2/06/2009

سوالف





















مرحباا لجميع من يمر من هنا ويترك اثر او لا يترك اثر


ودي اقول شي واحد لكل شخص يقرا هالكلام





ازرع الحب حولك وخل الناس إللي تعرفك تقطف هذا الحب


حب الناس وانشر الفرح ترى الدنيا قصيرة ولا تسوى لحظة حزن وحدة





:)





---------


وبعد





---------





في خطوة عملاقة إذا صح التعبير انا مقدم عليها ، اتمنى إني اقدر اخطوها وما اتردد او تبرزلي اية عثرة في الطريق إللي ناوي امشيه


أتمنى إني اقدر اكمل هذا القرار لأخره ، وطبعاً التوفيق او الفشل من الله سبحانه وتعالى


لكني بطبيعة الحال اتمنى النجاح والتوفيق





هي خطوة مجهولة لا اعلم تبعاتها ولا اعرف نتائجها لكنها بذات الوقت خطوة جرئة


وتجربة كبيرة قد تكون غنية بالنتائج الإيجابية وقد تكون العكس


ولكنها ايضاً بالنهاية تظل تجربة كبيرة


والحياة برأيي ما هي إلا تجارب كبيرة


فما اصعب ان يقف الإنسان بعد مضي العمر ولا يجد في تاريخ حياته تجربة واحدة كبيرة





إن نجحت بها فما اجمل النجاح وما اروعه عندما تشعر إنك حققت شيء من ما تصبو إليه


وإن فشلت ، انا اكيد بأنها ستظل خطوة جريئة وتجربة لن اندم عليها مهما كانت عواقبها





اهي قريبة لكن مو بالقريب العاجل لا تبي لها شوية وقت


وانا في تطور الاعداد لها


بس صج اتمنى إني اخطوها وما يطلعلي شي يوقفني





ادعولي فكم انا محتاج لدعاء القلوب الصادقة





:)





---------------------








في خيالي احساس يسع الدنيا اجمعها


وفي عيوني حب للجميع





فلماذا لستي هنا يا صغيرتي الحبيبة


لماذا لا تنعمين بهذا الحب





لن اقول شيء يكدر خاطرك الحبيب


فقط سأقول إنني احبك كثيراً





--------------





اليوم شبعان نوم


قعدت متأخر الوالدة الله يطول عمرها قومتني علشان اتغدا


مسوين مموش


انا وايد احب المموش خصوصا مع توابعه





تغديت الحمد لله


وشربت شاي اخضر مع


ulker , deluxe wafers





والحين احس مخي متفتح


بروح السينما اشوف فيلم ويل سميث او امر ميشو في ارض المعارض عندهم معرض هناك


بروح اضحك عليه شوي


هههههه





----------





تعجبني الاغاني اللي لحنها هادي


مثل هالاغنية من الحان مشعل العروج





عادي





34 comments:

Bloggerista said...

موفق انشالله يا حسين :)

.....

المموش yummmmyyy
عليك بالعافية

.....

فيلم ويل سميث وايد حلو

enjoy your weekend :)

Purplecious said...

7oseeeeeeeeen

توني بسألك شفت الفيلم و لا لأ

هههههههههه

حدي متحمسه بعرف رايك فيه

شوف حتى لو ما اعجبك جاملني و قول حلوووووو

لووووووول

و الله يوفقك يااااااااااا رب في خطوتك القادمة و كل شي بالبدايه يكون مجهول و مع الوقت يصير تآلف مع الفكره و تقبل للوضع

أهم شي انك حاط احتمالات انجاح و الفشل جدامك عشان لا تتوقع الأحسن و تتحبط

بس انش شاءلله ماكو احباااااط و ماكو الا كل خير انشاءالله خلك متفاءل و أحسن الظن باللي كاتبه لك ربك

حسيت اليوم فيه شي غير بالبوست.. فيك شي متغير عن الأيام السابقة

نا تشوفني علقت

:)))))

اتمنى لك كل خير يا حسين من كل قلبي راح أدعيلك

و الاغنية وايد حلو
تسلم على الذوق الراقي مثلك

:)

Funny Q8i said...

اتمنالك التوفيق

وان شاء الله تنول مرادك (;

انت بس قول يا الله

==

ضحكتني على الاموّش قريتها ممّوووش :D

خلطه سريه هذي مالت الجاي الاخضر ;p

قولي عاد شرايك بالفلم

Tوتحيّا

Funny Q8i said...

نسيت اعلق على الصورة

هذي صج لي قالو خيم الليل ;p

الزين said...

خطوة يتبعها نجاح ان شاء الله

راح ادعي لك بالتوفيق




المموش مع شوية فلفل وحداق

الله يا حسين




والفيلم اكثر من رائع

بجيت لما شفته

من قلب



وعادي يا حسين

الله يا مزاجك رايق ويشبه مزاجي

:)


مسائك هادي بس مو عادي اكيد

Sweet Revenge said...

الله يوفقك حسين
وفعلا انا معاك خل الحب بينا والدنيا حلوه بس احنا
ما ادري شفينا ندور الحزن والشقي
تسلم حسين
:)

Sweet Revenge said...
This comment has been removed by the author.
كبرياء وردة said...

el-yoom 9ayer wise ya hussain

صاج والله الدنيا يومين ما تسوى نضيعها بالجفا والكره

لو كل واحد فينا عبر اطلق العنان للعاطفة اللي بداخله
جان حياتنا احلى بوايد
وجزء كبير من الفراغ فيها رح يمتلي

الله يوفقك باللي تتمناه ويكتب لك فيه النجاح:)

وعليك بالعافية على المموش
ما احبه مادري ليش:s

7osen said...

فاشيونستا

ياهلا والله ومرحبا

الله يسلمج مشكورة

والمموش فعلا لذيييذ
عاد مشتهية الحين يوعاااان

ههههه

الفيلم اكثر من رائع
استمتعت فيه لأخر درجة

مشكورة عزيزتي على هالطلة الحلوة
:)

charisma said...

الله يوفقك يا حسين واتمنا لك النجاح
وبدعييلك ان شاءالله
احسك متحمس :) الله يسهل امرك

ازرع الحب حولك وخل الناس إللي تعرفك تقطف هذا الحب


حب الناس وانشر الفرح ترى الدنيا قصيرة ولا تسوى لحظة حزن وحدة

اضم صوتى لصوتك

وعوااافى المموش ههههههه


وقولى رايك بالفلم
انا لى الحين بعد ما رحتله

7osen said...

بيربل

ياهلا والله ومرحبا

اولاً مشكورة من الاعماق على كلامج الطيب
ودعواتج إللي متأكد منها إنها فعلاً صادقة

وصحيح إنها خطوة مجهولة وكبيرة حيل لكني مستعد لجميع الاحتمالات
وإن شاءالله مايصير إلا الخير

بيربل شهالفيلم
الصراحة اكثر من روعة

لا تشوفيني بعد ما خلص الفيلم قعدت متأثر فيه طول الليل

الفيلم روعة
الفكرة ، التمثيل ، الاخراج ، الحوار
كل شي قمة
اكثر من مشهد اثر فيني حيل منها
لما سألها عن نفسها وقالت له اسأل السؤال هذا حق نفسك شنو راح تكون إجابتك
صراحة رده عليها كان شي غير طبيعي
وطريقته واهو يقوله مدهشة

يعني اهو كان إنسان متأكل بفعل الشعور بالذنب ، حاول إنه يكفر عن شعوره بالتسبب بقتل 7 اشخاص بالإضافة إلى زوجته إللى كان يحبها وااايد لكن شعوره المتزايد بالذنب تسبب بالنهاية بإنه يدفع عمره ثمن علشان ينقذ الناس إللي حبهم

استمتعت وايد
واستفدت وايد
ترى الافلام إللي من هالنوعية تضيفلك واايد
وتغني تجربتك الإنسانية
يعني مو مجرد تسليه واستمتاع

:)

شكراً لج بيربل
اتمنالج كل الخير

7osen said...

Funny Q8i
ياهلا والله ومرحبتين كبار

الله يسلمك عزيزي
اشكرك واايد على شعورك النبيل

وصدقني المموش عجييب اكله ماتطوف
ههههه
حياك خل اعزمك على اكله مموش محترمه

:)

الفليم عجيييب من النوع إللي افضله
استمتعت فيه لأخر درجة

اشكرك مرة ثانية صديقي العزيز

7osen said...

الزين

ياهلا بهالزين يا مية هلا

اهلا ومرحبتين

إن شاءالله يارب
الله يسمع منج

---
والمموش اممممم لذيييذ
خصوصاً مع التوابع

----
فعلاً الفليم اكثر من رائع
انا وااايد تأثرت فيه
كان ممتع بحق


وعادي كل شي منك عادي

:)
---------

مشكورة زيون على مرورج الجميل
اتمنالج كل الخير

7osen said...

Sweet Revenge

ياهلا والله ومرحبا

فعلا الدنيا بالحب والخير واايد احلى

:)

شرايج خلاص من اليوم ماندور إلا الحب والخير كلنا

ههههه
شرايج ؟

:)

شكرا لمرورج عزيزتي يعطيج العافية

7osen said...

كبرياء وردة

ياهلا والله

اييي شسوى انا اصلاً حكيم بس محد يدري عني
هههههههه

كلامج عدل
لو كرسنا حياتنا لصنع الخير والحب
كنا وااايد اسعد

يعطيج العافية على هالكلام المميز
تحياتي لج

7osen said...

كاريزما

ياهلا والله ومليون مرحبا بهالطلة الحلوة

شلونج كاريزما إن شاءالله بخير

الله يسلمج مشكورة يالغالية على كلامج الطيب ، وصحيح وااايد متحمس بس اتمنى ما يطلعلي شي ويعطلني
يعني متحمس وبنفس الوقت متخوف
لكن كله على الله

:)

الله يعافيج إن شاءالله

الفيلم روعة
واكثر
لازم تشوفينه
:)

اسعدني مرورج
اتمنالج كل الحب والامل

qesat_5ayal said...

نزرع الحب
ونحصد الحب

تدري هالعبارة ما تمر علي الا اذا كنت بموقف حزين جدا وعديته، احس الدنيا صج ما تسوى
لحظات الحزن لا تساوي شيء بالنسبة للحظات السعادة المحملة بالحب




الله يوفقك في خطوتك القادمة
في الحالتين تنحسب لك
اذا نجحت فهو نجاح
واذا لم تنجح فاهو تجربة

وان شاء الله تنجح
:)



شكرا عالاهداء الجميل
خوش اختيار
لحن هادي
:)





موفقك حسين بجميع امورك
ودمت بسعادة محملة بالحب
:)

Najmah said...

اسعدت صباحي بهالبوست
ليش حسيته دافي
:)

عسى ربي يوفقك ياحسين
وييسر كل امورك
ويكتب لك النجاح والتوفيق
بكل خطوة
:)


انا يوعانة
بس ماحب المموش
:\

AuThoress said...

يقولك شاعرنا الوردة


كن جميلا ترى الوجود جميلا

:)

Mariam said...

a7m ..:)

9a7 klamk o5ooy " aldnya g9eera oo matswa la7`9at 7zn "

-------

good luck :D

madri lesh a7s ank bt2lf kitab :Pp~

mwafag anshallah :D:D

-------

ummm

mmwash ..9ayra ma2kla
ana a7ba layn oo ma7a 9ayr y`9b6a :(:(

bs 3leeek bl 3afyabro :D

TReSTeN said...

الخطوة العملاقة هذي

اسمع فييها واايد هاليوميين

ومو بس منك من اثنيين تعرفهم جيبدا

هههههههه

بس انا ما اقوول

الا ماهلتش من قاطع ال محار

ومع تمناياتي لكم

بالتوفييق


واحسنت جزاك الله خير

7osen said...

قصة خيال

ياهلا والله ومرحبتين كبار

نعم ازرع حب واحصد حب

لازم تتذكرين هالشي وانتي باصعب لحظات الحزن
الدنيا ماتسوى الحزن
حبي الناس وخلي السعادة بقلبج

:)

الله يسلمج على هالكلام الطيب
مشكورة ياقصة العزيزة

:)

يسعدني هالمرور الحلو
اتمنالج كل الحب والامل

7osen said...

نجمة النجوم

اهلا وسهلا ومرحبا

إن شاءالله دائما وابدا صباحج حلو وسعيد

الله يسمع منج إن شاءالله

مشكورة واايد عزيزتي

اتمنالج كل الخير والسعادة

:)

مشكورة يانجمة النجوم

7osen said...

AuThoress

اهلا وسهلا

نورتي المدونة
سعيد جداً جداً بهالمرور الجميل والمميز

وصح لسان إللي قال

فعلاً إن كنت جميلاً سترى الوجود جميلاً


اتمنالج كل الخير والسعادة
وشكراً لج

7osen said...

virgin

ياهلا والله ومرحبتين كبار

اي والله الحياة قصيرة وماتسوى نعيشها بحزن

مشكورة واايد على التمنيات الطيبة

وإن شاءالله الكتاب بالطريج
بس لازم تشترينه

:)

والمموش انا وااايد احبه
لذيييذ


شكراً لج على هالمرور الحلو
اتمنالج كل الحب

7osen said...

ترستن

تصدق إنك صاير مو غثيث إلا لا تطاق

بس انا اكتشفت
إنك مو حاس بنفسك إنك صاير حدك مليق

على بالك إنك عادي
ههههه

ترى إنت صج صج لازم تبدأ بتنفيذ خطوات النظافة الداخلية لإنك في مرحلة خطرة حيييييل

دير بالك لا تنفرط السبحة

بعدين حتى النظافة ماتنفع

وشكراً على تمنياتك

PearL said...

الله يوفقك يارب باي خطوة تبي تاخذها سواء كبيرة ولا صغيرة


فيلم ويل سميث عجيييييييب

وايد يبجي
واذا كنت تذكر
هذا دليل كبير ان الفيلم عجبني :))))


بالتوفيق يارب .. تستاهل كل خير

7osen said...

بيرل

اهلاً وسهلاً من الاعماق

:)

يسعدني جداً إنج متواصلة

هنا دائماً لكِ مكاناً خاصاً
فقط للعزيزة بيرل

الله يسلمج ويوفقج إن شاءالله
حيييل فرحني كلامج

--
والفيلم فعلاً رائع
وحيييل يبجي
انا والله لما شفته قعد متأثر فيه طول الليل

الصراحة تمثيله كان رائع
ملامحه كانت حزينة بطريقة محترفه

فلم جميل رغم الالم


اشكرك جداً لأنكِ تمرين من هنا

لك كل الامنيات الجميلة
ومساؤك سكر

:)

أتيت متاخرة said...

شوف حسين
آنه ما بحبطك مثل ما تحبطني

ربي يوفقك
وييسر امورك
ويكتب لك بكل خطوة نجاح
شكلك ناوي على شي كبير
مو تعرس وما تعزمني !!!!!

يا حلاة توابع لموش
يمي يمي

بنت أحمد said...

واااااااو

شوهالتدوينة الحلوة

بس ماقلت لنا وش مخطط عليه الأيام الجاية

بالعافية المموش

//

يحفظك ربي

@alhaidar said...

أقبل ..

وشرف التجربة يكفيك :)

موفق انشالله ..

7osen said...

اتيت متأخرة

ياهلا والله ومرحبا

مشكورة على عدم الاحباط
:)

لا انا مأجل هذا الموضوع إلى اشعار اخر

هههه

مشكورة عزيزتي
اتمنالج كل الخير

7osen said...

بنت احمد

ياهلا ومرحبا والله

ناووي على شي كبير وااايد

:)

مشكورة عزيزتي على مرورج الجميل

اتمنالج كل الخير

7osen said...

احمد الحيدر

ياهلا والله ومرحبا

ان شاءالله الاقبال ما يتعرض إلى احباطات
واكيد التجربة لها شرف كبير

مشكور يالغالي على المرور الجميل

:)