12/01/2007

سوالف ريجيم














كم تضاحكتَ عندما كنت ابكي

وتمنيت أن يطول عذابي


كم ظننت الأنين بين ضلوعي


رجع لحنٍ من الأغاني العِذابِ


وأنا أحتسي مدامع قلبي

حين لم تلقني لتسئل ما بيّ


أعتقد هذي قصيدة عبدالله الفيصل

***


هالأيام الجو وااايد حلو



وبصراحة أهو مو بس حلو ألا رائع





وبما إني مسوي ريجيم قاسي



وأهم شي قاسي



فمستمتع بالرياضة على البحر


اليوم كان الجو الظهر خيال ،، البحر هادي حده جنه توه قاعد من النوم



والغيوم متناثرة فوقه بلونها الأبيض الناصع



والنسمة إللى تنعش الروح







يعني صج جو مثالي حق الرياضة



والرياضة أنا لي معاها قصة طويلة


مشكلتي إن وزني دائماً قابل للزيادة وأيضاً قابل للنقصان



علشان جذي دائماً أمتن وأرد اخسر الوزن إللى زدته



والشي إللى خلاني في هالحالة أهو الإصابة اللعينة



من زمان جداً أنقطع عندي الرباط الصليبي مال ريلي اليمين



وسويت عملية وبعد سنة تقريبا من التأهيل الحمد لله رجعت سليم

وطبعاً بما إني مدمن كرة قدم

رجعت العب ومن سخرية الأقدار إني اتعور بنفس الأصابة في ريلي اليسار هالمرة


ورجعت سويت عملية ثانية

لكن هالمرة للأسف مادري شصار صابتني خشونة في الركبة

وهذا الشي جداً مسببلي الم مستمر

وطبعاً ودعت الكرة

عاد كنت بقمة مستواي

هههههه


على شان جذي صرت أمتن بسرعة

رغم إني دائماً أحب اسوي كنترول على وزني


وما اخليه يتعدى حد معين مهما كان


لكن في الفترة الأخيرة أندمجت شوي


خصوصاً مع تجمع الشباب في الديوانية والعشيات تالي الليل

يعني يوم مبارة ريال مدريد أذا فازوا أهنيه النفس تكون مفتوحة على الأخر


ومايحتاي شوية تشيش لترستن وبظرف أقل من ساعة تكون وليمة كبيرة جاهزة


:))


وطبعاً هذا الشي خلاني أتجه إلى منطقة خطرة

بديت أقرب من الثلاث أرقام

ههههه


مع العلم حتى لو وصلت لهذا الرقم ماراح يكون باين عليّ

بسبب الطول

يعني طولي 189

ووزني قبل الريجيم وصل 98

لكن الحين بعد شهر من الريجيم

وصلت إلى 90

يعني إنجاز

والشي المضحك بالآمر إني سويت ريجيم تحدي مع شخص ما

وبعد هالشهر المسكين يمكن نقص كيلو مادري أثنين


هههههههه

وأنا اقوله هاردلك لا تتحداني بشي لأنك دائماً راح تخسر


:)


صراحة شي واايد حلو لما تخسر هالوزن

وأنا إن شاءالله مصمم إني أوصل الوزن المثالي

وأهو مابقالي شي بس تقريباً خمسة كيلو وأوصل


بس هالتجربة يعني شقول صج مريرة

ههه

يعني أنا أحب الأكل وحارم نفسي حدي

طبعاً ريجيمي أرتجالي ما أحب أسوي ريجيم من دكتور أو أخصائي


أنا صارت عندي خبرة أكثر من أي واحد


يعني ريجيمي بكيفي


اليوم مثلاً للحين مو ماكل ألا اربع قطع شابورة سمرا وموزه وتفاحه وقلاص حليب خالي الدسم

يعني عذاب


بس يالله من طلب الرشاقة

ترك الأكل



:)


بس والله وناسه على طول أحس نفسي خفيف

وأحس إني مسوي كنترول على نفسي

ومعدتي حدها مرتاحة


أنصحكم سووا ريجيم

تضامنوا معاي


:))


*******

أخيراً


إهداء

إلى

وطن عمري











34 comments:

sologa-bologa said...

اشقصدك يعني

ما كو عشا
:p

ترا ما يمشي عندنا ريجيم ما ريجيم
وأعوذ بالله من الشيطان الريجييم

مالي شغل إنت قلت

تتتتمممممممممممممم

:)


ودمت بحب وود

esTeKaNa said...

مشالله تبارك الرحمن
احب احساس الانجاز بكل شي
وخصاه بعد تعب واصرار وعزيمه
انته قوي
مشالله
:)
الجو حلو وكل شي يساعد على الاكل
وشعدتني على سالفه مشي البحر
بخاطري اروح بس انا خوافه
واذا صرت بروحي يزيد الخوف اكثر
!!
استمر استمر
وعاشت الرشاقه يا حسين
:)

78o8eYa said...

صبحكم الله بالخير
^_^

الصورة تضحك
:))

أهنيك على انجازك خلال شهر
ولو إن ريجيمك يخرّع
..
شلون جذيه ما تآكل شي
:/

ترا الريجيم مو معناته تموّت عمرك من اليوع

تآكل بإعتدال
وتتجنب نوعية معينة من الأكل

وموفق بالريجيم الصحي واللذيذ
*_^


سلامتك من الإصابة، أجر وعافيه إن شاء الله
..


وبـ أتليقف وأقول
مشكور على الإهداء ، لأني أحب هالغنايه
;$

Najmah said...

صباح الخير

ماشاءاالله الله يتمم عليك عزيمتك وارادتك

الجو عجيييب مايساعد على الرجيم :")

بالتوفيييق


والكلمات اللي اول البوست حلوة حيل

7osen said...

: سلوقا بلوقا

ياهلا ومرحبا

هلا بالطيب الغالي


لا لا لا مو قصدي

أصلاً أنا مسوي ريجيم علشان هالعشى
راح يكون يوم مفتوح مكافئة على انجازي

ههههه

اكيد تم

واللة ضحكتني على الشيطان الريجيم
ههههه

يسعدني العشا معاك
اخي العزيز وأتشرف

شكراً جزيلاً لك

ودمت بخير وبدون ريجيم

:))

7osen said...

: إستكانه

ياهلا بإستكانة الخير

اهلاً وسهلا

ايي والله احساس الانجاز شي مميز واايد

ويخلينا نحس بشعور بالراحة

إستكانة من شنو تخافين من صجج

روحي تمشي الصبح أو الظهر الجو صج روعة

مو بس علشان الرياضة
تمتعي بالأجواء المنعشه

أنا أشجعج على هالخطوة

يالله قومي الحين روحي أمشي على البحر

:))

تحياتي عزيزتي
واتمنالج رياضة ممتعة

ودمتي بكل السعادة

7osen said...

: حقوقية

صباح الورد والياسمين
على الناس الطيبين

اهلاً وسهلاً عزيزتي

مشكورة على التهنئة

أيي والله أنا ريجيمي ما اكل شي

مادري ما اعرف اسوي ألا هالريجيم

وأعرف ان هالريجيم راح يفيد معاي


الله يعافيج ويخليج
مشكورة

وأتليقفي على كيفج

تستاهلين الإهداء

تحياتي لج
أتمنالج يوم سعيد

7osen said...

: نجمه

اهلا وسهلا
ومرحبتين


الله يسلمج عزيزتي

أهو فعلاً الجو مايساعد على الريجيم
وعلشان جذي أنا ما أكل

لأني لو أخذت راحتي على هالجو
راح أوصل لمنطقة الخطر
:))

مشكورة على التواصل الحلو
وتحياتي لج

SHAHAD said...

حسسيين
أول شي أهنيك على هالرجيم
شي جميل إن يكون عندك هالارادة القوية
الله يثبتك وتوصل مبتغاك إن شااء الله
.
.
ثاني شي ما توقعتك بهالطول ماشاء الله
مو زين أوقف يمك :S نصير رقم عشرة لوول
بس على فكرة الحين وزنك ماشي مع طولك :)
.
.
وعلى الاصابة
سلامتك وما تشوف شر
وأجر وعافية يارب
.
.
ودام الجو حلو يشجع على الرياضة
انا اليوم بديت ريجيم وراح أبدي مشي إن شاء الله
عندي عرس رفيجتي بعد اسبوعين ولازم أنزل 4 كيلو تهقى أقدر ؟
الله كريم
بوستك جدا ممتع وشجعني حييل
ثاانكس :))

فراوله said...

مساالوردوالجوري
مساالرشاقه والاناقه
عزيزي الرشيق
الله يتمم عليك الصحة والعافيه
وهذي اهم شي...وبعدين استمر علي الرجيم
فانا من انصار الرشاقة
:)
بذمتك عاد مو احلا
وانت نايم خفيف بدون عشا هالدواويين
بس تدري عليكم بالف عافيه
دمت بدفء وعذوبه
ابدا
وبالرجيم
مستقبلا
:))))))))

5roofa said...

حسييييييييييين انا بعاااااااااد مسويه رجييم لوووول

بس عاد انا انشالله لي وصلت وزني راح اعرض الرقم قبل و بعد بس حاليا اسكت وايد احسن لوووول

بس مشالله علييك يالله استمر سييييير و نحن من ورااائك

يالله انشالله انا اقدر بعد و اصك حلجي صكه سنعه

لانه حاليا جني مبلشه اخوره بعد لووووول

salamz dear dear friend...

محـــــارة said...

الله يعطيك العافيه

الجو فعلا مو طبيعي ولو أن الكويتين بخرعون الجو بيقلب يا طوز يا ثلج على اللبس الي طلع وهوه توه يقول يهادي

الرياضة يمكن لأن الحمد لله وزتي ممتاز فالرياضه عمري مامرستها على أني هالفتره مشتهيه أمشي بس أخاف أمشي أضعف وأنا مابي أضعف

أي رياضه ثانيه أحب أتابعها لكن ممكن أمارسها بين فترى وفتره السباحه وعلى المود

بالنسبة للرجيم الله يعينك الأهم أنك قادر تسوي كنترول وقاعد ايب نتائج مساكين الي يتعبون على عمرهم وماكو نتيجه ولا متن وراثي أو خلاص دخل فيهم مو راضي يطلع حتى بدون اكل

7osen said...

: شهد

ياهلا ومرحبا بشهودة

الله يسلمج عزيزتي

إن شاءالله يارب اوصل حق وزني المثالي
لأن الإغراءات واايد
:)

أي والله هالطول
ليش رقم عشر
اكيد انتي قصيرة

أحسن

:)

الله يسلمج الشر ما اييج


ايي أنا اشجعج على الريجيم

و4 كيلو سهالات
بظرف اسبوع تقدرين تنزلينهم

بس لازم تتبعين طريقتي

وهي إغلاق الفم
ههه

مشكورة عزيزتي
تحياتي لج

7osen said...

: فراولة

اهلا وسهلا ومرحبتين

صباح الورد

صحيح أحسن شي الشعور بالرشاقة
اذا حسيت انك بوزنك المثالي
شعور واايد مرح


والله صج لما تنام والمعدة مرتاحه
هذا شي مفيد جداً
ويحسسك براحة كبيرة

شكرا على التواصل الحلو سيدتي
صاحبه الأحساس المميز

تحياتي لج

7osen said...

: أبلة خروفا

ياهلا ومرحبا

شلونج خروفا

انتي بعد مسوية ريجيم

قوليلي جم وزنج ؟

:))

جم كيلو تبين تنزلين ؟

يالله انتي بعد لازم تشدين حيلج
وتبتعدين عن الأكل اللى يمتن

اتمنى انج توصلين حق الوزن اللى تبينه

تحياتي للأبلة العزيزه

7osen said...

: محارة

ياهلا ومرحبا

ايي والله الناس ماتصدق ايي برد علشان تلبس الشتوي

بس الجو مو راضي يبرد


وعلى فكرة
ترى الرياضة مو بس على شان الريجيم
او انقاص الوزن

الرياضة لصحة الجسم
لازم تمارسينها
المشي وخصوصاً هالأيام وااايد ممتاز

والسباحه الرياضة المثالية للجسم

اتمنى انج دائماً تمارسين الرياضة

تحياتي لج عزيزتي
ودمتي بكل الخير والسعادة

charisma said...

سلامات وما تشووف شر
:)
واهم شى انك اتعرف حق نفسك وتعرف متى
توقف وشلون تنزل الى زدتهم

انا مثلك فى رقم اذا زدته الزم بريك واعرف شلون انزلهم
يعنى اعرف شاكل ومتى ومشى تصير المسائل اوكى

:))))

وفعلا الجو هالايام صاير عجييب ويساعد على الحركه
بس بنفس الوقت يسااعد على اللاكلللل
://

انشااءالله دووم بصحه وعافيه يا حسين

:)

Cr8ivia said...

مااااشاااء الله لا اله الا الله
يااااااااااااااابختك ياااااا بختك


يالللللللللله ترزقنا مثل ما رزقت حسسسسسين يارب يارب :|

magnoonah said...

حسوووون

انا الي اعرفه هالكلمات للمحروم (عبدالله الفيصل)
بس ظلمت الكلام لما الغيت ثاني بيت
:(


ـــــــــــــــــــ
الرجيم وما ادراك ما الرجيم

عاد انا مخربة الرجيم الاولى بالعالم
اتوقع من كثر ما سويت رجيم ومليت

انت شد حيلك الله يوفقك
بس اول قولي شنو احساسك اما تغمض عيونك وتتخيل جدامك صحن مربين وعلى يمينك شطه حاره وعلى يسارك اجار والريحه تعط عط

يا سلااااااام
وتخيل في كيكه كاكاو وعليها طبقة كريمه بنكهة الكاكاو ومزينه بفراوله ناطرتك تهجم وتحلي فيها

الحين قولي شنو رايك بالرجيم

:)))

ومثل ما قالت كرتيفيا الله يرزقنا مثل ما رزقك

اللهم اميــــــــــن
:)

Shaima'a Alkandari said...

ياحيالله بالاخ العزيز والمبدع
شوف ياخوي اهم شي الاراده اذا عندك اراده بتضعف ان شاءالله
يله سير ونحن من ورائك وبقولك لي ضعفت بس مو الحين اسوي ريجيم بعد جم اسبوع

وعلى طاري الجو والرياضه
والمشي عالبحر شي موطبيعي تمشي مسافات طويله من غير ماتحس لان الجو حلو

ويارب تضعف وتنزل كل الكيلوات المطلوبه

الاء سعود المجيبل said...

اوفييييه اخخخخ يالرجيم ابحياتي ما سويته بس الحين بديت اسويه عشان لا امتن لان اذا متنت اكره نفسي...:(

بس الرياضه ترى مهمه بعد مثل ما قلت انا بديت بالمشي اهم شي...:)

Shather said...

LOL حسين لا تقلب المواجع ..

انا الكنترول عندي مخترب بالمره ..

وصلت لمرحلة ماقدر فيها اوقف

عطني حححححححل

7osen said...

: كاريزما

ياهلا بالغاليه

شلونج

الشر ما اييج إن شاءالله

صحيح أهم شي الواحد يكون عنده سيطره على وزنه

لكن أنا مشكلتي الكبرى في الزياده السريعه

مايمديني اكلي شي الا زاد وزني

:)

الجو حده يساعد على الأكل الله يعين


مشكورة عزيزتي على مرورج الحلو

7osen said...

:Cr8ivia

ياهلا ويامرحبا

شلونج وشخبارج

:)

إن شاءالله الله يرزقج
بالوزن اللى تبين

بس مافي شي يصير بسهولة
لازم تتعبين

يالله شدي حيلج وعليج بالرياضة

تحياتي عزيزتي
سعيد بهذا المرور

7osen said...

: المجنونه

اهليين ومرحبتيين

أيي صحيح ناقصه الكلمات
انا حبيت اختصرها

والبيت مثل ما قلتي وايد حلو

**
مجنونه
حرام عليج هذا بدل ماتساعديني

قاعده تحرضيني

صراحة انتي صج مخربة الريجيم

عاد قريت تعليقج وانا حديييي يوعان

بس لا
اهم شي الإراده

ماراح اضعف وراح استمر ألا أن اصل الى الوزن الطلوب

وانتي بعد لازم تسوين ريجيم
تخيلي بعد شهرين من الريجيم وانتي رشيقة والكل يمدح فيج وشكلج متعدل وخفيفة

شنو بيكون احساسج

:))

يالله أنظمي حق قائمة الريجيم

مشكورة يا المجنونه الصغيرة

7osen said...

:شيماء

ياهلا ويا مرحبا

اولاً أهلا فيج وفي رجعتج حق التدوين
اختي العزيزة والمتميزة

شكورة على كلماتج الحلوة

بس ليش بعد جم اسبوع ؟

يالله قرري وابتدي من باجر

مادام الجو هالايام حلو ويساعد
ومثل ماقلتي تمشي مسافة طويله بدون لا تحس


يالله أنظمي حق عظوية
الريجيم
:)

تحياتي لج اختي العزيزه

7osen said...

:Q8ya

اهلا وسهلا
ومرحبا

زين والله اذا مو مسويه ريجيم
حظج

هههه

ماشاءالله طبعاً

واذا كنتي ضعيفة
مع المشي ماتحتاجين اي ريجيم

اتمنالج دوام الصحة والعافيه

تحياتي لج

7osen said...

:شذورة

اهلييين ومرحبا

( حتى أنت يابروتس )

تصدقين مادري ليش اسمج يوحي إنج حييييل ضعيفه

ماتوقعت إنج من انصار الريجيم

شوفي عزيزتي
والله عندي حل سحري أنا اتبعه في الحالات الحرجه ونتيجته مضمونه اميه بالاميه

اهو من كلمتين بس

( أغلق فمك )

بس ماتاكلين راح تضعفين مثل ماتبين

:)

تحياتي لج
سعيد بهذا المرورج الجميل

5roofa said...

حسييييييين توني راده من جيلييزيي
كليت
country fried chiken:D
مع
mashhhhhhhhhhh

لوووووووووول و حليت
choclate
:D

امبيي حدييي مبدعه بالرجيم لووول
انا اقول ارد على اجوبتك انشالله في القريب العاجل لوووول

بس خلاص ماكو اكل بره بعد بهالوجبه ختمتها ختاميه حلوه الحمدالله علي بالعافيه لووووول

امبي بس كليت وايد
;/
ايلك احساس انك تاكل بعدين تحسف تقول ليش كليت؟
يعني حزتها الضمير ميت
بس عقب ما تشبع و تملي بطنك تقول
ويييييييييي انا شسويت لوووول

salamz friend...

Barrak said...

سهله الواحد يضعف
بس صعبه الواحد يمتن


انا اقول عطني شوي من ال90 اللي عندك

7osen said...

:خروفا

اهلا وسهلا

عليج بآلف عافيه

ولا تتحسفين ولا شي

مطرح مايسري يمري

باجر تسوين ريجيم سنع وتنزلين كل الكيالو الغير مرغوب فيها

أنا اذا كنت ابي اسوي ريجيم
لازم قبل جم يوم ما اخلي بنفسي شي اكل كل اللي اشتهيه بعدين ابدآ

بس ما جاوبتي على سؤالي جم وزنج ؟

ولا صعبة ؟

:)

تحياتي لج أبلتنا العزيزة

7osen said...

: براك

أهلاً وسهلاً

شلونك و شخبارك

**
من صجك براك

اذا تبي تمتن ما عليك ألا الأستمتاع بالأكل

على كل حزة والله وناسه

واذا على التسعين
لك منهم عشرة كيلو وفوقهم بوسه

هههه

حياك الله البرك
سعيد بهالمرور

marshmallows said...

لا لا لاتييب طاري الرجيم انا احس ان طول حياتي قاعده اسوي رجيم و ماكو فايده ياربي الاكل يونس يعني اكل تفاحه و لا اروح بيرجر هب او فرايديز بس انا اليوم قررت الصبح اني ابدي رجيم مسكت روحي طول اليوم وتوني كليت برنجلز و ككاو =\

Anonymous said...

روعه