1/24/2011

كلام


صارلي فترة طويلة .. مادري شفيني .. فاقد قدرتي على الكتابة .. ومو قاعد احاول
أحيانا توصل لمرحلة تحس مافي كلام يعبر .. أحس ماعندي قدرة على التفكير بصفاء
كل القصص أنتهت .. وكل الأفكار مفككة .. وخاوية
أحس إني أبي اعبر عن نفسي بالفعل
كأن .. أروح الجمعية أشتري أغراض مالها معنى .. أروح أشتري ملابس .. أو اروح مطعم بروحي أكل وجبة محترمة لمجرد إني ابي اغير روتين الحياة
مدونتي الحبيبة .. فقدت شغفي فيها .. ماعدت أجد راحتي الكبيرة وانطلاقي المستمر
أمتدت العيون إلى هنا
وأمتد العمر إلى براعم الطفولة القابعة بالنفس وبدأ يقتلعها تحت سلطة الممنوع والغير لائق
أشعر بأيادي الحياة المفروضة والقيود الكثيرة تخنقني .. وأنا أتوق للحرية .. وللتحدث
التحدث عنك .. عن حاجتي لك .. عن عقد العالم المجنون .. عن الكون الكبير ومجرياته المذهلة
مادري
شنو الحل
....................................
مهما طالت الأيام لابد من الوقوع
بعد مقاومة طويلة جدا .. لقيت نفسي فجأة راغب في الزواج
يمكن لأني بديت أحس إن شيء بروحي يحتاج لشريك
فقررت الزواج رغم كل شي .. وكل الموانع إللي انا واضعها بوجه هذا الزواج وإللي لازالت موجودة
لكني أعتقد رغم الاحباط إللي لقيته من اغلب المتزوجين إني راح أجد السعادة في الزواج
أتمنى إني اكون على صواب وما انصدم
لكن أكتشفت إن في مشكلة كبيرة
شلون تقدر تختار زوجتك ؟
ههههه
يعني فجأة لما قررت الزواج ..مالقيت في زوجة .. أو أنا ما اعرف منو راح اتزوج
ويمكن هذا شي طبيعي جداً
لكني بالفعل جدا متخوف من هالأمر
يعني الزواج التقليدي .. إللي عن طريق الأهل .. يخوف صراحة
يعني الواحد ما يحب يظلم أحد .. لكن جميل جدا إن كنت على الاقل بامكانك انك تعرف الانسان إللي راح يشاركك حياتك شلون يفكر، شنو طباعه .. هل من الممكن إنك تتوافق معاه وتلقى بقربه السعادة أو لأ
لكن شي مؤلم أيضا .. إذا ارتبطت بشخص وأكتشفت إنه بعيد عن روحك وعقلك وعالمك .. بهالحالة تصير الحياة غاتمة جدا وتزداد ضيق وتعاسة
صحيح إن كل شي نصيب
لكن هالموضوع شاغلني جداً .. ويكاد يجعلني أعيد النظر في القرار .. أو تأجيله إلى حين
.......
نقطة اخيرة
كل ما احتاجه لسمة .. فقط لمسة حنان
تزيل عن كاهلي كل هذا التعب

16 comments:

الزين said...

حسين

كنت فعلا مفتقدة وجودك
انسكابك هنا
زياراتك هناك
فضفضة ايامك بزخم المشاعر المختلطه
عذوبه مشاعرك رغم مرارتها احيانا
قصصك المجنونه بكل واقعها

مفتقدة صديقي
وزميلي
واخوي

الوضع اللي تمر فيه طبيعي ترى
وياما مريت فيه
وابتعدت .. سلمت قلمي لمصيره
وغفوت على صفحه خاويه
وكانت الأحلام بلا معني

انتظرت الحنين لحرف عنيد
وطاوعته
الى ان لان
وعدت اكتب من جديد

صدقني ماكو نبع مثل نبعك ممكن يجف
عط نفسك فرصه للتنفس بعمق
وستعود اجمل واعذب كما عودتنا
ونحن دائما بالإنتظار

موضوع الزواج هذا قصه ثانية
واعتقد انا اسوأ وحدة ممكن تنصحك

عسى الله يسهل امورك وتلقى اللي تستاهلك

bent el deera said...
This comment has been removed by the author.
bent el deera said...

كل انسان يمر بمرحله من الملل جذي واهي تعطيه الدافع في بعض الاحيان انه يغير ويدش مرحله احلى من المراحل اللي عاشها سابقا

سبحان الله مساله الزواج توفيق من الله ... شويه منك وشويه من اهلك وان شاء الله بتلقى بنت الحلال اللي بترتاح معاها
الله سبحانه يقول الطيبون للطيبات وانت طيب واكيد بتلقى بنت طيبه مثلك

زخ ـة .. مـًُـطر .. said...

أتمنى من كل قلبي انك تلقى البنيه اللي تتحقك وتستحقها ..

ومبروك مقدمًا ع الزواج :)

الجودي said...

حالة التوقف عادية و طبيعية جدا ما اتخوف ...

قرار الزواج خطوة جميلة جريئة بقدر احتياجك إلي صرحت عنه و اعتقد إن كافي
لبداية البحث عن شريك لهذه الروح ..ابدأ بتفاؤل و ببساطه .. و التوفيق بيد رب العالمين أكيد

سلة ميوّة said...

كلنا مرينا بالشلل الكتابي...
انا عن نفسي مريت بكل تفاصيلك..

بتشري الاشياء اللي ماله معنا...
بالتسوق الفاضي..بالجلوس واكل وجبه بس عشان احس انه في شي غير!!!

الله يريح قلبك وبالك..

اما عن الزواج...


القرار جميل...والاختيار صعب ..لكن لاتعدل عن قرارك فقد انتقي بتأني...

ادري نصيحتي لك مثل اللي فسر الماء بالماء:)
بس للأسف ماعندي نصيحة لاختيار زوجة...لأن مجتمعنا يفرض اشياء ويرفض اشياء...
لكن ..الحوار...هو الحل في كل شي


مساك الله بالخير
وترى ولهنا عليك

Sweet Revenge said...

منور مكانك حسين ,
اظن هالحالة يسمونها بلوجريشن
لووووول
تعدي لاتحاتي يمر فيها الكل
:)

الزواج قرار صعب بس
يصير في النهاية توفيق من رب العالمين
موفق حسين

Anonymous said...

حسين صديقي العزيز
اختار تبيها كويتيه سعوديه قطريه تركيه يونانيه شاميه كرديه
ضع مواصفات زوجة المستقبل تبيها مثقفه جدا متوسطه الثقافه
مافيها مخ
على البركه تبيها قوية ولا ضعيفه ولا مطيعه تعذبك ولا تدللك ولا بين البين
متطلبه ام مراعيه
يعني حدد ؟!
ويااخي مايصير خاطرك الا طيب بشغل نفسي خاطبه انت حدد المواصفات
خخخخخخخخخخخخخخخخخخخخخ
لوووووول
ذيبه مرت من هنا لا تنهشك انتبه خلك بعيدلوووووول
الاخوات والاخوان المعلقين مافي داعي للهوشه بالدور بالدور لووووووووول

malak said...

اول شي بقولك مبرووك

ثاني شي الزواج قسمه ونصيب وايد خذو بنات يعرفونهم و ما توفقو


و ياما زواجات تقليدية نجحت و من اروع ما يمكن



:)


الله يوفقك وتلقى بنت الحلال اللي تسعدك

~أم حرّوبي~ said...

الشلل التعبيري ..شيء مؤلم بنالنسبة لنا نحن من نصف أنفسنا بالحرف ..وكل أحاسيسنا نصبها في حروفنا ...وتأتي هذه الفترة التي تشل كل قدرة تعبيرية لدينا في وقت نحن بحاجة إليها..ولكن ما تلبث وتعود ..ثق بأنها ستعود لكنها أستطيع أن أقو ل في إجازة مؤقتة :)
---
قرار الزواج المفاجئ ..أتوقع هذا القرار نبع من عقلك الباطن ...
قرار كبير ويحتاج لتفكير عميق..
إختيار شريك الحياة أمر صعب..ويحتاج لتأني
..أنا أنصح حتى لو كانت طريقة الزواج تقليدية إذا أعجبت بفتاة ورأيت فيها بعض مما تريد في زوجتك أطلب وجود فترة خطبة تتعرف فيها على الفتاة وتتعرف عليك تتحادثان لتصلا إلى قرار حاسم بأن تكملا أو لا

موفق أخ حسين وربي يرزقك بالفتاة التي تطمأن لها وتطمأن لك وتستطيعان العيش معا بسعاده

تحيتي ~

7osen said...

شكرا لكم اعزائي جميعا

لكم جزيل الشكر على وقتكم الذي اقتطعتوه من أجل التعليق

تحياتي للجميع
ولكم صادق التحياتي من القلب

AuThoress said...

ستجدها يا زميل التدوين :) دي مكتوبالك على رأي اخواننا المصريين ... فقط الزمن كفيل بــ ظهورها ، واستفتي قلبك فقط.. ولا شيء آخر ، وكن على قدر العطاء والوداد ... عاهدها على الشراكة لا الندية ... وكن جميلا ، ستصفو حياتكما بلاشك

امنياتي لك

7osen said...

اديبتنا المميزة

شكرا لمرورك ايتها المبدعة

مؤمن بكل ما قلتي
جدا

شكرا لنقاءك

الف تحية

Sweet Revenge said...

حسين وينك من زمان مو مبين
شكلك خطبت
:)
بشرنا عاد

krkor said...

قط العاده والتقليد ورا ظحرك واحذف كلام الناس وراهم اكتب الي بخاطرك مهما كان هالكلام شاذ وغريب تر العمر واحد والايام تمشي

بخصوص الزواج بعايلتنا يقعدون مع بعض اما اذا كنت قبلي فهذي مشكله الله يعينك ويرزقك الي تستاهلك

فوركس فيجين said...

نرجوا لكم السداد
وكتابة كل ما هو قيم ,,,,

http://www.4exvision.com