6/24/2007

هذا أنا



















أنا اعتقد أن في داخل كل إنسان تيرمومتر

يتحكم في أنفعالاتة وأحاسيسه

أنا مشكلتي في هالتيرمومتر ،، أحس إنه عطلان
لايعمل ،، خارج عن الخدمة

في أحد المختصين يقول ،، تعرف على نفسك أولاً وتصالح معها
لكي تستطيع أن تندمج بالحياة ،، وتتعايش مع الناس بطريقة صحيحة

أنا بالنسبة لي تكمن المشكلة ،، في عدم قدرتي على ظبط أنفعالاتي
برغم كل الأدراك إللى عندي لأمور الحياة المختلفة يظل هذا الجانب مزعج
بالنسبة لي بشكل كبير جداً

شيء أخر أعانيه ،، أو كنت أعاني منه ،، لأني قررت إني
أتغلب عليه ،، وقدرت بنسبة كبيرة ،، هو الخجل

طبعاً أنا أعتقد أن الخجل يتلاشى مع التقدم بالعمر ،، لكنه ما يختفي نهائياً
تظل بقاياه عالقة في ثنايا النفس

ايام المراهقة كنت خجول بطريقة مؤذية ،، أتصبب عرقاً من أي موقف
أو أي مواجهه ،، حتى أحيانا في مواقف معينة كان صوتي يختنق ويطلع متحشرج

والشيء إللى ما أعرف أفسره أن هالمشاعر ،، أنا عارفها وأحاول إني اتغلب
عليها ،، وفي عقلي وفي أدراكي أعرف شلون اتعامل معاها ،، لكن في الواقع والحياة
أواجه صعوبات جمة في التغلب عليها

شيء أخر

ردة الفعل عندي عنيفة وصامتة

دائماً اذا كنت أعاني من أي شيء ،، أحترق من الداخل

أقعد وأضحك مع الناس لكني من الداخل أغلي ،، وهذا الشيء يسببلي ألام كبيرة

تنعكس بالسلب ،، على نفسيتي ومزاجي عموماً

والشيء إللى مو قادر أفهمه

هو ليش ما أتغلب على كل السلبيات والطباع السيئة إاللى فيني اذا كنت عارفها

وعارف وين المشكلة ،،، لكني ما أقدر اتخلص منها ،، ليش مادري ؟؟؟

أيضاً

أحب دائماً أعطي نفسي حرية بالتعبير عن الأحساس ،،

خصوصاً بالكتابة ،،، لما أكتب أجرد من كل الحدود

وأعبر عن كل شيء أحس فيه

مع إني أعتقد أن هالشيء غلط نوعاً ما

لأن المفروض على الإنسان انه يحكم السيطرة على نفسه

:)

الجملة السابقة اهي إللي تحيرني

أدري هالشيء غلط ،، لكن ما أقدر اتخلص منه ؟؟؟

شنو السبب

؟

******

بسكوت

شكراً لوجودك

:

ياذات العيون الخضر ،، والشعر الثري

شبهتي في تصوري

حبيبةٍ

أذكرها أكثر من تذكري

( مجهول )

24 comments:

ZoZOta said...

هيياااااااااااااا
انا اول وحده اعلق

يا سعدي يا هنايا

والله يا حوسن كأنك قاعد توصفني
يا حلاتي وانا اكتب
تقول هالبنت مقطعه الحجي بالحب تقطع
بس لين يت الصجية
اللسان ينربط
مافيه
سكتم بكتم
انفعالية؟؟
وايد انفعالية
الأعصاب بلحظة تشيط
والدمعه سخية
والأبتسامه والضحكه اسخى لمجرد كلمة حلوة حتى لو كانت مجاملة
واحس فيها انها موصج
بس هم تونسنى
اشياء صغيرة تضحكنى واشياء اصغر ممكن تبجيني
ابي اسيطر على انفعاليتي وشاعريتي الزايده
ما نجحت
بس تدري هم بعد زين
لأن هذا مواصفات الناس النظاف
الصادقين في مشاعرهم
اللي ما يعرفون الكذب والنفاق والرياء
ترى احنا زينين
بس لازم نعرف ونقدر شكثر زينين
ويمكن هذا اساس مشكلتنا
مو عارفين قدر نفسنا عدل
ونظل نحاسبهاونبيها اقوى
وماندري ان قوتنا بصدق مشاعرنا وصفاءها

ما كنت اتصور ان احنا نتشابه في شي ولي هالدرجه يا حوسن

7osen said...

:ZoZOta

اهلا وسهلا عزيزتي

فعلاً مثل ماقلتي

ممكن أن الواحد بالكتابة يبين جريء جداً ويعطيك أنطباع بأنه جسور ومتكلم

بينما بالحقيقة يكون خجول
وصامت

والشخصية الأنفعالية شخصية حساسة جداً

ممكن أتأثر فيها كلمة بسيطة

مثل ما وصفتهيا أنتي

كلمة صغير تبجيها وكلمة صغيرة تضحكها

وصحيح اهي مواصفات الناس النظاف لكن انا برأيي أن الإنسان لازم دائماً تكون عنده القدرة على ظبط أنفعالاته

:
شكراً على هذا التعليق المتميز

ويسعدني إنا انتشابه في طبع معين

:))

تحياتي عزيزتي

ودمتي بكل الحب

SHAHAD said...

ردة الفعل عندي عنيفة وصامتة

دائماً اذا كنت أعاني من أي شيء ،، أحترق من الداخل

أقعد وأضحك مع الناس لكني من الداخل أغلي ،، وهذا الشيء يسببلي ألام كبيرة

تنعكس بالسلب ،، على نفسيتي ومزاجي عموماً
.
.
جنك تتكلم عني : )
عيزت وأعدل بهالطبع ما قدرت
إن تضايقت ماعندي شي غير الصمت وحرقة القلب
وإن نطقت انفجرت لول

أما الحرية في التعبير عن الاحساس
فانا أحب هالطبع
سواء على الورق أو بالواقع
فيه شي من الحلاوة
أحس أكون واضحه حيل
عموما انا كل شي يبين على تقاسيم ويهي ! شي متعب

.
.

أخوي .. اول شي لازم ترضى عن نفسك
لأن شخصيتك بكل الأحوال حلوة
وإن كان في شي متعبك
واجهه أحسن شي
مادري شقول بصراحة
لأني انا نفسك أواجه نفس السلبيات : )

(روح) said...

اهلا استاذ حسين..

بالعكس انا احس هالشي طبيعي
جدا.. :)

لأن هذي شخصيتي..

أبسط مثال:

في سنتي الاخيرة بالثانوية
نادوني للتكريم أكثر من مرة
تفوق/مثالية/نشاط خارجي
كنت راح اموت

احد يكرمونه وهو يبكي؟؟
غير الشعور ان القلب بيوقف
وان الجسم يبرد ويسخن
غير الرجفة بالاطراف

خذ وخل :)


غير طبعا الاختلاط مع الناس
يؤذيني احيانا
احس اني مااعرف اتكلم
تبدى كل التأتأة
غير الحروف تسقط سهوا ولهوا

وبلعا :>

اصارحك بشي..

بجد مضايقني هالشي
متعبني

ودي اتغلب عليه
حاولت اكثر من مرة
اجبر نفسي باختلاط
بمجموعات اكبر عدد
لكن الشعور
انك مركز عليك
او انك ماودك احد يشوفك
بالعربي تكون شفاف
هو اللي يغلب :)

اما عن الالام الداخليه
حدث ولا حرج

كنت الوم نفسي سابقا
وصلت لمرحلة لامبالاة !!

لأني كنت اعتذر عن كل شي

يمكن لو تنفست اعتذرت !!

تعرف ايش الشي اللي
يخليني اضبط نفسي اذا
شفت احد مضايقني
او جارحني
شي كبير مو صغير


اني اشوف امي..

لأنها ماشاءالله
و الله ماشفت مثلها

انجرحت من ناس كثير
للأسف قراب
ومنهم بعمرنا

لكن ماعمري شفت على
وجهها تعبير غير الابتسامه
تفتح قلبها
ايدينها
كل باب تملكه
لهالناس
وعمري ماسمعتها
تشتكي !!!

لأن في ناس اهانت
احب ناسها لقلبها
تحت الثرى

رغم كذا

ماعمري سمعتها تطريهم بشين

فهذا يحسسني احيانا بسخافة
ضيقي لو تضايقت..

لأني اعرف ماراح اصبر مثل صبرها..


يوووه طولت

بس لي طلب..


اذا لقيت حل
اتمنى تقوله لي

ودي اعيش حياتي
بدون هالاعراض :)



ربي يريح بالك
ويطمن نفسك


دمت بخير

Kuw_Son said...

درب نفسك على الاختلاط بمجموعات كبيرة من الناس و تكلم بحرية بينهم ..

أمثلة الدواوين .. مو دوانية الربع الميانة .. لأن هذولي ما عنك مشكلة معاهم .. بس الحجي لما تقعد في ديوانية أو مكان عام فيه تجمع رجالي كبير و ما تعرف إلا 3 أو أربع .. هني تكلم على راحتك معاهم و سلم على هذا و وجب هذا ..

في ناس يدشون ديوانية و يسلمون و يقعدون بروحهم في أطرف مكان و ما يخالطون رواد الديوانية من الخجل !!

لا حس ولا خبر !!

و أيضا كثر ما تتعرض لمواقف بايخة أو محرجة أظن بيصير هالشي عندك عادي ..

و الكتمان شي مو مطلوب .. الغليان من الداخل يؤثر مو بس على النفسية !! يؤثر عضويا على الجسم !!

و أحد الطرق للتنفيس هو الكتابة .. و أنا أنصحك بالاستمرار في الكتابة أخوي

الله يوفقك

Purplecious said...

حسين

أنا حاسه باللي تقوله
وايد أطباع فيني ودي أغيرها بس مو قادره

أختلف معاك اني ما اقدر اخش بقلبي
بسرعه يبين علي
وايد انفعل و حساسه مو من كلمه من نظره تخيل

بس شوي بديت أتغير مع الوقت و الكبر و التدقر
ههههههههههه

أنا مادري جم عمرك بس هذا الطبع عاش معاك طول عمرك
ما راح تقدر تتخلص منه بوقت قصير تحتاج تعطي نفسك وقت أول شي

ثاني شي لازم يكون عندك احد يساعدك
صديق أو أخ أو أب او اي احد تحس انه قريب منك و فاهمك

ثالث شي يمكن ما جاء الوقت المناسب للتغير

انت ما راح تنجح من اول محاوله

و من خلال كتاباتك حسين انت ترى عبرت عن السبب اللي ما يخليك قادر تتغير و انت ما تدري

انت صح ودك تتغير بس عقلك الباطن خايف من هالتغيير

خايف انك تفقد قدرتك على الكتابه و التعبير

لانك دايم تقول انا احلى شي اكتبه لما اكون حزين

ودك تعيش حاله الدراما بحياتك
اي لا تستغرب
ترى الانسان مهما كان مرتاح ما يقدر يعيش طول عمره مرتاح و متهني
ساعات المرتاح يمل و يروح يدور الضيقه
و الحزن

اعتقد انت من هالنوع

هذا رأيي و تحليل بسيط مادري اذا صح أو غلط

:)

The Voice Within said...

hello there,

il part illi istawgafni o athar fini ib kalamik :

لما أكتب أجرد من كل الحدود

وأعبر عن كل شيء أحس فيه

مع إني أعتقد أن هالشي "غلط نوعا"ما

لأن المفروض على الإنسان انه يحكم السيطرة على نفسه


------

ana ma3ak ina ilwa7id lazim ysay6ir 3ala nafsa oo 3awa6fa bs mo ma3na hatha ina yakbit masha3ra oo a7asesa ..

i7na bashar oo ni7taj ina nfa'6fi'6 .. agal ma feeha min '7ilal il kitaba ..

lama taktib 3an masha3rik wa7aseesik hatha may3ni ina ur losing control bil3ks marat ilkitaba itsa3dik ina u get a grip on ur self o tit7akam ib nafsik oo tilga il7lool min '7lal el ta2amol o tarfee'3 illi feek

atmana ina hal 7achi yilga 9ada ib nafsik oo ita'3ayar na'6ritik ib hal janib :P


stay cool ;)

7osen said...

:روح
: Kuw_Son
: Purplecious
: The Voice Within


الصراحة
تعليقاتكم جدا ممتعة وفيها كلام جميل جدا وحلول فعليه ،، قريتها أكثر من مرة وقاعد اتمعن فيها
شكراً لكم
---------------


:شهد
اهلا وسهلا

أنتي في كلمة قلتيها اهي اهم شيء

إن نطقت انفجرت

هذي الأنفجار اهو التعبير والتنفيس عن كل الضيقه اللى تكون بالواحد

لو إنا نقدر كل ما شعرنا بضيقه ننفجر ونعبر مثل ما نحس جان كانت النتيجه مذهلة

وشوفي الشخص اللى يبين اي أنفعال على ويهه
هذا شخص شفاف ومشاعره أقوي من نفسه
:
شكرا لج
ودمتي براحة وأمان

=================



:روح

اهلين ومرحبتين

حقيقة أستمتعت وااايد في تعليقج

حسيت إنج تكلمتي بكل راحة
:
شعورج هذا بكل تفاصيلة أنا حسيت فيه
وجربته في مرحلة معينه من العمر


أنا لما مثلا أكون أتكلم وفي مجموعة من الناس تستمع
أتكلم بثبات بس انا مادري شنو قاعد اقول ،، أقول كلام مو حاس فيه ومو عارفه
ههههههه

أنا في موقف صارلي من زمان وااايد
كان عمري تقريباً 16
كنت في مكتبه وشاري اغراض كثيرة وكان في دور طويل وااايد
ولما وصل دوري وييت أبي ادفع أكتشفت إني ناسي فلوسي بالبيت ،، طبعاً كان الناس كلها قاعد تطالع والمحاسب كان مصري وحسيته قاعد يطالعلي بنظره مش ولا بد
هذا ،، أكثر موقف حسيت فيه بالخجل
والمشكله إني طول اليوم كنت أحس بشي ثقيل داخلي
مع إنه موقف لا أرادي وعادي جداً
بس ماقدرت أنساه للحين ،، تصدقين ؟

ماشاء الله على امج
صراحة شخصية مثالية إللي تواجه الأسائه بإبتسامة
الله يخليها لج
ويطول عمرها

أما الحل بالخجل
أهو الوقت ،، كلما تقدم العمر راح تحسين إنج تتخلصين من هذا الشيء

:
انا شكلي ماراح اخلص كلام
:)

شكرا لج عزيزتي تعلقج أثارني وخلاني أتكلم

اتمنالج كل التوفيق


=============


: Kuw_Son

اهلا وسهلا اخي العزيز

والله كلامك سليم امية بالامية

هذا عن تجربة واقعية

لأن احنا في عندنا ديوانية بالبيت

وقبل ايام المراهقة ماكنت أحب اقعد فيها اذا كان في ناس كبار قاعدين

وحتى لو قعدت ما اتكلم ولا كلمة

لكن لما الواحد بدأ يكبر بدت كل هالأشياء تتغير

وصار هالشيء عادي ،، وقمت ما ابي اخلص من الكلام

:))

لكن يظل هالشعور له بقايا بالنفس
أحيانا يداهمك بموقف معين ويشل لسانك عن الكلام

مادري ليش

شكرا لك عزيزي على كلامك المميز

تحياتي لك
وحياك الله

=============

: Purplecious

اهلا ومرحبا

تصدقين بيربل

انا احيانا اقرالج تعليق اقول هذا الكلام مو انتي كاتبته
:)
اهنيج على هالتعليق حسيت إنج فهمتي شخصيتي عدل

صراحه كلامج وااايد حقيقي

يعني هذا المقطع من كلامج

:
ترى الانسان مهما كان مرتاح ما يقدر يعيش طول عمره مرتاح و متهني
ساعات المرتاح يمل و يروح يدور الضيقه
و الحزن

هذا التساؤل أنا دائماً أوجهه حق نفسي
احيانا اكون في وضع لازم اكون مستانس مثلا
لأن مافي شيء يخليني أحزن او اتضايق
لكني اكون في اعماقي من الداخل احس بالحزن
ومادري ليش
واحيان ثانيه يصير العكس

بس الشيء اللى مو فيني
إني ما ادور على الضيقه بالعكس انا احيانا اكون وااايد متضايق لكن لما اكون في الديوانيه او مع الشباب اضحك ومنطلق وعادي
يعني الضيقه والحزن دائما تكون بيني وبين نفسي او مع الناس القراب حييييل



اما انتي

صرحه لما تأثر فيج نظرة وتغير احساسج
اكيد انج تملكين احساس مرهف جدا

بس هالشي ترا واايد صعب
لأن النظرات واايد والعالم اكثر شي تملكه النظرات

يعني لازم تحاولين إنج تتجاهلينها

شكرا لج عزيزتي على التعليق المميز جدا

ودمتي بكل الحب

================
: The Voice Within

اهلا وسهلا
حياج الله


ايي والله صدقتي

نحتاج انفضفض


أنا الكتابة عندي المتنفس الاكبر لكل أنفعالاتي واحاسيسي

أصلا أنا احاول بقدر الأمكان إني ما استرسل لما اكتب بالبلوق خصوصا

لأني لما أكتب أنسى أي حدود وأعيش مع نفسي
وأترك لها حرية مطلقة بالتعبير وبالكلام عن كل شيء

:
شكرا لج عزيزتي على كلامج
واكيد راح يكون بعين الاعتبار
انا شاكر لكم جميعا هالمشاركة المميزه فعلاً

ودمتي بسعاده وامل

عيون الحب said...

السلام عليك اخوي :)
زيارتي الأولى لمدونتك ..

وشفت نفسي فيها بصراحة ..
يعني ماطحت الا على موضوع يتكلم عني لوول ..

في شيئين من اللي ذكرتهم شفت عيون الحب فيها ..

الأول .. عدم قدرتي على ضبط انفعالاتي
والثاني .. نفس اللي قالته الاخت شهد الروح .. واللي هو بخصوص الصمت والاحتراق من الداخل وان تكلمت انفجرت وازيدك من الشعر بيت .. اطلع قنابل لوول ..

واللي يقهر اكثر من هذا وذاك ..
اننا نعرف انه اللي فينا طبع خايس ومب قادرين نتغلب عليه ..

قريت مرة في كتاب .. يقولك اذا تبي تغير من طبعك فغير عقلك الباطني واقنعه .. وهو اللي راح يمشيك ويدفعك للتغيير ..

ومع هذا لازم بعد نحاسب على اعمارنا ونشجع اعمارنا وندفعها دايما للأفضل ..

بس اللي يصير معانا .. اننا نتعايش من الخصلة السيئة اللي فينا ونعيش للتذمر وبس ..

ها اشرايك ؟؟ عجبتك لول؟

:| اسمحلي على الاطالة >>> من اولها وماسكتت شو بتسوي تاليها

charisma said...

:)
صباح الخير

اطباعك حسين اذا ما تخلصت منهاطول السنين الى فاتت و مع تقدم العمر ولازقه فيك خلاص ما تقدر اتغير
يصير طبعك

انت كتبت هالبوست وعارف الامور الى تبى اتغيرها وعارف ان الترمومتر مالك مو مضبوط

هههههه
وايد حبيت الترمومتر

تبى رايى ؟؟
ما فيك الا العافيه
لا اتفكر ولا اتركز على هالشى عشان لا يعشعش داخلك
انسى وبتلاقى نفسك تغيرت

انا الترمومتر على قولتك
خربان من زماان
ههههههه
انا وايد حساسه فوق ما تتصور
ودموعى ما عليها كونترول
وهالشى يضايقنى حيل
وايد يسببلى احراج

بس مع العمر حاولت ما اركز على هالعيوب
شو ى شوى
لقيت نفسى اقوى من اول

ما راحت الحساسيه 100%بس قلت

جرب هالشى وقولى
وهم ارد اقولك ما فيك الا العافيه
:)

Яeema said...

ما أدري شقولك
ماني إختصاصيه
بس في نقطه أحب أتفق معاك

ليش ما نقدر نغير بعض الأمور
فينا مع إن نحس إنها خطأ

عندي شي مليق في شخصيتي
الطناش
أكثر وحدة أعرف أرفع الجااام

لي قلت طاب خاطري من شخص
بس
أصك بلوك بخرسانه

و أسأل ساعات نفسي

هل إحساس بداخلنا إنها جزء من تركيبه شخصيتنا و إذا صلحنا هالشي راح نفقد جزء من شخصيتنا؟؟؟

barrak said...

انت انا بالضبط
فيني منك فيك مني

sologa-bologa said...

صفاتك تشبه صفات
برج الميزان
:)

حلو إن الواحد يعرف ويحدد انفعالاته
ومشاعره
والأحلى يعرف شلون يتعامل معاها
ومع الآخرين

على فكرة الكتابة نوع من أنواع
التنفيس واستخراج مكنونات النفس

فهي ليست خطأ

ودمت بحب وود

7osen said...

: عيون الحب

اولا اهلا وسهلا فيج
ومرحبتين
اسعدتني زيارتج واتمنى انها تتكرر دائما

ثانيا
اسمج واايد حلو عيون الحب

:

فعلا انا اعتقد أن الانسان لازم يفرغ كل الاحساس اللى داخله وما يخلي شي

لأن كلما كتمنا كلما زادت الضغوط علينا وخلتنا ننفجر

بس قنابل عاد ؟؟
:))

شوفي العقل الباطن مافي احد يقدر يغيره
لأن اهو يخزن كل انفعالاتنا الغير ارادية

اهو طبيعتنا الفطرية وكل شخصيتنا الحقيقية تكون مخزنه بالعقل الباطن

بس من الافضل إنا ما نتأقلم مع خصلة سيئة فينا
ودائما نحاول نغير نفسنا للأفضل

:
ولا تقولين إطالة
اسعدتني زيارتج جدا عزيزتي
وحياج الله دائما وابداً

7osen said...

: كاريزما

يا هلا ومرحبا


تصدقين كاريزما انا بجرب نصيحتج

النسيان ،، اهو احسن شيء

ثانياً الواحد كلما تقدم بالعمر في اشياء واايد بشخصيته يبدأ يسوي عليها كنترول قوي

انا قادر إني اسيطر تماماً
لكن المشكلة الكبيرة اللى اعاني منها اهي بيني وبين نفسي

وإن شاءالله على قولتج مافي الا العافيه

بعد التيرمومتر خربااان
لا بس تبين الصراحه
انتي مبين عليج شخصية مافي منها الا قليل جداً

الله يهنيج ويوفقج اختي العزيزه

ومشكوره على كلامج

اتمنالج كل السعادة

7osen said...

: Яeema

اهلا وسهلا

والله الصراحة مادري ليش
انا هذا السؤال محيرني

أنا عارف إن فيني هالطبع او هالخصله مو زينه
ليش مو قادر اغيره
يمكن نحتاج قوة إرادة كبيرة
يمكن نحتاج شخصيات اقوي من جذي
صعب فهم المسألة

بس الاكيد انها طبيعة البشر

:
والله ضحكتيني

اكثر وحده تعرفين ترفعين الجام

بس احسن علشان اللى مالج خلقه ترفعين الجام وتسويله ديليت وخلاص

ترا هذا طبع يمكن ان الناس تاخذه انه انانيه وتكبر ولا مبالة

لكنه بالنسبة لج واايد مريح

انا اتمنى عندي هالطبع

شكرا لج ريما على هالتعليق المميز

ودمتي بصحة وعافيه

7osen said...

:براك

اهلا وسهلا

يسعدني جدا
اني اتشابه مع احساسك العالي

شكرا لك اخي العزيز

تحياتي لك

7osen said...

:sologa-bologa

اهلا وسهلا

أنا برجي العقرب

صح اتفق معاك أنه شي جميل
ان الواحد يحدد مشاعره ويعرف يتعامل معاها

هذا اهم شي علشان تسيطر على شخصيتك

اما الكتابة
انا عندي ايها شيء مقدس ما اقدر اعيش اذا ما كتبت وعبرت عن مشاعري بالكتابة

اشكرك اخي العزيز على المرور المتميز

دمت بهدوء ودعة

ترا هذي الاخيرة ماخذها منك
:))

عيون الحب said...

مابغيت ترد علينا لوول ..
شكرا شكرا اخوي ان كان اسمي حلو ..
فردك علي هو الاحلى :)

مادري صح كلامك بخصوص العقل الباطني ..
بس نحن بعد نقدر نفكر بطريقة مختلفة توصل لعقلنا وعلى اساسها هو يصرفنا فهمت علي؟؟

عالعموم الدراسة في هالموضوع والنقاش كثير كبير ..

اهم شي نطلع بنتيجة ..
ناطرة زيارتك :)

salfa3ajeeba said...

msa'a il'7eer,

madri o'7oy 7osen ana shift ilkil 36ak 7olol wi mashalah igdro i7alilon ashya lik wi waffaw wi kaffaw,

ili abi agolah ina ili t3ani minnah kitheer mina i3ani minnah wi ana wa7da minhom li yomik iseer fini rodod ilaf3al hathi

ako kitan ismah "the secret" wi ytkalam 3n shy ismah law of attraction y3ni qanon iljthb, bi'7ti9ar igolik itha raddat she2 mo3ayyan wi karrartah dayman, mithal 3ibarat"ana ma a'7jal wla ithimni iltajammo3at"
m3a ilwagt wi ma3a trdeed halshy ra7 inshala tit'7alla9 minnah tadreejiyan

wi allah iwafgik inshala

7osen said...

: عيون الحب

اهلا عزيزتي مرة ثانية

أسف جدا على التأخير بالرد
بي والله شي خارج عن الإرادة


فعلا مثل ماقلتي هذا الموضوع النقاش فيه يطول ويتفرع

لكن أنا برأيي أن العقل الباطن اهو يخزن كل رغباتنا واحاسيسنا الفطرية
والعقل الواعي اهو اللى يتخذ القرارات بتصرفاتنا على حسب قناعاتنا وفهمنا للحياة

شكرا لج عزيزتي على التواصل
اتمنالج كل التوفيق

==================

:salfa3ajeeba
أهلا وسهلا

فعلا أختي كلامج صحيح

الإنسان يقدر مع التعود والتكرار يغير كل الامور او الطباع السيئه اللى فيه

لكن هذا التغيير يختلف من شخص للثاني

في احد يقدر يتغير جذريا
وفي احد يتغير تغيير جزئي

وفي احد من الصعب انه يتغير

كل واحد حسب تكوينه النفسي والتجارب الحياتية اللى مر فيها

شكرا لج على المرور
وحياج الله دائما

Mishari said...

مو عيب ان الرجل يكون خجول بالعكس هذا دليل قوة ولكن زيادة عن اللزوم تكون المسألة عايمة :)

يعنى تلحلح :))

وبعدين الدنيا تاخذ غلابا
والخجل يضيع حقوق:)

بو على حسيت فيك ولكنى عكسك تماما لا اخجل الا فيما يخصنى ولكن جرئ ومبلتع ولسان طويل
يعنى تقدر تقول شايب:)

اختلط مع ناس وايد وبادر و بالضرور ديوانية لان الدواوين مملة اصلا وصارت مؤذيه اكثر ما اهيا مفيدة
بس تأكد انك انسان جميل بخلقه وهذا بروحه كافى يا عزيزى

TReSTeN said...

انا بقوول شي بالبداية وانت علييك تفهم

بقوول الرووس نمت والعصاعص قامت

لوووووووووووووووول

انتي مشكلتك ان يمك مدرسة في فنون الحياة الا وهي انا بس مشكلتك ماتسمع النصيحة

انت تعلم اني كنت املك نفس الاشياء الي تحدثت عنها ولكني تغلبت علييها

واذا تبي درووس خصووصية حااضر

صج اني عطييتك كم درس ببلاش

ومنهم درس عييد الميلاد

بس شكلك ماتتعلم بسهوولة

شد حييلك

7osen said...

: Mishari

اهلا وسهلا أخوي مشاري

فعلا مثل ماقلت الدنيا تاخذ غلابا

لكن شنسوي الخجل هذا يكون شيء صعب إنا نتخلص منه بسهوله

لكن مع الكبر الواحد خلاص يتعود على الحياة

انت ماشاء الله عليك مبين عليج وااايد جريء
اللى يقرا مدونتك يعرف هذا الشيء بوضوح

اتمنالك كل التوفيق
وحياك الله

=============

:تريستن

ههههههههههه

تصدق إنت دائما تثبتلي إنك تضرب أخماساً بأسداس
تعرف شنو معناها

ههههههههه

والله لو إني أخذ دروسك جان علوووووم

ودرس عيد الميلاد
هذا أنت تسوية

لكن انا
ما أعتقد

:)))))