11/02/2008

غروب


















غروب

احياناً ماتلقى بنفسك شيء

كل شيء ولا شيء

هدوء وصمت بس

------

يوم الجمعة كان يوم مميز

كانت الساعة ثلاث جذي ،، الجو خيالي

وانا ماعندي شي

يوعان شوي لاني مو متريق

دورتلي احد اعزمه على الغداء بس مالقيت

مع ان هالشي نادراً مايصير بس صج هالوقت ماحصلت احد

كان ترستن الخيار الاكثر حظ

لكنه ماكان موجود

اخر شي قلت اطلع بروحي

كان نفسي اشم هواء البحر

الجو صراحة ،، بكل صراحة ،، بدون مبالغة والله ،، مال حب

مال تطلع إنت وشريكة حياتك تستمتعون بالجو والحديث

واهم شي تتغدون مع بعض

ههههههه

والله لو يسمعوني اللى فبالي يمكن يذبحوني

المهم اني طلعت بروحي

رحت تغديت ،، ودفعت فواتير موبايلي والايقو

ومريت مركز سلطان

تسوقت شوي ،، ورديت البيت

وصورت هالصورة

اغرتني الشمس واهي تبي تنحاش

مادري احس إني حدي

انزلق في مستنقع المشاعر

الجو قاعد يسببلي متاعب

ههههههههه

عاد باليل طلعنا انا مع اثنين متزوجين وعلى طول يشتكون من زوجاتهم

صراحة قعدنا في مكان حده رومانسي

يعني البحر جدامنا والمكان نظيف وحلو مع كابتشينو لذيذ مع هوا بارد

الله

انا كنت بعالم ثاني

واللى معاي يتناقشون بمشاكلهم الزوجية

ههههه

بس قالوا كلمة الصراحة وااايد اعجبتني

يقولون ان الحريم يعتبرون العلاقة بينهم وبين ازواجهم

منافسة مع إنها المفروض تكون مشاركة

علشان جذي تصير المشاكل والخلافات

بس والله بطو جبدي وخربوا علي الجو الرومانسي

المهم إني ماكان ودي اقوم

الصراحة

حييل كنت متأثر بالجو

رسمت بخيالي واااايد مشاهد

احياناً الخيال يكون مهرب مجدي من هذا العالم المجنون

واحياناً أخرى احس إني عايش بعيد عن الناس

في احد يحس إن الجو يخليه يحس بكل هالمشاعر

ودي مايتغير الزمن ويوقف على هالشهر لأنه جو اروع مايكون

بس تدرون السبب الرئيسي اللي يخلي الجو حلو بهالشهر

لأن فيه عيد ميلادي

ههههه

-------

جلسنا هناك

انا وانتي

تكلمنا كثيراً

واستمتعنا طويلاً

ثم صمت كل شيء من حولنا

نظرت إليك

وابحرت في موانئ عينيك التي بلا مرفأ

أة ياصغيرتي

لو تعلمين كم احبك

احبك اكثر ،، واكثر ،، واكثر

اليس كذلك

ستبقين قربي

ولن ننتهي ،، ولن نتشاجر ،، ولن يتناقص حبنا ابداً

سنأتي هنا بعد 30 عاماً

ونجلس بذات المكان

وابحر من جديد في عينيك التي بلا مرفأ

رغم العمر

الحب لا يموت يا اصدقاء

الحب عطاء مستمر لا ينتهي ابداً

الحب حالة نادرة من الوفاء والاخلاص

الحب أنتي

-------------

اسرقني

21 comments:

تراب الكويت said...

هناك بعض المشاعر التي تتأجج بفعل فصل ما ...لا اعلم ما السر

خصوصا فصل الشتاء
يختلف فيه مذاق الحب
وتشتد فيه وطأة الجرح

الزين said...

هو بوح الخواطر ما اقرأه هنا ياحسين

:)

بوح الوحدة والحاجة للآخر
عطش الحب وجوع المشاعر
جو رومانسي من غير نصفك الآخر
تبحث عنه لتجده متواريا خلف غروب الشمس
خلف تلك الموجة المتهادية على شاطئ البحر
بين انفاسك
بين احاديث الأصحاب
في قعر فنجان قهوة
في ضحكة خرجت من القلب
ونسمة هواء قد لوحت ملامحك بلون الربيع

واحيانا تجده متواريا بين ملامحك
محتضنا كلماتك
متذوقا احرفها
ومستمتعا بحضن الخواطر هنا يا حسين

ابتدأت يومي هنا بمدونتك
متعه التعليق على ما كتبت لا تضاهيها متعه

شكرا لك

ZooZ "3grbgr" said...

اتفق مع اصحابك المتزوجين بشكواهم
رأيت النديه منتشره بين المتزوجين
وكل يغني على كرامته
من مستصغر الكلمات والافعال
ترى مشاكل امتدت ليتدخل فيها اقارب الزوجين

على قولة الوالده
اذا الزوج وزوجته ما يكبرون عقلهم
بينصدمون بيوم من الايام بعيالهم يقولونلهم كبروا عقلك
هذا اذا كملوا مع بعض

charisma said...

صبااح الورد
:)

ما الومك يا حسين الجو فعلا جو حب ومشاعر دافيه جو منعش يجدد الروح
تحس انك مرتاح وفيك حب يكفى العالم كله

واحلى شى انج ما اتخلى اى شى يخرب علييك وتلجأ للخيال وتعيشه وتستمتع بهالجو
:)

البوست شرح
والصوره روعه احب الغروب

تسلم ايدك

منال العنزي said...

اقتبست جمالية اللوحة ، دائما أحب قبل الذهاب للجامعة أن أكون بمحاذاة البحر ، أراقب الشمس حتى تخرج من ثنايا السماء ، كأنها برتقالة شهية :) تقبل مروري ..

شتاؤك حب وسكر

Anonymous said...

صباح الخير والمطر
:)

الجو خيالي اليوم خياااالي

هالبوست شفاف

حسيت فيه بروح المطر
:)

" ولن ننتهي
ولن نتشاجر
ولن ينقص حبنا ابدا
"

حبيت هالجملة وايد
:)

عسى كل ايامك سعادة ياحسين

Shaima'a Alkandari said...

الجوووو فعلا بديييع

وخذني معك بهالجو الحلو وخلنى ابحر واوصل للمرسى مع هالحروف الحلوه

الجو هذا يريح البال وياااحلاته من شتااا اشتقنا لهالفصل

وعلى سالفه التحلطم واااي مادرى ليش جذي وين مارووووح يتشكون الحريم على رياييلهم وعلى ماسوالي وانا يبتله وحطيتله
على بالهم انها معركه وتحدي ولازم احد الاطراف يفوز مع انها بنظري العكس مثل ماقلت انها حياه يشتركون الاثنين فيها

وكل عام وانت بخير مقدمااا ياخوي وعيش احلى اللحظات بهالجوو


:

ستبقين قربي

ولن ننتهي ،، ولن نتشاجر ،، ولن يتناقص حبنا ابداً

الحلو بالحب ان ماله نهايه وطعمه حلو بس للي يقدرونه ويعيشونه بصدق

اخوي العزيز

كعادتك مبدع

Shaima'a Alkandari said...

الجوووو فعلا بديييع

وخذني معك بهالجو الحلو وخلنى ابحر واوصل للمرسى مع هالحروف الحلوه

الجو هذا يريح البال وياااحلاته من شتااا اشتقنا لهالفصل

وعلى سالفه التحلطم واااي مادرى ليش جذي وين مارووووح يتشكون الحريم على رياييلهم وعلى ماسوالي وانا يبتله وحطيتله
على بالهم انها معركه وتحدي ولازم احد الاطراف يفوز مع انها بنظري العكس مثل ماقلت انها حياه يشتركون الاثنين فيها

وكل عام وانت بخير مقدمااا ياخوي وعيش احلى اللحظات بهالجوو


:

ستبقين قربي

ولن ننتهي ،، ولن نتشاجر ،، ولن يتناقص حبنا ابداً

الحلو بالحب ان ماله نهايه وطعمه حلو بس للي يقدرونه ويعيشونه بصدق

اخوي العزيز

كعادتك مبدع

swan.beach said...

مساء ممطر ويصبحك بهوا بارد

اليوم بدأت الصباح باغاني فيروز لماذا لا اعلم ؟؟
هل للجو علاقه بذلك ايضا لا اعلم ؟؟
المشاعر اليوم كلها ذكرى ذكرى احاول نسيانها او اتناساها
لا لا الجو اليوم مو طبيعي
بيطلع الحجي كله والخيالات كلها
عليك بالعافيه على الغدوه بس المره اليايه اعزم احد وياك
ولا تاخذ هالمتزوجين وياك على البحر اخذ عزاابيه :p

qesat_5ayal said...

مساء الاشواق

كيف الحال
:)



حسين.. الحب حالة نادرة من الاخلاص
وقلوبنا تعيش حالة الندرة


الجو فعلا خيال
ما ودي أرد البيت
بس انا بنت :\

7osen said...

تراب الكويت

اهلا وسهلا عزيزتي

اعتقد انه ليس بعض المشاعر
بل كلها

في هذا الفصل يحدث كل مانهرب منه
المشاعر تأتي مجتمعه ولا مهرب
حقاً
لا مهرب

هنا تصبح المواجهة امراً حتمياً

:)
لك اجمل التحيات
وارقها
---------
الزين
ايتها الصديقة الغائبة

لكلماتك وقع خاص
وشعور مختلف

نعم ياصديقتي
هو عطش المشاعر وجوع الحب
وايضاً
الحاجة للهروب مع إنسان
نصفك الاخر
المتفهم
الحنون
المحب
الجميل

يبدو إننا رغم جمالية المشاعر
سنبقى
مجرد
نصف
:(

اجمل تحياتي واصدقها
للعزيزة الزين

---------------------
زووز

اهلا وسهلا
نعم فعلاً
عندما يتدخل الاخرون بين الزوجين
تستمر المشاكل والخلافات

هذه حقيقة
وعلى الجميع ان يفهمها
ليعيش بلا منقصات

:)
شكرا لك
سعدت بمرورك
---------------
كاريزما

تصدقين كاريزما
احسج متغيرة
بس ودي اقولج
اتمنى انج بأحسن حال
من الداخل

:)

كاريزما
الجو حلو
اليوم مثلاً

رذاذ المطر
إللي يبلل وما يبلل
الشعور المحلق في السماء
المشاعر اللى بالقلب
احساسنا الكبير

كل هذا
شنوي يسوي بالقلب الضعيف

اتمنالج كل شي جميل
لأنج تستاهلين الاجمل

اصدق تحياتي القلبية
:)

---------------
عزيزتي منال

ذكرتيني في زمن مضى
الشمس حين تشرق

في زمناً ما
كنا هناك
بالقرب من هذا الازرق الكبير
الفجر يتثائب بكسل
والشمس تخطو خطواتها الاولى
والهدوء له صوتاً خفيض
والمشاعر بقمة الامل
ياإلهي
يالها من ذكرى

كان زمن

على كل حال

يسعدني جداً مرورك عزيزتي
لوجودك اهمية كبيرة

كوني بكل الخير
-----------
نجمة النجوم

ايي والله
الجو خيالي

صحى كل شيء نايم
الحنين
الحرية
والامل

يارب يستمر جذي
يااارب

مشكورة نجمة
على فكرة الجو اليوم كان يشبهج
:)

اجمل تحياتي

----------------
شيماء

اهلاً بكبر قارة اسيا
لا ليش قارة اسيا

بكبر العالم

وينج ؟
عاش من شافج
فاقدينج واايد

والله بكل صراحة
اسعدني حيل حيل تعليقج

مشكورة على هالمرور اللي خلاني ابتسم واستانس

لاتغيبين
خليج قريبه

اتمنالج كل الخير والامل

--------------
swan.beach
اهلا وسهلا

اكيد الجو له علاقة
الجو مال تسمع فيروز
وتحس

حسي بكل شي
خلي نفسج على طبيعتها

لاتحرمينها
حتى لو تبي تحزن

الجو حرية
تنفسي هالحرية

لأخر مدى

والمره اليايه راح اخذ عزابية
علشان تكون سوالفنا رايقة

بس ما اقدر
ربعي المتزوجين واعزهم واايد

هههه

اتمنالج كل الحب
وارق تحياتي لج

------------
قصة خيال

قصة الحين الساعة 2:30
شنو اقولج
صباح الورد


ايي والله انا برايي ان الحب حالة من الاخلاص والوفا
مستمرة لأخر العمر
مهما تمر بظروف وبمشاكل
ما تنتهي
علشان جذي انا اذا حبيت احد اكرس هالقناعة
وما انساه ابداً

:)

ضحكتيني على انا بنت
صج إنتي بنت ؟؟

هههههه
اتغشمر معاج

:)

اتمنالج مزاج رايق
بهالجو الحلو
يخليج تكتبين لنا من قصص خيالج العذب

بالإنتظار

ودمتي بكل الخيال والحب
:)

ميرامار said...

ما الومك

THE BOSS said...

دائما الجو الحلو يبعث في النفس
الحياة كالمطر للأرض

بس شطلعك مع المتزوجين وحنتهم

وعطني ولعه

qesat_5ayal said...

LoL


:P

يعني يعني يعني
يعني ماقدر اطلع من البيت لي وقت متأخر

:P

Barrak said...

صج هالايام مال حب


اسرقني من كل اللي فيه

Shaima'a Alkandari said...

هلا انت ياوخييييييي
ماكو الله يسلم فترة نقاهه واعادة احسابات مثل ماتقووول واساسا مااقدر استغنى عنكم اكو وحده تستغنى عن اهلهااا مستحيل

7osen said...

ميرا مار

اهلا وسهلا
و
مرحبتين

شفتي شلون
الجو حده روعة

بعد اليوم
الجو غائم
والهوا يرد الروح

يبيله طلعة بريه

:)

مشكور على مرورج الجميل

--------------
THE BOSS
ياهلا ومرحبا

ايي والله
الجو الحلو
يخلينا مبتسمين على طول

شسوي ياخوي
ربعي وابتلشت فيهم
:)

حياك الله دائماً
اكيد على هالجو إنت على طول تبي ولعه
:)

----------
قصة
ياهلا ومرحبتين

هههههههه
ادري بس قاعد اتغشمر معاج

وترى الجو بالنهار احلى واروع
باليل شوي يصير برد

:)

اتمنالج كل الحب

------------
براك
ايي والله يالبرك
وإنت صاحب الاحساس الحلو

اكيد بيخليك هالجو تبدع


رجعلي عمري الليلة ديه
ماهو مش كتير ابداً عليه
ليلة نعيشها في حضن بعض

حياك الله دائماً وابداً

-------------
شيماء
ياهلا والله
ان شاءالله تكون هالفترة خلتج ترتاحين

وكلامج والله يعنيلي الكثير
مشكورة عزيزتي
وااايد

اتمنالج كل الخير

:)

why me said...

الله خوش صوره عجيبه

وربعك لوول حده الجو ما يصلح لهم



انا ترا بين فتره وفتره اطيح على بلوقك بضيفك في قائمة المدونات الصديقه عشان ما اتضيع
لول


اي ومبروك عرس اخوك
الفال لك

:)

Purplecious said...

الجو اليوم عجييييييييييييييييييييب

توني راده البيت كنت طالعه و قاعدين بره و ما ودنا نقوم من حلاة الجو

الجو يخليك تبتسم غصبا عليك
:))))))))))))))))

متى عيدميلادك؟؟ ليش أنا عيدميلادي بالحر كل سنه كل سنه ودي أغير
ههههه
تبادل أيام؟؟؟
هههههههههههههههههه

اكو بوووووووووست يديد ما شفته؟؟؟
يالله تعال شوف و اضحك حياك
:))

Anonymous said...

يقولون ان الحريم يعتبرون العلاقة بينهم وبين ازواجهم

منافسة مع إنها المفروض تكون مشاركة

علشان جذي تصير المشاكل والخلافات
__________________________
اول شي شلونك؟عساك طيب
ثانيا
هالجمله شدتني بصراحه

بس مو ملاحظ ان الخلاف يدب بسبب الطرفين

يعني لو الحريم يعتبرونها منافسه

الرجال يعتبرونها ممارسه

ولا انت شرايك ؟

ايه صح نسيت اهنيك على الصوره الحلوه اللي ملتقطها

7osen said...

واي مي

ياهلا ومرحبتين

مشكورة عزيزتي من ذوقج

اي والله مايصلح لسوالفهم اللي تبط الجبد
ههههههههه

الله يبارك في عمرج
ومشكووورة وااايد على هالمرور الحلو

اتمنالج كل الخير

-----------
بيربل

ياهلا والله ومرحبا

شهالمزاج الحلو
اكيد كله من الجو

ايي والله يا بنفسج
هالايام الجو حده روعة
مو بس تبتسم إلا مستانس حدك

ههههه
عيد ميلادي باقيله اسبوع يوم 16
اييي شفتي شلون انا عيد ميلاد يكون بجو حلو وشهر حلو
وناااسه
هههه
افا عليج تستاهلينه موافق ابدلج

:)

ايي كاني يايج
عاد ودي اضحك

مشكورة على هالمرور المميز
اتمنالج كل الخير

------------
المرحومة
ياهلا ومرحبا

الله يسلمج ويعافيج
الحمد لله بخير وبصحة

كلامج صحيح
الخلاف دائماً يصير من الطرفين
بس احياناً يكون طرف واحد اهو اللي دائماً يثير الخلافات
عموماً الحياة الزوجية مشاركة مستمرة ولازم كل طرف يعرف شنو مسؤولياته تجاه شريكة

:)

اشكرج عزيزتي
يعطيج العافية

اتمنالج كل الامل