2/07/2007

ليش احيانا ما نلقى شيء نفرغ فيه طاقاتنا المخزونه

او مشاعرنا العنيفه بكل حالاتها

اذا كنت حزين بشكل كبير او سعيد بشكل كبير او معصب بشكل كبير

تحتاج انك تفرغ هذي الطاقه من العواطف بشكل ما يأثر على احد


انا فرغّت طاقتي العنيفه في هذي المدونه

مسحتها ،،، بمجرد ضقطة زر

مسحت كلمات كتبتها من داخلي ،، مشاعر عبّرت عنها بصدق

مسحتها بدون ما احس بالذنب في وقتها

لكني اكتشفت اني احب مدونتي ،،، احب اضيع على بياضها

احب اتناثر فيها ،،، احب اقول احساسي افكاري مشاعري

جنوني ،،، حزني ،،، حتى غبائي احب اني اكتبه على هالمدونه

ليش مسحتها

لأني مريت في لحظه مجنونه

لحظه ابي اعبر فيها عن شعوري لكني مو عارف شلون

ما لقيت الا هالمدونه افرغ فيها ضيق متكتل كان محتل مساحه كبيره من صدري

مسحتها ،،، بعدين حسيت اني ارتكبت حماقه

ليش يعني ،،، انتقمت من شي احبه ،،، شي قريب مني واااايد

مادري

قريت في احدى المدونات موضوع مشابه لما حصل معاي

اعتقد اذا مو غلطان مدونة الاخ العزيز سلوقا بولوقا

موضوع لما نتصرف تصرف معين بعدين نقول ليش سوينا جذي

وما نلقى اجابه

وانا ما لقيت اجابه على سؤال وجهته لنفسي

ليش مسحت المدونه مع اني وااايد احبها

مادري

لكني اكيد ادري ليش رجعتها

*********

اهداء

تودعني وتتركني وانا بحالة ذهول

وتهرب صورتك مني مع الطيف العجول

واستنجد بأوصافك وافشل غالب الاحيان

تخيل اني ما اعرف عيونك ايش من الالوان

( تركي )


اهداء اخر

عيون ما تشوفك يا بعدها وش تبي بالشوف

ودنيا منت فيها العمر كلها مالها معنى

14 comments:

AseeL said...

ma yashoof shar el blog.

o mabrook 3al radda

fe mathala ygool ma yegdar 3ala oboy gedar 3ala omy... a3teqed inna yen6ebiq 3alek o 3ala kel wa7ed mit-thayeg min a7ad or shy.

ta7yaateeee

May said...


welcome back :)



حتى أنا أمس استغربت

كل شوي أدخل ويقولي ما فيه

قلت بهالسهولة راح

بس يالله

عوداً حميداً

الاء سعود المجيبل said...

:((((

نفس اللي صار معاك صار معااااي بلحظة غضب مسحت كل شي كتبته .... قبل كنت اكتب عن كل شي عن حياتي الشخصيه عن احاسيسي عن مشارعي عن الحب وعن وعن .... بس عقب اللي صار لي للأسف اغلب كتاباتي صارت قص ولزق...:(


بس والله اول ما دخلت انصدمت قلت ليش؟؟؟؟؟ وينهم وين راحوا ؟؟؟؟ ليش مسحت كل اللي كتبته ؟؟؟


انا اقتنعت بالاخير ان ماكو شي يسوى .....بس الواحد بلحظة الغضب ينسى كل شي ويتهور وتالي يندم..:(

barrak said...

حرام عليك
حس بناس وانا واحد منهم يتنفسون كلماتك
حس بناس
يعيشون مع صورك ولقطاتك
حس بناس اول شي يقرون اختياراتك من الاشعار اللي بالسطر الاخير
لازم اتعرف اخوي ان احاسيسك بعد ماتسطرها ماتصير ملكك اهي حق لي ولغيري
من الناس اللي يتنفسون احاسيس عذبه
انا واحد من الناس اذا ابي اضحك ومالقيت موضوع انور شلون بضحك
انا مااحاسبك استغفر الله
بس لاني احس بتشابه كبير فيما بيننا
كل مااكتب موضوع جديد باه يابلد تطلعلي كلمة ديليت
اخاف احوشها واضيع
كل اللي بقوله اذا جتلك حاله نفسيه سعيده او مو سعيده
حط ببالك ان كلامك يساعد في ترتيب حياة ناس
وانا واحد منهم
ديربالك علي

Breeze said...

إي والله ليش مسحتها ؟؟
:(((

أنا عن نفسي كوني من المتابعين الأوفياء لمدونتك ..

صدمت ..
ذهلت ..
وحزنت كثيراًً !!!!

عندما وجدته مغلق !!!! :(((( كنت أود أن أستفسر عن السبب بأي طريقة .. لكني لم أكن أملك أي عنوان بريدي لك ..

وها أنت تعود إلينا من جديد :))

حمدالله على السلامة :))

دع ما فات يموت .. ولا تتحسف ..

لربما إنهاء المدونة عن طريق مسحها و من ثم الرجوع الآن هو بداية لشيء ما جديد

أتمنى ذلك من كل قلبي

وأتمنى أن لا تكررها
:(

vinus said...

هو هذا الفرق بيننا و بين غيرنا اننا نكتب لاننا لا نعرف ان نتكلم بل نعبر عن انفسنا بالكتابة و نفرغ بها عن كل احاسيسنا و نحن نحب ما نكتب لاننا نكتشف ان ما قد كتبناهو جزء منا ولا نستطيع الاستغناء عنه

Anonymous said...

7osen ...

shof eshlOn eb la7'6a:

- 7ob ekbeer yet-haddam

- 7elm 7elo yetlasha

- Amal eb3eed yet7a6am

- 7aYat tentehi

o kel hatha eb simple action ... 7araka es'3eera ... kabsat Zer o ma7ait a7aseees moddat-ha akthar mn 6 months

beNehaya ehya a7aseesek enta o el 8arar 8ararek enta

en chan hal 3amal yar'6eek ... ethan la tet7assaf 3alaih !

Regards,
ENG-Q8iya

Purplecious said...

يالله شد حيلك و بتعوض اللي انمسح انشاءالله

لأنك انسان المشاعر عندك بحر ما ينضب

مشاءالله

كنت دايما أزور مدونتك
أقرا
استمتع
اندمج
أبكي
اتفاعل

بس ما اعلق

مادري شيصير فيني ينربط لساني
و ما اعرف اكتب و لا كلمه

ولا تندم على ما فات
بس هالمره ارجو تخلي نسخه احتياطيه
باك اب حق كتاباتك

و الله يوفقك

Romia Fahed said...

=== 7osen ===



عرّفتَ نفسكَ ::

انسان بكل ما لهذه الكلمه من معنى

وعندما قرأنا حروفك وتأقلمنا مع مشاعرك التي وشتْ بـ أشياء جميلة تسكنً إنساناً عذب الحرف ومرهف الحس

خرجنا بـ نتيجة أنكَ إنسـان مفرط في إنسانيته أي تجاوزتَ حدّ الكلمة ..

لـن أعاتبكْ .. ولـن أزيد فوق كلام الكريم براك حرفاً وكلام المشاركات الرقيقات كلمةً ... جلّ ما أقوله
عندما تكتبْ ونحن نقرأكْ .. ثق بخروجك من نطاق الخصوصية إلى المشاركة العامة

يعني

نطالبك بالحق العام :) ...إذا حذفتْ المدونة ثاني مره ...

نور الوجود

LORD.M.M said...

تراني دريت انك جنيت و تركتها

قلت في نفسي ..لحظة طيش و غضب بيرجع عنها

الحين تبغي عقد جديد و مهر اكبر لها

و حاذر ..ترى بعد الثلاثة ..ما ترجعلها

عودة مبروكة و ان شاء الله ما تفترق عنها

تحياتي

7osen said...

:Miss Writer

الشر ما اييلج

والله يبارك فيج


حلو المثل حبيته

فعلا الواحد دائما يفرغ غضبه بأقرب شي له

للأسف ان هذا الشي دائما يصير

شكرا على المرور

بالتوفيق


========

: MiaMi

اهلا عزيزتي

شكرا على كلامج الطيب

وتحياتي لج

مشكوره

======
: Q8ya

هذي المشكله

لما الواحد ما يقدر يكتب الا الشي اللى يشعر فيه

واحيانا تكتب شي وتحس انك ترتاح

بعدين ترد وتندم على اللى كتبته

وفعلا ما في شي يسوى

شكرا لج

=======

: براك

اهلا وسهلا

الصراحه كلامك اخجلني من نفسي

مادري شقولك

انت تملك طريقه بالكلام وااايد مميزه

كلماتك اسعدتني وانشاء الله هذا الشي ما يتكرر

شكرا لك اخوي براك على احساسك المرهف

اتمنالك كل التوفيق

========

:Breeze

اهلا عزيزتي

اشكرك كثيرا على كلماتك الطيبه

وليش مسحتها ؟؟

كانت لحظة غباء


الله يسلمج

واتمنى انها تكون بداية شي جديد

مشكوره واايد على شعورج الطيب

اتمنالج السعاده

=======
: vinus

كلمتك جميله جدا

بالفعل ما نكتبه هو جزء منا

وهنا تكمن صعوبه الاستغناء عنه

شكرا لمرورك الرائع

تحياتي

=====

:ENG-Q8iya

اهلا وسهلا

وااايد حبيت تعبيراتج

اثرت فيني

حب كبير ايتهدم

حلم حلو يتلاشى

امل بعيد يتحطم

حياة تنتهي

ايي والله ،، كل هذا بحركه صغيره

مادري شقولج

المشكله انها حركه صغيره

مشكوره عزيزتي

========

: Purplecious

شكرا لج

حقيقه يسعدني كلامج

واشكرج عليه وااايد

وانشاء الله بشد حيلي

هذا شي يسعدني انج تتفاعلين مع ما
اكتب

شكرا لوجودج

لك اجمل تحيه

=======
:نور الوجود

سعيد بوجود نور كلماتك هنا

حقيقه اخجلتني كلماتكم جميعا

ولا اعرف ما اقول لك
احيانا الكلمات ما تقدر تعبر عن الشعور

لا املك الا ان اقول

شكرا من القلب

شكرا لعذوبة تعابيرك

تحياتي لنور وجودك

7osen said...

:لورد

شكرا لك عزيزي لورد على

هالكلام الطيب

وانشاء الله ما راح توصل للثلاث

وتستاهل المهر اللى تبيه

شكرا عزيزي

انتم اكبر كنز الواحد ممكن يحضى فيه

charisma said...

جنك تتكلم عنى
انا مثلك
فينى طاقه وفينى مشاعر فياضه
ما ادرى وين اطلعها وحق منو
مانى لاقيه الى يستاهل ويحس فينى ويبادلنى الى احسه
احس الى فينى محد يعرفله

قمت اكتب بالبلوق الى ابى اعيشه والى احس فيه
ابى افرغ عشان لا انفجر
حتى لو كلامى خيال ولا هو واقع
ولا هو حقيقه بس اتكلم واستمتع بلحظات لو حى من وحى خيالى
انا استمتع بالرومانسيه والمشاعر هذى
ولقيت البلوق مكان مناسب انى اخفف الى فينى

الخيال متعه ولذه الصراحه

7osen said...

: charisma

للاسف هذي اصعب حاله تمر على الانسان

لما يكون مليء بالمشاعر

لكنه ما يلقى المكان المناسب للتعبير عن هذي المشاعر

انا اقولج فعلا الكتابه اهي احسن شي للتفريغ عن الطاقه العاطفيه

والخيال دنيا جميله كل شي فيها ممكن

اتمنالج كل السعاده

تحياتي لج