6/01/2010

التاج


قوانين التاج السلطاني:اذكر اسم من طلب منك حل هذا الواجب
تحدث عن ستة أسرار قد لا يكتشفها من يقابلك للمرة الأولى
حول هذا الواجب إلى ستة مدونين، واذكر أسماءهم مع روابط مدوناتهم في موضوعك
اترك تعليقا في مدونة من حولت الواجب إليهم، ليعلموا عن هذا الواجب


التاج تحول لي من مدونة روائع الجودي


والله فكرت شنو الاسرار الستة ومالقيت اسرار بمعنى اسرار

لكنها أشياء عني


1- أنا وايد أحب الحليب لدرجة مبالغ فيها ، ما أقدر اطلع من البيت الصبح إلا ليما اشرب قلاص حليب


2-ما أحب البس غترة وعقال، على طوول راسي يعورني إذا لبستهم، علشان جذي مو دايم البسهم


3-ما اواطن التدخن ، وما اقدر اقعد بمكان فيه مدخنين وإذا كنت مجبر راح يكون يوم سيء لأن لازم راسي يعورني حييل


4-احب الأكل وااايد خصوصاً العيوش ، يعني توني ماكل مجبووس دياي عجيييب مع مرق دقوس روعة ، لكني دائما بعد ما اكل احس بالذنب بسبب الرجيم إللي صارلي سنة بسوية :))


5- طبعي واايد هادي وما اتكلم كثير ، واعتقد إن حكم الناس علي دائما يعطيني اكثر من حقي يمكن لأني مسالم، بس إذا عصبت أتهور


6-مرة مسحت مدونتي بلحظة غضب وتهور وندمت وااايد لأني ما قدرت أسترجع المكتوب فيها ، للحين نادم حيل كان فيها كتابات صادقة وأول الكتابات في المدونة وتعليقات من ناس الحين مو موجودين حسافة وااايد نادم على هالتصرف .


بالنهاية شكرا للعزيزة الجودي على هالتاج

وأتمنى إني جاوبت مظبوط مع إنها مو أسرار


بس أنا ماراح أنفذ كل شروط التاج لأني مادري حق منو أحوله كل الناس إللي فكرت فيهم حصلت عندهم

علشان جذي راح أمتنع عن تمرير التاج


:)

9 comments:

سلة ميوّة said...

أمممم

إنت النسخة الرجالية مني..على ما اعتقد:)


طبعا انا والعيوش حبايب للأبد:)
و وصفك (عليك بألأف عافية ) خلى قريحتي للأكل تنفتح مع إني مريضة والمفروض مافيني آكل...
المهم:)

والرجيم مشالله كل يوم اقول باجر
وعيا يجي باجر هيهيهيهيهي


وعن الحليب وما ادراك ما الحليب

كنت ايام الدراسة برة يقولون لي ربعي انتي يدتنا الروحية

لني كنت اخذ معاي درابيل ولازم حليب..ايمعهم عندي بالغرفة واسويلهم حليب مهيّل:)


والأهم من كل اللي قلته
لحظة الغضب الي مسحت فيها المدونة..
سويتها وحياتك وندمممممت...
بس الحمدالله كنت حافظة نسخه منها...



مساك الله بالخير
يامرآتي

why me said...

إحنا ندري ان وايد طبعك هادي



ساقط بالامتحان


;ppp


وحده بوحده
;p

aL-NooR . said...

خووووش اسرااااار
ششششششش
حتى انا احب الحليب
بكل انواعة
بارد /حار
بالكاكاو


*****************

الجودي said...

قول ياز لك التاج وحاب تحتفظ فيه مو منت عارف من له اتحوله
;P

على كل اسرارك حلوه بس العصبية كنت متوقعتها فيك ما ادري ليش اسلوبك في الكتابه يبين إنك حتى لو كنت هادي لك لحظات تثور فيها على كل إلي حولك

إلا بس عندي سؤال شنو يعني مرق دقوس ؟؟؟

يعني يا مرق يا دقوس الأثنين وايد صعب
:D

مشكوووووور وايد على تلبية الدعوة وايد

7osen said...

سلة

ياهلا ومرحبا

ههههه عجبتني النسخة الرجالية
هههه

وماتشوفين شر ان شاءالله
بالعكس أكلي علشان يروح المرض

أنا غرامي الحليب بطريقة جنونية
احبه وااايد
:)

شكرا لج سلة على هالتعليق الحلو
اتمنالج كل الخير

---------------
واي مي

ياهلا

جذي يعني تقليد
ههههه

شسوي ماعندي اسرار

----------
النور

ياهلا ومرحبتين

لا مو خوش اسرار
مافيها اسرار
:)

أنا يعجبني اي واحد يحب الحليب
وإللي مايحبه مايعجبني
ههههه

تحياتي لج عزيزتي
وشكرا على المرور
--------------
الجودي
يامرحبتين

أمممم تقدرين تقولين جذي
:)
بصراحة مادري حق منو احوله، علشان جذي احجمت
:)

أييي احيانا اصير عصبي
بس قليل جداً

من صجج ماتعرفين مرق الدقوس
مرق الدقوس أهو نفس الدقوس بس مرق
ههههه
يعني مرق ثقيل شوي وحار
بس لذيذ .. عاد قاعد اكتب الكومنت وأنا يوعان أشتهيته :)

شكرا لج الجودي
واتمنى إني رديت على التاج بالشكل المناسب
:)

حَافِـيَةُ الَقَدمَيّـنْ ولِبَاسِي المَطـرْ said...

تصدق ثاني اسرار تعجبني
حسيتها صادقه

في مدونين ومدونات
احس صفاتهم والأشياء اللي ذكروها
كلها عاديه أو مألوفه
مو بمعنى اسرار


وفعلاً احسك إنسان هادييييي لأبعد حدود

7osen said...

حافية

هلا والله ومرحبا

شلونج وشخبارج إن شاءالله بخير

شكرا لج عزيزتي على كلامج الطيب
وفعلا انا بالحقيقة وااايد هادي
:)

تحياتي لج ايتها المبدعة الصغيرة
أتمنالج كل الخير

Anonymous said...

سلام
><





عبير

Blogger said...

eToro صفقات التداول المفتوحة في 227,585,248

تداول من أي مكان وقتك ثمين. تداول من خلال الكمبيوتر أو الجوال أو الكمبيوتر اللوحي