6/09/2007

الموبايل













امس ( رحت الدوام ) ونسيت الموبايل مالي في البيت

الصراحه حسيت اني ناقصني شي مو مخليني اكون طبيعي

مو قادر اركز بأي شي ،،

ما كنت متصور ان الموبايل يسوي جذي

قبل كان عادي ،، بدون موبايلات عادي ،،

الحين من كثر التعود

صرنا نعتبر الموبايل جزء منا ،،،

والله بكل صراحه انا ماكنت متوقع

اني راح احس اني فاقد شي بهالطريقه ،،

مع ان احيانا تليفوني فتره طويله ما يدق عادي يعني

بس صج صج ما كنت قادر اركز ،،

زيين الحين شنو اسوي ،، ابي تليفوني وما اقدر اطلع

لأن عندي شغل واايد ،، طبعا لأن كل مشكلة لها حل

قلت لازم ادق على احد اييبلي اياه

فكرت شوي ،، بعدين قلت هذي المواقف مالها الا المنقذ

،، TReSTeN ،،

ولأنه لا شغله ولا مشغله

مستمتع بإجازة طويله ،، وانا طبعا حاسده

،، بس ونااسه باقي جم يوم ويداووم

،، دقيت عليه

والصراحه انه ماقصر على طول قالي او كي ،، وبأقل من ساعه كان تليفوني عندي

وانا اوجهله الشكر من موقعي هذا


:)))))))


هذا الموقف خلاني اتساءل عن اهمية الموبايل بالحياة اليوميه

،، طبعاً اهميته تختلف من شخص للثاني

بس الشي المشترك ان اغلب الناس ماتقدر تتخلى عنه ولو يوم واحد

والسؤال المطروح هل من الممكن إنا نتخلى عن الموبايلات

الصراحه انا ما اعتقد

ولا شرايكم




41 comments:

78o8eYa said...

آنا قلت إني راده وبقوه بس ما توقعت بهالسرعه

:))



حاجزه مكاني
;Pp~

78o8eYa said...

حريصه جداً على موبايلي ، ولا أمشي خطوه من غيره

محافظه عليه

وعزيز عليّ جداً

ما أقدر أنكر دوره الفعال بالتواصل مع وايد ناس منخشين أو آنا منخشه عنهم

ساعات أحسه يقيدني
لأن وقته مفتوح ويقدر يقتحم تقوقعي
على كيفه

اهني ، أسكره أو أحذفه داخل المكتب


يبقى شي ضروري وأساسي
ما أقدر أتحرك من غيره

اذا ما كان بالنسبة لنفسي
أكيد بالنسبة لغيري
وأولهم
الوالده
:))

TReSTeN said...

على فكرة عندي خبر ببط جبدك

ويموتك قهر

لوووووووووووول

ترى الدكتور مدد اجاازتي شهر

موووت بغيييضك موت مالك امل صووووبي


لوووووووول

مع اني مشتااق حييل حق الدواام والشغل

بس ابي اتم بالاجازة

علشان اسكت الشامتين فيني امثالك

PearL said...

مستحيل اقدر استغنى عن تلفوني

حتى لو ما يرن
حتى مابي اتصل

بس وجوده يحسسني بالامان

:))))))))))))))
احس اني ضايعة بدونه حتى لو ما احتاجه

Kuw_Son said...

انا نفسك أحس شي ناقصني ..

و ساعات يظل وقت طويل و محد يدق بس ما أدري صرت مرتبط فيه !!

sologa-bologa said...

يا خوي حتى بالسفر الموبايل معانا

:))

مع إني أكره الموبايل بس هم ما استغني عنه


------------

تقول ما طافني شي
طافتني أشياء وايد لو بقعد أعلق على كل موضوع
ما راح أخلص
:))

ودمتَ بحب وود

7osen said...

:78o8eYa

اهلييييين

شكرا على التواجد اللى افتقدناه

،

انتي من انصار الموبايل

صحيح أأيدج بكلامج

صرنا ما نستغني عنه ابداً

وخصوصا مثل ماقلتي بالنسبة للبنت
حق الوالده علشان تتطمن

:

شكرا لج مره اخرى

تو ما نور البلوق

تحياتي عزيزتي

7osen said...

:TReSTeN

صج

راح تمدد شهر

حساااافه

:))))

شسالفة ما مليت صارلك اكثر من سنه إجازه

غير إجازه هذي

:))))

بس يالله احسن خلك للسبوع الياي علشان نسهر نحتفل ونحرك بفوز مدريد بالدوري

يا ايها الكتالوني

:))

7osen said...

:بيرل

اهلا عزيزتي

ايي والله نفس ماقلتي الواحد ضايع بدونه

حتى لو مايدق

الصراحه شيء عجييب

:

7osen said...

: Kuw_Son

اهلا وسهلا اخوي

تصدق الظاهر كل الناس جذي

والمشكله انه حتى لو ماتكون ناطر مكلمه او شي

بس تحس وجود الموبايل صار اهم شي 0

شكرا لك عزيزي
وبالتوفيق ان شاء الله

7osen said...

:sologa-bologa

يا هلا ومرحبا

الحمدلله على السلامه

شلونك

عاش من شافك

طولت الغيبه ،، شلون السفره

شنو يبت لنا

:))))

اذا كان حتى بالسفر معاك

فأكيد انه محد يقدر يستغني عنه

:

نورت اخوي سلوقا

والحمدلله على السلامه مره ثانيه

افتقدناك

:)

Mishari said...

تصدق عكسك بالعكس استانس لما امشى وما معاى موبايل احس مفتك من الناس واللوية :)

charisma said...

انا قايله
tresten
شقردى :))
ما قصر والله لا يخليكم من بعض

انا مثلك حسين ما اقدر استغنى عنه
كله احاتى ان احد فيه شى
احاتى اهلى
اتواصل مع ربعى
يصير شى بالطريج واحتاج انقاذ

انقث ابى افرغ ترى لو مسج تندز تبرد على القلب

وجنك تدرى انا امس طلعت ونسيته
بس ما طلعت من منطقتى اشوه ورديتله

Shather said...

ياما انقطيت بهالموقف و على قولتك حسيت بضياع ..

مع ان يظل ايام ما يرن ..

بس احبه يكون يمي في حاله طرت على بالي اي فكره اسجلها عليه .. هم هذا جانب مفيد فيه :P

ReLaaaX said...

بالعكس الراحة تكون والموبايل محذوف بمكان وآنه بمكان :)))


يمكن لما اطلع اخاف يصير شي واحتاج موبايلي فقط لاغير


بس إني اقعد بدونه ماعندي مشكله .. والله مرات اتعمد أخليه والا مااشوفه الا اخر اليوم


أصلا مساكين معارفنا يعني متعودين إنهم إذا دقو مايحصلوني .. فإذا الشي مهم أدري إن بيدزون مسج :)))

SHAHAD said...

والله الموبايل صار شي مهم في الحياة
حاله حال الماي والهوا لول
ونظرا لأني بنت فضروري ضروري يكون معاي وانا طالعه
أول سؤال أمي تسألني اياه وانا طالعه .. موبايلج معاج .؟ لول

Aldenya said...

الموبايل بالنسبة لي
شيء عادي ممكن إني أستغنى عنه
على الرغم من أهميته خصوصا للبنات
وياما يـــــاما نسيته بالبيت
ونسيته بالدوام
وكان شي عادي :>

Purplecious said...

شوف اذا بالبيت عادي ما يهمني

اصلا كله قاطته بالدار اتعيز اشيله معاي وين ما اروح بالبيت نازله صاعده اشقله على قلبي ليش

و يتسلططط
ما يدقون علي الا لما اكون ناسيته و مادري عنه

بس برا لاااا اتخسبق اذا نسيته
و لا اذا قطعوا الخط

مره كنت بالدوام و قطعوا الخط قلت لما اطلع امر الجمعية اسدد
و انا بالطريق قاعده احاول اتصل على البيت اقولهم بمر الجمعية تبون شي
ناااااااااااااسيه ان التلفون مفصول لووووووووووووول

Purplecious said...

اييي ويييي

مبرووووك النيولوووك

:)

Яeema said...

يا حلوة والله هال
TRESTEN

ما قصر ونعم الصديق


الموبايل
ينقسم أهميته إلا قسمين



لو عيالي وياي تلاقيه محذف ما يهمني
بس إذا أنا برة وعيالي بالبيت

لا سلمك الله
من الأساسيات

أصلا دايما يكون عندي واحد سبيير بالسيارة و كل من يعرفه

مرة كنت رايحه مشوااار وولدي مريض بالبيت
لا الله يسلمك شريت خط وموبايل رخيص

طبعا إسم الله علي كل طاقه الدرب مرة ثانيه وراجعة
لأني ناسيه الموبايل

:(

بقولك سر الله يسلمك بعايلتنا
الوسواس راكبنا من راسنا ليه كرياسنا

إنت من صجك أحد من البيت يدق و ما يشيل التيليفون
يطلعونه يطلعونه
هاهاهاهاها

Яeema said...

tresten

عفيه عفيه علي ولدنا الشقردي
و عليك بالعافيه بالإجازة
قولله يمددها ليه رمضان بعد مرة وحدة
هاهاهاها

داوم بعد العيد

Manooya said...

مممم ما افقده وايد بس احس شي ناقص اهوا وجوده مو ظروري حيل بس خلاص صارت عاده واتضايق لما انساه =)

ايي اعتقد اهوا ظروري .. نوعا ما


تبي الصج =P

اذا في احد مهم يدق عليك راح يكون اهم شي بالنسبة لك اما غير جذي فعاادي جدا .. =)

خصوصا اذا كنت في حالة قوقعه نفس حقوقية فراح تحس انك ما تبي تشوف رقعه ويهه


بس اهوا ظروري =)

LORD.M.M said...

تحياتي

الموبايل مهم لأنه اصبح عنوانك المباشر
مع الناس ..مو مثل التلفون الثابت عنوان العائلة
لا الموبايل امر شخصي لذلك هو مهم
و مهم اكثر اذا كنت تنتظر مكالمة من احداهن ;)

تحياتي

Shaima'a Alkandari said...

اسعد الله مسائك



التلفون مهم ومهم ومهم


ولكن


موشي لي استخدمته على اى شي


التلفون محطوط للضروره والاشياء الهامه اللى ماتحتمل التأجيل


ومره ثانيه لاتنسى تلفونك


وزين لقيته يروح اييبه لك والمره اليايه يمكن ماتلاقى احد اييبلك ياه



دير بالك اهم شي تلفونك

7osen said...

: Mishari

اهلا وسهلا

كلامك صحيح انك مفتك

بس الصراحه اذا ما معاك التلفون تحس ناقصك شي

صار مهم جدا0

تحياتي عزيزي

7osen said...

: charisma

ياهلا ومرحبا

ايي تريستن شقردي من زمان

عندك اي مشكلة ماعليك سوا الاتصال

:)

وكلامج صحيح التلفون يساعد على تعديل النفسيه من خلال التواصل مع الاهل والاصدقاء

وعلى قولتج لو مسج يكفي

7osen said...

: Shather

اهلا وسهلا عزيزتي

فعلا فكره حلوووه
انج تسجلين فيه فكرة طارئه او خاطر سريع


هذا من الاستعملات المفيده في الموبايل0

شكرا لمرورج عزيزتي
تحياتي لج

7osen said...

: ReLaaaX

اهلا وسهلا

والله زين

انتي اول وحده تقول ان الموبايل مو مهم وتحذفينه عادي

الصراحه انا احسدج على هالشغله

انا ما اقدر استغني عنه

مادري ليش

مع اني احيانا ما اكون محتاجه بشي0

شكرا لج على المرور

موفقه ان شاء الله

7osen said...

:SHAHAD

اهلين ومرحبا

انا أأيدج وايد انه صار بهالكثر من الاهميه

ومثل ما قلتي خصوصا للبنات

لأنه يوصلج لأي شخص تبينه بثواني معدوده ،، وهذا الشي يخلي الاهل متطمنين 0

شكرا لج
وبالتوفيق

7osen said...

: Aldenya

اهلا وسهلا


الصراحه انا ودي اكون جذي

ما اهتم فيه

يعني لما احد يكون يحتاجه بشغل او شي مهم ممكن نفهم انه ما يقدر يستغني عنه

بس اذا كان عادي

ليش احس انا ناقصين شي اذا نسيته مادري ؟؟

شكرا لمرورج عزيزتي
تحياتي لج

7osen said...

: Purplecious

اهلا بالبنفسج

صحيح بالبيت احيانا تحذفه بأي مكان
عاااادي


ههههههههههههه
والله ضحكتيني

مقطوع وتبين تدقين منه

صج انج شخصية تحفه
:

الله يبارك فيج

وحياج الله على الدوااام

:)

7osen said...

: ريم

اهلا وسهلا اختي العزيزه

فعلا الموبايل بالنسبة للأمهات

مهم جدا جدا

والله طريقة حلوه انج تحطين سبير بالسياره
الصراحه شي ذكي

خصوصا للي مايقدر يستغني عن الموبايل

:
اما تريستن

احنا مسمينه المنقذ

دائماً جاهز للأنقاذ

وإجازته هذي انا ناطر تخلص بفارغ الصبر لأنه ذبحنا فيها

:)))

7osen said...

:منويه

اهلا وسهلا

مثل ما قلتي احنا تعودنا عليه معنا

والعاده الصراحه شي يبط الجبد

احيانا تصير مثل القانون ما تقدر تخالفها


وحالة التقوقع تخليك مالك خلق حتى نفسك مو بس الموبايل

حياج الله عزيزتي
منوره

7osen said...

: LORD.M.M

اهلا وسهلا عزيزي

حقا هو العنوان الشخصي لكل شخص

من هذا المنطلق اكتسب اهميته الكبيره

واذا كنت منتظر مكالمة من احداهن

الاكيد انك مالك امل تنساه

هههههههه

تحياتي عزيزي

7osen said...

:Shaima'a Alkandari

اهلا وسهلا

فعلا اهو مهم ومهم ومهم

وانا احب يكون دائما معاي علشان

ممكن بأي لحظة يكون مهم جدا مثل ماقلتي


وان شاء الله ثاني مرة ما راح انساه

:)

حياج الله عزيزتي
بالتوفيق

(روح) said...

صار سمة أساسية للفرد..

مااعرف بس بالنسبة لي

أحس إني ضايعه
مو قادرة أفكر الا
وهو موجود

وان كان مغلق
او مفصول!!

هو مفكرتي الشخصية
بل ومسودتي..

كلماتي تولد بين
ازراره :)


مااحب اكلم كثير
الا القريبين

اما اللي مايهتمون
او مايتصلون الا كل كم سنة
مرة وعشان شي

ماافكر ارد

في شي ضروري؟
ارسلي مسج
ساعتها ارد..

مااعرف

احب اكون قريبة
من اللي ارتاح لهم
ويرتاحون لي
مو اكثر

يمكن شطيت برا الموضوع

بس هذا شوي من اللي بخاطري


دمت بأتم عافيه :)

كادي said...

هلا حسين
الموبايل صار ضرورة بحكم التعود

مثل ما قلت أول ماكو موبايلات

وكان عادي بس ألحين مع كثرة إستخدامة

صار ضروري وطبعا أهميته تختلف من شخص ليه شخص
بالنسبة لي ضروري بس إذا نسيته مو

مشكلة عندي يمكن عشان عندى موبايل

سيارة لأن الخوف من مفاجآت الطريج

فأكون مطمئنة ان عندي موبايل

وبالمستقبل إذا طلعت وسيلة تواصل غير

الموبايل راح يكون الموبايل موضة قديمة

جنون إحساس said...

آنا بطبعي ما أتصل على أحد ولا أدز مسجات إلا نادراً وغالباً ماتكون بشغل

يعني بالبيت التلفون يكون بداري
واشوف بعدين منو داق ومنو داز مسج وليش

وبالطلعه طبعاً ما اقدر استغني عنّه
مفاجآت الطريج وايد
:)

Vancouver said...

صاااااااج

الشيئ عموما اذا تعودنا عليه

وفجاة فقدناه نتدوده

بس لو تميت اسبوع كل ما تطلع تخليه

في البيت وتتحمل الشعور اللي قول

عنه صدقني عقب يصير عادي

مثل الفطام اوله بجي وصراخ

وعقب يصير معيوف ، صج ام !! ا

7osen said...

: روح

اهلا عزيزتي

اسمحيلي اقولج ان ردودج دائماً مختلفه
فيها شيء جمالي

يعني وانا اقرا التعليق حسيت اني اقرا قصيده

:)

وفعلا الموبايل صار ملتصق فينا

وفي ناس وايد يسجلون فيه افكارهم ومسوداتهم مثل ماقلتي
لكن انا بالنسبه لي ما احب اكتب فيه شي ،، المسج ويبط جبدي بعد احب اختصر
احس انه يشتت الافكار

تحية عزيزتي لمرورج الجميل

=============

:كادي

اهلا وسهلا

اكبر مشكله اهي التعود
لما نتعود على شي صعب انا نتخلص من هالتعود بسهوله

انا ما احب انسى موبايلي

ابقى متوتر طول ما اهو مو عندي

وسيلة اتصال ثانيه
الصراحه مادري بعد شراح يطلعون
احنا مو ناقصين وسائل اتصال
:))

تحياتي عزيزتي
منوره

=============
:جنون احساس

اهليين

مع ان البنات دائما يحبون يسولفون بالتليفون مع صديقاتهم واهلهم اكثر من الشباب

بس الصراحه طبع حلو انج ما تستخدمين الا بالاشياء الضروريه

اتمنالج كل التوفيق
وحياج الله

============
: Vancouver

اهلا وسهلا

اكيد صاجه
انا دائما اقول ان المشكلة بالتعود

بس الموبايل صعب تتخلص منه لأنه يوصلك بكل الناس وين ما كنت

عجبني واايد المثال
فعلا ام

:))

تحياتي عزيزتي
وبالتوفيق ان شاء الله

barrak said...

اتمنى بيوم من الايام اني انسى موبايلي
ترى الموبايل نقمه مو نعمه
انا اقولكم ليش
اول ايام تلفونات البيت او البياجر كان الخبر السئ مايجيك فجأة
اللحين صرنا دائما مع الحدث
عسى مايصير شي الا
تررن تررن تلفونك رن رن رنه ورنه ومارد رن
مارد رن