بيت اختي


هناك يظبطونها على مزاجي


والله من زمان ما مريتهم وطولت عندهم


كله من الدوام الطويل اللى ما يخلص


انا مقرر على إجازة بعد فترة جذي لما تهدآ الاجواء


إجازة طوووويلة أمارس فيها جنوني وفنوني


وارتاح بكل معنى الكلمة


لكن المشكلة عندي اني في اشياء ما اقدر اخذ منها اجازة


دائماً تلاحقني





*****


احياناً تعيش لحظات حميمة مع شخص أي شخص كان


صديقك ، اخوك ، زوجتك , اختك


اي شخص قريب


تسولف معاه وتندمج تاخذكم السوالف لمناطق بعيده


كل واحد يبدأ يقول للثاني اشياء يمكن اول مره يسمعها


انا وايد تصير معاي هذي الاشياء


واستمتع فيها خصوصاً لما احد يئتمني على سالفة او شغله معينه


ودائماً ما احب اقول هالشغلة ولا يمكن اقولها


لما يصير هالجو وتصير هالسوالف مع شخص ثاني


يعني احس اني افقد مصداقتي وافقد اهم ميزة احسها فيني


وهي الكتمان


ما احب اذا شخص زعل علي علشان ما قلته شي يخص شخص ثاني





:)





هذا مقطع صغير من الرواية اللى قلت عنها


**


عاداتي تغيرت ، ملامحي تشوهت ، اقلامي تكسرت


اصبح مزاجي مثل ضفدع نهري في مستنقع آسن، لايلبث على طحلبة حتى يقفز فوق اخرى


كلماتي صارت حادة


ولغتي تحولت إلى مزيج من الغمغمات والهمهمات التي اخاطب بها نفسي آخر الليل حتى اعتدها


واعتدت الاذان التي تنكر مني كلمة لم تكتمل


وحرفاً ظل معلقا في سقف حلقي


وكأني أظن على كل من سواكِ بالكلام والصوت





******


وين ماتكونين


انتي معاي


*****





كل عام وانتم بخير مقدماً


ولما يصير باجر رمضان راح نقولها ثاني مرة إن شاءالله





الحين بديت انعس شوي





تصبحون على خير





نسيت لا اقول


صارت الساعة وحدة ونص


:)




















24 comments:

الوتين said...

صباح الخير
انا حيل استمتعت و انا اقرا البوست حسيت اني سهرانه معاك مع ام الصبح
اول شي ودي اعرف اسم الرواية لاني واااايد احب اقرا و اعشق الروايات احسها تنقلني حق عالم ثاني و على قولت شخص اعرفه تعالج الاكتئاب
*****
الرياضة وايد مهمة تسحب الضيقة والغضب لانها اطلع الاشياء السلبية الي داخلنا
*******
على طاري الاكل انا مشتهية كشري مادري ليش بس ودي فيه
******
صج ودي اوصل حق المرحلة الي انسى فيها نفسي و اتحجى مع احد عن وايد اشياء بس مشكلتي وااااايد كتومة و وايد احاسب على كلامي
****
اسفة عالاطالة
مع الشكر

إحساس said...

مع حبي الشديد لك
وتقديري
وعشقي لظلك الخفيف
وغرامي في قصصك
واحترامي الكبير

أنت راعي طويلة =\ !

تعبت وانا اقرا لدرجة نسيت اللي بقوله ،

جوابي على سؤالك . .
اي نعم اعتبر نفسي عاطفي جداً
والحين قاعد أبجي لأني بس نسيت شكتب =\

وعلى طاري الاكل مثل رد الاخت الوتين
يبيله كشري جحا لزيز . .

ممم كاتب في بداية البوست الساعة وحده الا ربع ومانمت !
الظاهر متعود تنام مبجر !
حاول تسترخي وتشرب ريدبل تنام بسرعه .

ومثل ما قلت مع حبي وتقديري
مع عشقي وغرامي
واحترامي الكبير

لا تطول طلبتك .

terkwaz said...

ابي اعلق
بس عندي لويه
لي عوده انشالله

TReSTeN said...

تصدق عااد

امس الساعة وحدة ونص مو قاادر انام

كنت حدي ضجران

بقييت اطرشلك مسج

نروح نتمشى اشوي

بس توقعتك نايم

كالعادة

هههههههههه

عموما بالمناسبة ترى اليوم غدانا نفس الشي

بالبيت حياك سير علينا

kAiKa-MGroMa said...

انا تعاطفيه مو عاطفيه :P ..

Menu:
المقبلات:

سلطة بقصم بجبنة الماعز

الطبق الرئيسي:

مرق قواقع مع حراشيف تمساح

المشروبات:

افندي ورقي مع رشة افوكادو

طب وتخير

عشان نبلغ الشيف يصوغ لك هالاطباق =D.

7osen said...

: الوتين

ياهلا ومرحبتين كبار عزيزتي

احب اشكرك على كلامج الطيب
وانا سعيد لأنج استمتعتي في البوست
والرواية اكيد راح اقولج على اسمها

وانا بعد اعتقد إن الروايات تاخذنا مع احداثها لعالم ثاني

----
أكيد الرياضة مهمة
انا طول عمري رياضي بإمتياز
لكن في الفترة الاخيرة أثرت علي الاصابات
:)

--------
في خووش مطاعم كشري بس ما أنصحج فيهم
لأن احلى شي كشري البيت
تعرفين تسوين ؟
سويلج وبالعافية
واذا مالج خلق اي مطعم معتمد
مع شوية تئليه وبالهناء والشفا

:)
-------

وحتى لو كنتي كتومه لازم تحتاجن من تفضين له بمكنونات قلبك

لأن الكلام بحميمية حالة خاصة من التحليق مع قلوب قريبة منا

اشكرج على هالتعليق المميز
والاطالة تسعدني
اتمنالج كل السعادة

7osen said...

: احساس
ياهلا ومرحبتين

انا ابي اعلق بدايةٍ من اخر كلمة قلتها

طلبتك لا تحاكيني عن احبابك ولا ذكراك
ولا ودي تعلمني عن الماضي ولا ادري

:)

أشكر احترامك
وصمتك وكلامك
وعطفتك وهيامك
وعشقك وغرامك

لكني ما اعتقد اني خفيف الظل
بل من الممكن ان اكون ثقيل الظلال
:)
مادري شنو يعني راعي طويلة
طويلة ولا قصيرة
ههههههه
بس سوري لأني نسيتك الكلام اللى تبي تقولة
وانا ما انام مبجر انا من عشاق السهر
لكن ظروف الدوام يا طويل العمر تفرض علي النوم الباكر وإلا
راح اروح الدوام الطويل وايد وانا شبه نايم

وعلى طاري الكشري
يالله أعزمني على مطعم جحا
والحساب علي لا تخاف

تشرفت بزيارتك المليئة بالاحساس ياسيد احساس
اجمل وارق التحيات

7osen said...

: terkwaz

ياهلا ومرحبتين

إنتي تشرفين بأي وقت
وانا بإنتظارك

اجمل التحيات القلبية

7osen said...

:ترستن

ياهلا ومرحبا

لااااااااااااااا

جان داق ياخي
عاد حدي كنت ضجر
ومالي خلق
واشعر بالضيق
جان سويت معروف فيني

بس صج انت شكو تمشي مو كنتو لاعبين مبارة وفايزين فيها بعد

الله
وناسه ودي ايي بس ما اقدر
للاسف يالله بالعافية عليكم
بس ثاني مرة سوها عشا احسن

تحياتي لك سيد ترستن

7osen said...

: كيكة

ياهلا ومرحبتين

إنتي تعاطفية إذاً فأنتي عاطفية

لأن التعاطف ينبع من عاطفة الشخص التي تتمترس في داخل منابع الاحساس وتجعله ينفعل لاتفه الاسباب واكثرها ضئالة

إذا انتي ايضاً بالإضافة الى كونك تعاطفية انتي عاطفية

وشكراً على تعاطفك مع عاطفتي
وتزويدي بهذه القائمة من المأكولات التي يسيل لها اللعاب


جبنة الماعز ،،،،ها
لا وبعد حراشيف تمساح

:/

:))

مشكورة عزيزتي على التعليق والمرور
لما اقرا اسمج تنفرج اساريري
شنو الشي اللى اوحالج فيه ؟

كيكة مقرومة
خوووش اسم

:)

elsha3er said...

مدونتك جميلة جدا انا احمد من مصر شرفنى زيارتك وانا بحب كل اهل الكويت واتمنى انك تشرفنى

احمد الشاعر

فراوله said...

مساالورد والجوري
عزيزي السهران
حسين
هالاحاسيس تحوشنا كلنا...ساعات تكون لمدة طويله وتختلف من شخص للآخر
بس الاهم ان احنا نطلع منها واحنا
اقوي واحسن
من الاول
:))
بالنسبه للسؤال
نعم انا عاطفيه...وهذي اهي مصيبة حياتي
):::
بالعافيه العشا
ومبارك عليك الشهر مقدما
وينعاد عليك وعلي حبابيبك بالصحه والعافيه
قول آمييييين
:)

Najmah said...

احب البوست اللي يكون وليد اللحظة
:)
اول شيشنو اسم الرواية؟
:)
هالايام مزاجي روايات
كل يومي اقرا او اكتب
احاول اكسر هالفراغ شوي
واللي مريحني بعد مثل ماقلت
ان رمضان قريب
عسى ربي يبلغنا ويعيننا على صيامه وقيامه
..
وايد يقولون الرياضة تكسر الضيق
شي حلو
انا للأسف ماحب الرياضة
:\
بس عجبتني والله
لعبتكم خطيييييرة
:))
..
احساس الكتابة يتغير
ويكبر ويصغر
ويشكلنا كل مرة بصورة
ابدا انت مو فاشل
مجرد راحة بسيطة
وترد بعدها للاحساس اللي يدفعك للكتابة مثل ماتحب
:)
اللحظات الحميمية
وايد احب هاللحظات
مرات تكون نقطة تشابه غريبة
تكون بداية هاللحظة
..
تسلم ياحسين على هالبوست :)

صبا said...

مرحبا حسين شخبارك انشالله مو سهرااااان

:P
اي نعم انا وايد تاخذني العاطفه

ما قلت لنا اسم الروايه ؟

ومبروك عليك الشهر مقدما وينعاد عليك وعلينا بالخير

وتسلم ايدك علي هالبوست المنوع الي إيوع

تحياتي يا خوي

charisma said...

بسم الله الرحمن الرحيم
اخترععععت
بديت اقرى البوست والساعه وحده الا ربع هههههههههه شهالصدفه
وهم مو ياينى نوم
://

دايره هالحاله علينا اظاهر
:))

استمتعت ابسوالفك
ويا ليت اقدر اذوقك مجبوسنه قتااال
ههههه


واي على السؤال لا انا مانى عاطفيه ابدا
;P


وعسااك على القوه وبالفعل ناطرين ارمضان يعدل حالنا ونفسياتنا
وناطره الاجااازه بفارق الصبر
://

تصبح على خير

5roofa said...

تدري خيووو شتسويي سااااااااااااااافر

والله من صج السفر يااربي يغير كل شيي

امبي عيل تخيل انا التمبل الي مالي خلق شي بالطويت
اقوم من فير الله امشي لي البقاله اشتري توست اوكل البط و ارد البيت لووول

فاضيه شسوي

و جوابا على سؤال

انا مو عاطفيه كلش و لا اعرف بالرومنسية و شريره لابعد حدود

:p

اللياقه يا خيووو راحت عليناا بس كبرنا كبرنااا لوول

ايام زمان الي نركض بالحووش و نشيل الجدوور

الحين بس نشيل قلم ستين الف عضلة طق

احم لوول جني يدتي لووووول


انشالله الاجازة تغير النفسيه خيوو

:D

salamz dear...

kAiKa-MGroMa said...

خوش تفسير .. بس لا ما اتوقع ما احس

اني عاطفيه كلش

:|

اللي اوحالي بهالاسم اني احب

هالكلمات من طقة معفوسه مخفوسه

مكسوره معبوجه متعومسه لول مالها

علاقه اخر وحده
.

terkwaz said...

وعد الحر دين
رديت ...

اول شي شنو اسم الروايه
خل اقرا شييديد
كتبي تشتكي مني ابي شي بقراطيسه...

ويبيلك اجازه عشان تروح حاله الــ"مالي خلق"

وصاج الرمضان غير ذكرتني بدعايه تطلع ...
مرحبا بشهر الرمضان شهر نينيني
يعني لحن:p

والجواب على سؤالك
عاطفيه لكن مابينها بين الناس
فانا اقرب الى القسوه معهم..

ياليت الشباب يعود يوما
الكبر شين
شر لابد منه
ذكرتني بالقواري :)

وعلى حوشه البنكه
ماصار فيكم تمزق لوول


انقالت لي كلمه
اسمعي وادفني
ميزه حلوه

وسالفه "ما احب اذا شخص زعل علي علشان ما قلته شي يخص شخص ثاني"

تصير وايد اتوقع الفضول زايد عند الناس هاليومين..

تحياتي

7osen said...

: elsha3er

اهلا وسهلا

تشرفت بزيارتك اخي العزيز
يعطيك العافية

-----------

:فراولة

أهلا وسهلا
بالعزيزة
صاحبة الاحساس الشفاف
دائماً كلماتج فيها شي غير
دائماً راقية

يعطيج الف عافية
اتمنالج كل الخير
-----------------

: نجمة

ياهلا ومرحبا بنجمة النجوم

القراءة وايد حلوة
ومفيدة
وتضيع الوقت

بس لازم نعرف شنو نقرا


لازم تحبين الرياضة
لأن العقل السليم بالجسم السليم

والمزاج هالايام مو صفر
إلا صج صج تحت الصفر
لو مو رمضان ياينا
جان علوم

يعطيج الف عافية عزيزتي
اتمنالج حياة سعيدة

7osen said...

:صبا

هلا والله

شلونج صبا وشخبارج


الإنسان العاطفي مشكلة كبيرة
لأنه دائما يكون تحت سيطرة العاطفة اللي ماترحم


وكل رمضان وانتي بخير
تحياتي لج

7osen said...

: كاريزما

هلا والله بالغالية كاريزما


أي والله يا كاريزما
هالحالة يومياً معاي

تبين الصراحة
الصراحة
أنا وايد تعبان
:(



إن شاءالله دووم مستمتعة
والمجبوس واصل

صحيح انتي ابداً مو عاطفية
:)

يعطيج العافية عزيزتي
اتمنالج كل شي حلو

7osen said...

خروفا

اي والله يا خروفا من صج يبيلي سفره
إن شاءالله ورا رمضان

محتاج اهرب لأبعد مكان بالدنيا


كبرنا
فعلاً كبرنا

الله يعين

يعطيج العافية
ابلتنا الغالية

7osen said...

: كيكه

احسن لج انج مو عاطفية

العاطفة ما وراها إلا التعب


شوفي يقولج احياناص الواحد في لحظة تجلي وإبداع يسوي شي ويظل هالشي خالد مدى الايام

يعني انتي لما اخترتي هالاسم اكيد كنتي في لحظة تجلي

علشانه فريد من نوعه

:))

تحياتي
للكيك الناقص شوي
اجمل الامنيات عزيزتي

7osen said...

تركواز

ياهلا ومرحبا
وشكرا لأنج عدتي


اهم شي ان رمضان ياي علشان يخلينا نرتاح شوي من الاجواء المضغوطه


وايام الشباب الواحد كان يسوي كل شي

كنا ميانين
والحين عقلنا

:)

شكرا على مرورج الجميل
وتواصلح الرائع
عزيزتي


يعطيج الف عافية
اتمنالج كل الخير