5/07/2007

طبخة

احيانا اكون ابي اكتب باللغة العامة ،، ولما اكتب واخلص واقرا ما كتبته

اضحك وامسح ،، احس اني قاعد اسولف مو قاعد اكتب

احيانا الواحد وده انه يسولف بالكتابة ،، رغم ان فيها تشويه للكتابة

لكني اليوم احس اني ودي اسولف

:

امس كنت راد البيت الظهر وكنت قاعد اسمع محطة المرينا ،، برنامج الديوانية

طبعا يقدمه خالد الانصاري ومعاه جم واحد وكانت معاهم المذيعة يمنى شري

كان الموضوع عن الزوجات اللى مايعرفون يطبخون ،، طبعاً بما ان اقصر الطرق لقلب الرجل معدته

فكان هذا الموضوع مطروح للمناقشه

المهم

دق واحد اسمه عبدالرحمن ،، اسلوبه كان جنه قاعد يكلم واحد من الربع بالديوانية

قالوله شرايك بالمرة اللى ماتعرف تطبخ حق ريلها

جان يقول بلهجة المستقرب

ماتعرف تطبخ ،، ؟؟

واعقبها بلهجة سي السيد

فناقر ؟؟؟

طبعاً انا صج مت من الضحك ،، بالشارع وبالسيارة بروحي وميت من الضحك

واللى يضحك اكثر ان يمنى قاعد تسألهم شنو قال ،، وفي واحد معاهم فصل من الضحك

جان يقولها خالد صعب اشرحلج لكني راح افهمج اياها ،، يعني يطردها بأسلوب غير لائق

( اهم شي الشرح )

واحلى شي بالموضوع يمنى علقت على الكلمة بلهجتها اللبنانيه ،، فناقر

عاد انا حاولت اني اشارك معاهم ودقيت عليهم بس مافتح الخط

لأن بعد هالاتصال صار في سيل من الهجوم النسائي على هالمسكين اللى قال فناقر

بس والله قويه

للحين قاعد اضحك عليه

هذا ،، ضرب بمبدأ اداب الحوار والكلام بعرض الحائط

طبعا الموضوع مكرر واايد ومعاد

زين بنيه ماتعرف تطبخ يعني شنو ،، ما تتزوج ؟؟

بس بالعموم انا اعتقد ان الطبخ شي مهم لازم يتعلمونه الجنسين

لأنه واايد مفيد ،، واايد ممتع ،، فيه فوايد وااايد

يعني لما يكون الواحد فاضي وماعنده شي يسويه يقدر انه يملي وقت فراغه ويبتكر طبخات

ويبدع بعد ،، صج والله هذا المجال تقدر انك تبدع وتسوي انجازات كبيره فيه

انا عن نفسي احب اطبخ ،،، واتمنى اني اصير محترف ،، رغم اني ما امارس واايد

لكني لما اكون فاضي وعندي مزاج اروح اسويلي اكله مبتكره خفيفه

والله صج ونااااسه

،،،،

نصيحة للجميع تعلمو تطبخون ،، وراح تحسون بمتعه حقيقية وبشعور واايد حلو

*****

لكِ

كل يوم يمر احسك اقرب

صرت عايش معاك بكل تفاصيلي

مادري وين رايح ،، بديت افقد السيطرة

خلك يمي ،،، انا وايد محتاجك الحين

اكثر من ما تتوقع

****

على ايقاع اصابعها
بدت سنفوني الاهات
ونبض قلبي بدا يعزف
على كل المقامات

كاظم الساهر

16 comments:

TReSTeN said...

ترى على فكرة الرد كان منطقي مية بالمية

وانا من مؤيدي هذا المبدأ بشدة

واذا على طاري الطبخ

ف طافك طعج بقة بالمخيم

طعج من طعج على اصوووله تجربة مميزة لايطوووفك

PearL said...

بيت موضوعك بالكويتي الفصيح
:)

انا استانس على نقاشات الديوانية وبصراحة موضوع المهر اليوم قهرني

ومرات وايد يطرحون مواضيع ودي لو ادق عليهم
بس للاسف ماعرف رقمهم


بالنسبة حق الطبخ
الصراحة الحين الوقت ما يسمح حق الطبخ

الريال لما بيتزوج يبي وحدة موظفة
واغلب الموظفات دوامهم الساعة 2 يخلص
متى يمديها ترد وتطبخ
لا واذا يه الريال نفسيته بخشمه وقبل ما يدخل البيت سمعت صوته جهزي الغدا

هم مو معقولة تخلي الاكل بايت وتطبخ من يوم قبل

بس حلو ان الواحد عنده استعداد يدخل المطبخ
يعني حق الويك اند
او حق التغيير

sologa-bologa said...

موضوع الطبخ
اسألني عنه

أيام ما كنت خارج البلاد
كل خميس مو بس خميس
كل خميس وبس
لازم أدش المطبخ
على اعتبار إني عايش بروحي

كنت أبتكر شغلات غريبة بس تنوكل
:))

أهم شي العجة
بيض مع جبن كرافت ومشروم
واذا بكشخ شوي أحط فلفل أخضر

طبعا برياني الربيان
ما يبيله
لأنه بسرعة يستوي

ودايما أسوي شوربة المكرونة وشوربة الخضرة
مع الزبدة
وعلى فكرة
الهمبورجر ما أطبخه إلا بالزبدة
حق الكوليسترول
:)

مرة قررت أبتكر شي غريب
معكرونية بالتونة

الحمدلله سويتها مرة وحدة
وما جربت أسويها مرة ثانية

والله كانت أيام

يعني الحمدلله ما أحتاج اتزوج
مطبخي مني وفيني

ودمتَ بحب وود

7osen said...

:TReSTeN

اكيد انت اول واحد ايأيد هالكلام

اصلا انت المفروض يسمونك عدو المرأه

فيها فناقر اكيد اتأيد

اما طعج بقه

الصراحه سمعت عنه الكثير بس للاسف ماحصلي الشرف اني استمتع بما جادة به انامل بقه


:))))

================

:بيرل

اهلا عزيزتي

ايي الصراحه برنامج حلوو رغم بعض الملاحظات البسيطه على بعض الكلمات
اللى يقولونها المذيعين

لكنه بالعموم واايد ممتع ومضحك

كلامج صحيح ان الموظفة ماعندها وقت للطبخ ،، وهذا شي محد يقدر يتكلم فيه

لكن اذا كانت ماتعرف تطبخ هذا شي ثاني

المفروض على الاقل يكون عندها فكره عن الطبخ

:)

اعتذر منج عن التعليق مالج اللى في البوست اللى انمسح لاسباب خارجه عن الارادة

سوري

تحياتي لج
وبالتوفيق

===============

:سلوقا

هلا باللي عليّ اقبل
نورك ولا ذي القمره


والله ضحكتني من قلب على مو بس خميس كل خميس وبس

تذكرت منيره عاشور لما تقولها

الله يا مبدع

والله يا اخي العزيز الطبخ فن
وشي جميل وايد انك تعرف تطبخ

فيه متعه لما تدش المطبخ وتبتكر شغلات واكلات يديده صج وناااسه

اهم شي برياني الربيان عجييب
احلى شي عندي الربيان

والهمبورجر احلى شي تقطعه قطع صغيره مع بطاط وطماط قطع صغيره بعد وتقليهم مع بعض خلطه عجييبه

ولا والسلطات عاد اهنيه الابداع

معكرونه بالتونه
اكيد طلعت اكله عجيبه

:)))

لا عادي جرب احلى شي التجربه منها تتعلم 0

تحياتي لك عزيزي

بنت الشاميه said...

هل ضرورى المراة تطبخ؟؟؟؟

يعنى الريال يتزوج بنت الناس عشان

تطبخ له.....تروالى لازم هالمفهوم يتغير


ترى الطبخ هوايه ناس تحبه وتجيده

وناس ما تدانيه بعيشة الله


ترى الطبخ موهبه ونفس ....على قولت

المصاروه

ودمت بمحبه

ana_sokkarah said...

مرحبا حسين بالنسبة للكتابة بأي لغة ترى عادي لاهو تشويه ولاشي المسأله انا نحاول نكتب بلغة تكون مفهومة عند الأغلبية من القراء

وبالنسبة للديوانية سمعته أمبيه مت من الضحك عاد فناقر يزاك الله خير.. أوفيييه لازم اطبخ عاد موضروري والله أمي مسيجينه عيزت مني يابنيتي طبخي تعلمي قاعده ماعندج شغل حاولي عالأقل باجر الناس بياكلوني بالحجي ليش ما علمتكم وريلج بيلومني و و و و .. عاد مانخلص إنزين مو الواحد لازم يحب الشي عشان يبدع فيه آنا ما أحب الطبخ أصلا ماأحب ريحة الطبخ استغفر الله وبعدين لما أتزوج راح أحاول فيه وأجرب فيه ليش أهو مو ريلي ومعاي عالحلوة والمره خلاااص لازم يتحمل تجارب طبخي لمّا أضبط اللي يبيه لااا وشرط يبيني أدش المطبخ ياكل كل اللي طبخته مالح ماصخ اللي يصير موشغلي لوووول وعليّه شكله من أول ذواقه بيطيح بالمستشفى
الله يستر هاهاهاي
عشّون عيل اهو ماخذني عشان اطبخله خليتحمل اللي بييله

الله يعطيك العافية موضوعك وايد حلو

Anonymous said...

كنت قاعده أتسمع لوووووووووووووووووووووول
امبيه فصلت من الضحك وهم كنت بروحي حسيت نفسي مينونه ...
بس لا هذا مايستحي شنو فناقر !!
اي شي لازم اعرف اطبخ عشان اتزوج !!!
عاد انا ماعرف اطبخ بس اعرف اسوي قهوه عربيه يبي والا كيفه بيت اهلي مو عيزان عني

بس لا اهم شي لما يمنى علقت عالكلمه لا ولما قالت " الفنقره " لوووووووووووووووووووووووووووووووووووووووووووووووول




هههههههه حلوة فناقر هاذيــ



!!!!!
سي سيد مايمشي حاله ألحين !!!!
يعني احنا فاضيين شنو مطبخ!!! ماكو وقت !!! ندرس و لا نطبخ!!!
وبعدين خلص انا الحين عقب ما عايشت الدنيا!!!!!!!!!!!! (أخيرا!!!)عرفت ان ماكو فرق بين البنت و الولد و دام يت على الطباخ يالله خل يتعلم معاي يوم علي و يوم عليه أنا بعد برجع من
الدوام تعبانة .. هههههههههههههههه
و انا الحين و حتى البنات الي اعرفهم ما نعرف .. اوكي انا ممكن اسوي اومليت حدي اخاف من الجولة ماكو شغل يعني فيني فوبيا ههههههه

يعطيك العافية !
موضوع وايد وايد نااااايس




بنت المطبــــــــه

Kuw_Son said...

صراحة برنامج الديوانية ممتع جدا !!

بس حسافة أنا في الدوام و ما أقدر أسمعه .. ساعات أكون طالع من الدوام أسمعه ..

والله هذا بطل الصراحة اللي قال فناقر هههه

أنا سمعت حلقة المهور .. و كلام ماكول خيره و خالصين منه ..

لكن بس نسمع النقاشات و نفرفش ساعات

حلو الواحد يغير و يكتب بلهجة عامية ..

ترى ان صارت السالفة كلها فصحى تصير ماصخة حيل

charisma said...

طلعاو فيها طلعه الاف ام فى هالبرنامج
حدا يموت ضحك
:)))

بس كل المشاركات ترى مو جاده ما عليك منا بوفناقر هذا تلاقى مو قادر على مرته ياى يستسبع بالاذاعه
هههههههههههه
ما عليك منا

وين قاعدين فناقر
هههههههههههههه

ادش المطبخ عن طيب خاطر انااا ابى اسوى شى حقه افرحه بس مو اعتماد كلى
بالويك اند
والله انا مشتهيه اسوى شى اى اوكى

بس انا اصير طباخه لا ما يشوف شر
ماكو شغل
ههههههههههه
والدوام بالله شلون
ههههههههههههه

الحين غير واول غير
:)

وموضوع الكتبابه بالعامى اسالنى عنه
ما اعرف اكتب الا بالعامى
باللغه العربيه احس ما ابرد جبدى
ما اتساعفى الجمل كلش
ههههههههههههههه
بالسوالف احس توصل الملعومه الى انا ابى اوصلها
:)

عساك دوم تضحك
:)

magnoonah said...

انت شنو تحب تقول اكتب بطريقة لا تصنع ولا تمثيل فيها بالعكس كون على طبيعتك وانا اضمن لك انه وايد راح يحسون فيك عشان جذي عبر عن نفسك بطريقتك المعتاده ومثل ما انت تحس غيرك راح يحس فيك


بالنسبه لكلمة فناقر انا سمعتها مره من واحد كان على باله انه ظريف بس لما شاف ويهي والصدمه الي فيني سكت وما عادها
ممكن يقول ازفها او ازعل منها او اطردها بس فناقر وين قاعدين ؟


اما الطباخ فانا اخذته كهواية والله يخلي اخواني (الكرش العوده وزعبول) من حبهم للاكل كل ما اطبخ شي ويحبونه يخلوني اسويه مليون مره جنه عقاب


عاد انت شد حيلك وتعلم عدل عشان اذا تزجت نمدحك عند مرتك ونقول انك فل اوبشن

7osen said...

: بنت الشامية

اهلا وسهلا فيج


انا اعتقد ان الطبخ ايي ضروره

مهم جدا ان الشخص يتعلم على الاقل اساسياته ،، سوا الريال او المره

وبما ان عاداتنا ومجتمعنا يلقي بهذا الجانب دائما على عاتق المرأة فلازم تتعلم

لكنه بالتأكيد مو فرض او شرط
بس اهو شي ضروري اكيد 0

شكرا على مرورج عزيزتي
وحياج الله

=============
: ana_sokkarah

اهلا عزيزتي

بالنسبة للكتابه اهو فعلا ان اللغة العاميه حلوه وتوصل الكلام بطريقة سهله ومفهومه لكني مادري احس انها مو كتابة

:))))

والله حتى انا مت ضحك عليه

ايي ليش تعبين امج ؟؟

عاد تعلمي ،، صدقيني واايد ممتع الطبخ

انتي جرب مره ومرتين وثلاث وراح تحبينه وتتعلمين وتصيرين شييف بعد

والله صج الطبخ فن جميل

يالله تعلمي علشان زوج المستقبل انشاالله

لأن اقصر الطرق لقلب الرجل معدته

:))))))

حياج الله
تحياتي

7osen said...

: بنت المطبه

اهليييين وسهلييين

في بنت المطبه

تصدقين احلى شي بكلامج انج سمعتي يمنى لما قالت ( الفنقره ) ؟

حدهاا تحفه


تحياتي لج

وخلينا نشوفج

*_^

7osen said...

: Kuw_Son

اهلا اخي العزيز

اهو فعلا ممتع ويضحك بس فيه اشياء اعتقد شوي مبالغين فيها


والله هذا مو بطل هذا في كلمة ثانيه تصلحله بس تمنعها الرقابه
على وزن بطل

في احد يقول فناقر على مسامع الناس وعلى الهوا

وين الاداب وين الاحترام


فعلا احيانا التغيير حلوه
مو دائم فصحى

حياك اخوي
تحياتي لك

7osen said...

: charisma

اهلا عزيزتي

ايي والله البرنامج حده يضحكك

تصدقين انا بعد مثلج قلت هذا يااما مو متزوج يا اما يخاف من مرته

شكله ياي يطلع حرته

ههههههه

انا معاج ان الوحده اذا كانت موظفه صعب انها تطبخ كل يوم

بس المهم انها تعرف تطبخ

يعني لا اشتهى ريلها شي من ايدها تكون عند حسن ضنه وتشبعه بأكله حلوه

:
اما الكتابه اهو كل واحد حسب الشي اللى يرتاح فيه

بس لما تكتب بالفصحى تحس انك صج كاتب شي
بس العاميه سوالف

:))

7osen said...

: magnoonah

اهلا وسهلا

فعلا كلامج صحيح الواحد يكتب باللي يحسه احسن

اذا بالعميه او بالفصحى المهم انه يعبر عن اللى في نفسه


تخيلت شكل اللى قالج فناقر اكيد ويهه قام يعطي الوان
:))))

احلى شي اسامي اخوانج يصلحون مسلسل كرتوني

بس زين يسوون على شان تتعلمين طبخ عدل

زين انج تعرفين تطبخين وانا انصحج تعلمي اكثر وجربي اكثر راح تستفيدين واايد

وانا لو بس عندي وقت جان صرت شييف

احلى شي لما تسويلك طبخه وبعدين الناس تتمتع فيها

شعور رائع
:))

شكرا على مرورج عزيزتي
دمتي بكل خير

Anonymous said...

تدري شنو أهم و احلى ميزة بالطباخ ؟


...


إنك تاكل إللي تشتهيه و علــــــــــى كيف كيفك


ENG-Q8iya